Read chopi Luka 20 Bible Online

Luka 20 - chopi bible

Luka 20

¹Ngu ditshiku dokari, ku ti ngako a txi gondisa vathu Dithepeleni ni kutxhumayela vathu Evhangeli, vaphaxeli va hombe ni vabhali va to ti wonekisa kwakwe kumweko ni madhota a ditiko,

²va txi kha vona: “Hi nga hi gela mtamo wu u mahako tiya ngu wona, ni ti to awu a nga kuninga mtamo wuwa i mani kani?”

³Ene a to va xamula a txi khene: “Anani ni na mi wotisa mhaka: Ni geleni:

⁴Kubhabhatisa ka Johani ku ti huma nzumani mwendo ku ti huma ka vathu kani?”

⁵Aniko vona va to kanetisana va txi kha vona: “Ngako hi txi khathu kuhuma nzumani, a na khene: Mi lambile kukholwa ngu txani kani?

⁶Se ngako hi txi khathu: Ku humile ka vathu, ditiko dotshe di na hi balisela ngu marigwi, nguko votshe va kholwa ngutu ti to Johani i ti mprofeti.”

⁷Se va to xamula, va txi kha vona: “Kha hi ti zivi ti to ku ti huma ngu hani.”

⁸Konaho Jesu a to khene kwawe: “Nanani kha ni na mbi mi gela ti to ni maha tiya ngu mtamo muni.”

⁹Se a to khata kugela vathu txidinganiso txiya: “M'thu wokari a phayile thembwe ya mivhinya, se e yi siyela manzani ka vadimi, se e teka dipfhumba da kuendela matikoni ka kule, mbimo yo lapha.

¹⁰Ngako yi di hokile nyango, a to ruma txithumi ka vadimi ti to ve txi ninga mihando yokari ya vhinya. Aniko vadimi va to mu peka, ve mu tshumeta a si nga ni txilo.

¹¹Ene a to engeta e ruma tximwani txithumi; ni txona va to txi peka ve txi wisa tingana, se ve txi tshumeta txi si nga ni txilo.

¹²Ene a to engeta e ruma txa wuraru. Neneyo va to mpeka, ve mu tovela.

¹³Se nyamne wa thembwe a txi khene: ‘Ni na maha txani kani? Ni na ruma mwanana wangu, awu ni mu randako, mwendo, ngako va txi mu wona, va na mu thava.’

¹⁴Aniko vona, ngako va txi mu wona, va to gelana, va txi kha vona: ‘M'dyi wa thomba ndiyo, he m'dayeni, kasiku thomba yakwe yi va yathu.’

¹⁵Se va to mu humisa hahanze ka thembwe, ve m'daya. Nyamne wa thembwe a na maha txani kani?

¹⁶A nata, a ta dayela vadimi vale e ningela thembwe ya mivhinya ka vamwani.” Ngako vona va txi pfa tiya, va to kha vona: “Ti nga thuke ti maheka timhaketo.”

¹⁷ Se a txi va wonisisa, a ti khene kwawe: “Ti womba txani ati ti nga bhalwa va txi kha vona: ‘Dirigwi di vaaki va ngadi nyenya, ngu dona di nga mahwa dirigwi da hombe da kutsanisa kani?’

¹⁸Wuhi ni wuhi a no wela ka dirigwido, a na phwatika, aniko awu di no wa txitimwi kwakwe, di na mu phwarasa.”

¹⁹Se vaphaxeli va hombe ni vabhali va txi lava ku mñola ka txonetxo txikhati, aniko ve thava mtalo wa vathu, nguko va ti pfite ti to a ti mahela vona txidinganiso txiya.

²⁰Se va to baramela Jesu, ve rumela sinyengwani, si nga txi ti maha vathu vo lulama, kasiku mkhakheta ka dipswi dokari, ti to va na mningela ka wulamuli, ni ka mtamo wa mfumeli.

²¹Se va to mu wotisa, va txi kha vona: “M'gondisi, ha tiziva ti to wa womba-womba ni kugondisa kha kwati ni kululamisa, kambe khu woni ngu khohe ya m'thu, aniko u gondisa nzila ya Txizimu ngu ditshuri.

²²Ina ha tumelwa kuningela mkhupo ka Khezari mwendo kha hi tumelwi kani?”

²³A di woni wurindi wawe, a to khene kwawe: “Mi ni dukela txani kani?”

²⁴Ni kombeni male yimweyo. Njifananiso txa mani ni m'bhalo wa kona kani? Vona va to xamula va txi kha vona: “Nza Khezari.”

²⁵Sekoko a to khene kwawe: “Ningelani ka Khezari asi i ku sa Khezari, ni ka Txizimu asi i ku sa Txizimu.”

²⁶Se kha va sikota ku m'bzweta ngu mapswi dipswi dokari masoni ka vathu; va to xamala xamulo yakwe, va so kaye.

²⁷ Se va to tshuketela Jesu Vasadhusi vokari, ava va kanetako kuwuka ka vafi, va ta mu wotisa va txi kha vona:

²⁸“M'gondisi, Mosi a hi bhalete ku khene: ‘Ngako a txi fa m'thu wokari, wamwamna, a txi siya msikati wakwe a si nga ni mwanana, mwanawe a na mu sambele thaka wu wa noni, kasi kuwusela liveleko mwanawe.’

²⁹Se va ti ti ho mtxhanu wa vavamna ni vambidi, va txikoma ni txinanda. Wo khata a tekile msikati, se a txi fa, a si nga ni mwanana.

³⁰Wa wumbidi,

³¹msana kwakwe nene wa wuraru, va mu sambete thaka wu wamsikati. Votshe va mtxhanu ni vambidi va fite va sa siya mwanana.

³²Ngu kugwitisa, a to fa nene wule wamsikati.

³³Sekoko, kuwukani ka vafi, awule wamsikati a na va i di msikati wa mani, eko ka votshe a nga va msikati wawe, kani?”

³⁴Jesu a va xamute a txi khene: “Vathu va ha mafuni hawa, va teka ni kutekwa,

³⁵aniko ava va no maneka va di ni fanelo ya txyavelo ka dimwani ditiko ni txa kuwuka ka vafi, evo kha va teki, kambe kha va tekwi.

³⁶Kha va na mbi ngadi ve fa, nguko vona va fana ni tingelozi. Vona mbanana va Txizimu, nguko mbanana va kuwuka ngu kufani.

³⁷Ni ti to vafi va na wuka, Mosi a kombisile, mbimo yi a nga womba ngu ta txipopo txo tura, a txi khene: ‘Mkoma i Txizimu txa Abrahamu, Txizimu txa Isaake ni Txizimu txa Jakobe.’

³⁸Ngu toneto, Txizimu hi nga Txizimu txa vafi, aniko nja va vo hanya, nguko ka txona votshe va hanya.”

³⁹Se vabhali vokari va to xamula va txi kha vona: “M'gondisi, u xamute ta tinene.”

⁴⁰Se kha va tsana ku mu wotisa yimwani mhaka.

⁴¹Se ene a txi khene kwawe: “Ngu kutxani vathu va wombako ku Mesiya i Mwana Dhavhidha, kani?

⁴² Nguko Dhavhidha apune a wombile ka Dibhuku da Masalmo, a txi khene: ‘Mkoma a ti khene ka Mkoma wangu: Zumba ngu txineneni kwangu,

⁴³kala kuza ni maha valala vako veva txikhigetelo txa mikondo yako.’

⁴⁴Se ngako Dhavhidha a txi m'dhana ku i Mkoma, a nga va ene i di Mwanakwe ngu txani kani?”

⁴⁵Ene a to womba, na va txi tiengisa votshe vathu, a txi khene ka vagondiswa vakwe:

⁴⁶“Ti woneleni ka vabhali, ava va randako kutsimbila va di ambate tinguwo to lapha, ni kuloswa mitendelani, ni sikhalo sa masoni masinagogani, ni sikhalo so thanga mibusoni.

⁴⁷Va handa tinyumbani ka tinoni, ve ti guleta ngu kumaha mikombelo yo lapha. Vonavo va nata lamulwa ngu kulamulwa ku kupindisako.”