Read chopi Luka 2 Bible Online

Luka 2 - chopi bible

Luka 2

¹Ka ale masiku, kuhumile mthetho wa Khezari Awugustu, wa bhalela ya dotshe ditiko.

²Ayiya bhalela njo khata kuhuma, kufumani ka Kirino, mfumeli wa Siriya.

³Se va ti ti ya bhalelani, m'thu ni m'thu didhoropani kwawe.

⁴Josefa nene a to khukha ngu Galileya, ka didhoropa da Nazareta, e kwela eya Judheya, ka didhoropa da Dhavhidha, di dhanwako ku i Bhetlehema, nguko i nga ti wa nyumba ya lixaka la Dhavhidha;

⁵Kasi kuya ti bhalisa kumweko ni Mariya, msikati wakwe, awu a nga ti ni txirumbu.

⁶Se va di manekile koneyo, di to hoka ditshiku da kuhefemula ka Mariya;

⁷se e amukela Mwanana wa matiwula. A to mu phutela ngu tinguwo, e mu otelisa mkawuni, nguko wu ti si nga ho wukhalo wa kudingana vona ka nyumba ya vapfhumba.

⁸Ka ditiko dile, va ti ti ho vadyisi, va nga ti zumba bhuwani, va txi xayisa sifuyo sawe ni wusiku.

⁹Ngelozi ya Mkoma yi to woneka hafuhi kwawe, se kuphatima ka Mkoma ku txi va randela, se vona ve khata kutelwa ngu dizowa.

¹⁰Ngelozi yi to va gela yi txi kha yona: “Mi nga thaveni, nguko ni mi bikela mahungu amanene a kutsaka ka hombe, akuwa ku no va i di ka votshe vathu.

¹¹Nyamsi, didhoropani ka Dhavhidha, a velekilwe Muhanyisi, awu i ku Kristu Mkoma.

¹²Txikombiso txa kona ngu txiya: Mi na ya mana Mwanana a di fenengetetwe ngu tinguwo, e oteliswa mkawuni.”

¹³Kunukunuko dibutho da yimbi ya nzumani di to patana ni ngelozi, ve dhumisa Txizimu, va txi kha vona:

¹⁴“Txi na dhumiswe Txizimu txitimwi nzumani ni kudikha ku na tale ha mafuni, ka vale txona txi va dhundako.”

¹⁵Txikhati txi tingelozi ti nga siya vadyisi, ti txi konama nzumani, vadyisi va to gelana va txi kha vona: “He tsimbileni Bhetlehema, hi txi ya wona ati ti nga maheka, ati Mkoma a nga hi zivisa tona.”

¹⁶Va to tsula ngu kukuluveta, veya mana Mariya ni Josefa, ni Mwanana, a nga ti otelisilwe mkawuni.

¹⁷Mbimo yi va nga mu wona, va to txhamusela ati va nga gelwa ngu mhaka ya Mwanana wule.

¹⁸Se ava va nga tiengisa, ve xamala ngutu ngu totshe tile va nga gelwa ngu vadyisi.

¹⁹Mariya a txi ti veka hakhana totshe timhaketo, e zumba a txi ti alakanya mbiluni kwakwe.

²⁰Ti di mahile eto, va to tshumela vadyisi, na va txi dhumisa ni kubonga Txizimu, ngu totshe ti va nga ti wona ni ku tiengisa, nga ti va nga ti gelisilwe tona.

²¹ Ngako ma di tshangani mtxhanu wa masiku ni mararu, kasiku Mwanana e yiswa wukwerani, va to m'raya ditina daku i Jesu, di nga wombwa ngu ngelozi na ene a sanzi kuva kona mndani ka mame wakwe.

²²Ngako ma di pindile masiku a kubasiswa kwakwe, nga ti wu rumisako tona Mlayo wa Mosi, vona va to teka Mwanana ve mu heleketa Jerusalema, kufela kuya mu kombekisa masoni ka MKOMA,

²³ madingano ni ti ti nga bhalwa amu ka Mlayo wa MKOMA, va txi kha vona: “Mwanana wa m'zambi, wuhi ni wuhi i ku wa matiwula, a na phaxwa a txi mahwa wo lumba MKOMA.”

²⁴Va txi fanela kambe kuya ningela mhamba ya matuva mambidi mwendo mavhondo mambidi a situvani nga ti wu wombisako tona Mlayo wa Mkoma.

²⁵A ti ti ho m'thu Jerusalema a nga txi dhanwa ku i Simiyoni. Ene i ti wa kululama ni kutiningetela ka wukhongeli. Ene a ti ti rinzela kuthavelelwa ka Israweli, se Moya wo Sawuleka wu ti ti ni nene.

²⁶A wonisilwe ngu wona Moya wo Sawuleka ti to kha na mbi fa a sanzi kuwona Mesiya wa Mkoma. Ene a to yiswa Dithepeleni ngu Moya wo Sawuleka.

²⁷Ti di mahile eto, mbimo yi vaveleki va nga tisa Mwanana Jesu kasi kuya maha ngu ngene tifanelo ta Mlayo,

²⁸ene a to mteka manzani kwakwe, e bonga ka Txizimu, a txi khene:

²⁹“MKOMA, se konkuwa u nga sikota kuleka txithumi txako txi tsula ngu kudikha, nga kuwomba kwako,

³⁰Nguko maso angu se ma wonile kuhanyisa kwako;

³¹akuwa u nga lulamisela votshe vathu.

³²I ku liwoningo la kuwoninga matiko ni txipfaliso txa kudhumisa vathu vako va ka Israyeli.”

³³Tate wakwe ni mame wakwe va to xamala ngu kuengisa ati vathu va nga txi womba ngu ngene.

³⁴Se Simiyoni a to va katekisa, na a txi womba ka Mariya, mame wa mwanana, a txi khene: “Mwanana wuwa a emisetwe ku na wisa ni kuwusa vavangi ka nyumba ya Israyeli, a na va kambe i di txikombiso txi txi no kanetwa;

³⁵Nanawe nje, ditxhari di na thola muhefemulo wako, kufela ku yi txi humeleliswa mialakanyo yi yi ku timbiluni ka vavangi.”

³⁶A ti ti ho kambe mprofeti wa wamsikati, a nga ti dhanwa ku i Ana, mwanana wa Fanueli, wa lihunzu la ka Aseri. A ti ti kumbile ngutu.

³⁷A ti tekilwe i di ngadi mbiri, e zumba ni mwamna wakwe mtxhanu wa malembe ni mambidi. Se konkuwa i ti noni ya mtxhanu ni mararu magumi, ni mune wa malembe. A ti si khukhi Dithepeleni, amuwa a nga txi khozela Txizimu, ngu kutitona sakudya ni kumaha mikombelo wusiku ni mitshikari.

³⁸Nene a to bwaka ka txonetxo txikhati, a txi dhumisa Txizimu ni kuxawutela timhaka ta Mwanana ka votshe vale va nga txi verela kuhulukiswa ka Jerusalema.

³⁹ Msana ka kuva va di hetisile sileleto sa Mlayo wa MKOMA, va to wuya Galileya, didhoropani kwawe ka Nazareta.

⁴⁰Mwanana a txi kula ni kumana mtamo, na a di tate ngu wutxhari; ani kateko ya Txizimu yi ti ti ni nene.

⁴¹ Vaveleki va Jesu va ti ti ya otshe malembe Jerusalema, ngu mbimo ya M'buso wa Pasika.

⁴²Se mbimo yi a ngava ni tanga ya digumi da malembe ni mambidi, va to kwela va txi ya kona Jerusalema, madingano ni toloveto ya masiku a M'buso.

⁴³Ngako ma di gumile masiku a m'buso, va to tshumela ve wuya mwani, se Mwanana Jesu a to sala Jerusalema, na va si ti zivi vaveleki vakwe.

⁴⁴Na vona va txi pimisa ti to a nga va a diho hagari ka vale va nga txi longoloka navo nzila yimweyo, va to tsimbila mbimo ya kudingana ditshiku, se ve khata ku mu lava amu ka maxaka ni ka vava va zivanako navo.

⁴⁵Ngako va di mu pwati, va to tshumela veya Jerusalema, ngu kulava ene.

⁴⁶Msana ka masiku mararu, va to ya mu mana amu Dithepeleni, a di khalahatshile hagari ka vagondisi, na a txi va engisela ni ku va mahela siwotiso.

⁴⁷Votshe vale va nga txi mu engisa va to xamala ta tinene ngu wuzivi wakwe ni tixamulo takwe.

⁴⁸Mbimo yi vaveleki vakwe va nga mu wona, va to xamala ngutu, se mame wakwe a ti khene kwakwe: “Mwanangu, u hi mahete txani eto kani? Hinga wona, tate wako ni nani hi tsimbite ngu kuxaniseka hi txi kulava.”

⁴⁹Ene a xamute a txi khene kwawe: “Kasi mi ti ni lavela txani kani? Ina mi si ti zivi ti to ni fanete kuva ni di nyumbani ka Tate wangu kani?”

⁵⁰Aniko vona kha va ma manisisa kha kwati mapswi awa a nga va gela.

⁵¹Sekoko ene a to relela navo, e tsula Nazareta, kambe a txi ti veka hahatshi kwawe. Se mame wakwe a txi ti veketa totshe timhaka tiya mbiluni kwakwe.

⁵²Se Jesu a ti kula mu ka wuzivi ni ka txiemo ni mu ka kateko, masoni ka Txizimu ni ka vathu.