Read chopi Luka 22 Bible Online

Luka 22 - chopi bible

Luka 22

¹ Ngako wu nga ti hafuhi M'buso wa mapawu o mbi tshumbelwa, wu dhanwako ku i Pasika,

²vaphaxeli va hombe ni vabhali va ti lava nzila ya tiya va no dayisa tona Jesu, nguko va ti thava vathu.

³Se Sathani a to wulela mbiluni ka Judha, awu a dhanwako ku i Iskariyoti, i nga ti mmweyo wa vale va Digumi ni Vambidi.

⁴Ene a to tsula a txi ya langana ni vaphaxeli va hombe ni tinduna ta yimbi, ati a no va ningelisa tona Jesu.

⁵Vona va to tala ngu kutsaka, ve tumelelana ku mninga male.

⁶Judha a to tumela, se e lava mbimo ya yinene kuya ningela Jesu ngu yona, na di si nga ho dibutho.

⁷Se di di hokile ditshiku da mapawu o mbi tshumbelwa, i ku da kumaha ngu dona mhamba ya Txinvutana,

⁸Jesu a to ruma Pedro ni Johani, a txi va gela ku khene: “Tsulani mi txi ya longisela Pasika, kasiku hi na ya yi dya.”

⁹Vona va mu wotisile va txi kha vona: “U lava hi txi ya yi longisela hani kani?”

¹⁰Ene a ti khene: “Mbimo yi mi no wulela didhoropani, mi na manana ni wamwamna a di rwate lidhuwa la mati. Mu londiseni kala ka nyumba yi a no ya wulela ka yona.

¹¹Mi na ya gela nyamne wa m'ti mi txi khanu: ‘M'gondisi a hi rumete ku ta womba kwako ti to yi hani nyumba yi ni no dyela ka yona Pasika ani ni vagondiswa vangu kani?’

¹²Seko ene a na mi komba wukhalo wa hombe wu nga lulamiselwa txitimwi txitezini. Longiselani koneho.”

¹³Vona va to tsula veya mana totshe nga ti a nga va gelisa tona, se ve longisela Pasika.

¹⁴Ngako txi di hokile txikhati, Jesu a to ya khalahatsha ha mezani kumweko ni Vapostoli.

¹⁵Se e va gela ku khene: “Ni xuvile ngu kunavela ka hombe kudya Pasika yiya kumweko ni nanu, ni sanzi kuxaniseka,

¹⁶nguko na mi gela ti to kha ni na mbiswa ni txi yi dya kambe, kala txikhati txi yona yi no ya tatiseka Mfumoni ka Txizimu.”

¹⁷Se a to teka digombe, a txi bonga, a txi khene: “Tekani mi txi siyetisana ngu dona,

¹⁸nguko na mi gela ti to kha ni na mbiswa ni sela kambe mihando ya m'vhinya kala kuta ka Mfumo wa Txizimu.”

¹⁹Ngu konaho a to teka dipawu, se a di bongile, a to di bhanda, a txi va ninga, a txi khene: “Asiya i mmidi wangu wu no ningelwa ngu kota yanu; mahani tiya kasi ku ni alakanya ngu tona.”

²⁰Msana ka kuva va di lalete, a to mahisa toneto kambe ngu digombe a txi khene: “Digombe diya Njitumelelano txa Txiphya ka mnoha wangu, wu no theketwa ngu kota yanu.

²¹ Hambi keto, wonani, dianza da wule a ni ningelako, di ni nani ha mezani.

²²Mwanana wa M'thu a longoloka ngu nzila yakwe kota nga ti ti nga sikeliswa tona; aniko dikhombo da wule a ningelwako ngu ngene!”

²³Se va to khata kuwotisana ngu txawe, ti to i mani kwawe, awu a no yi maha mhakeyo.

²⁴ Sekoko, va to khata kukanetisana ngu kulava kuziva ti to i mani a alakanyelwako kuva i di wa hombe hagari kwawe.

²⁵Ene a to va gela, a txi khene: “Vafumeli va vamatiko va ma fuma ngu mtamo, ni vale va ku txitimwi kwawe va dhanwa ku mbamahi va ta tinene.

²⁶Kasi hagari kwanu, ti nga mahise eto: Awu i ku wa hombe, hagari kwanu, a na ti mahe wam'dotho; awu i ku mthangeli, a na ti fananise ni wule i ku txithumi.

²⁷ Nguko, kasi i mani i ku wa hombe kani? Awule a nga khalahatsha ha mezani mwendo awule a mu thumelako kani? Ina wa hombe hi nga wule a ku ha mezani kani? Aniko, ani ni maneka hagari kwanu nga wule a thumelako mmwani.

²⁸Anu mi vathu va va nga timisela kumweko ni nani ka sotshe siduko sangu.

²⁹Kufana ni kuwa Tate wangu a nga ni ninga wukoma, nanani na wu ningela wukoma wuwa kwanu,

³⁰ kasi ku mi txi dya ni kusela ha mezani kwangu, ka Mfumo wangu; ni ti to mi txi khalahatsha ka sikhalo sa wukoma mi txi lamula tihunzu ta digumi ni timbidi ta ka Israyeli.”

³¹“Simoni, Simoni, wona: Sathani a kombete ku mi hehera nga kule ka fulaho.

³²Aniko ani ni ku kombelete, kasiku likholo lako li si timeki. Se awe, ngako u di hundulukile, tsanisa vakwanu.”

³³Ene a to womba a txi khene: “Mkoma ani ni ti longisete kutsula ku khotelwani kumweko ni nawe, hambi kuya kufani.”

³⁴Aniko Jesu a to khene: “Pedro, na kugela ku khani: Mkuku nyamsi kha wu na mbi emba, na awe u sa kaneta kuraru ti to wa ni ziva.”

³⁵Ngu msana a engetile a txi khene kwawe: “Mbimo yi ni nga mi ruma, mi si nga ni mkwama mwendo msava mwendo masandazi, txi ho txi txi nga mi pwatekela kani?” Vona va to angula va txi kha vona: “Lambi!”

³⁶Se ene a to txhatekela dipswi daku khene: “Se konkuwa, awule a ku ni mkwama a na wu teke, hambi msava ni wona; ani wule a ku si nga ni ditxhari, a na xavise dibhaji e xava ditxhari dimwedo.

³⁷Nguko ani na mi gela ti to khani, di fanela kutatiseka kwangu dipswi di di nga bhalwa daku: ‘A batwe kumweko ni sindaka-milayo.’ Nguko ati ti nga bhalelwa ani, ti fanete kutatiseka.”

³⁸Vona va to angula va txi kha vona: “Mkoma, ahawa hi na ni matxhari mambidi!” Ene a to xamula a txi khene: “Ma dingani!”

³⁹Konaho ene a to huma e tsula mmangoni ka Miolivha, ngu tolovelo yakwe. Se vagondiswa ve mu londisa.

⁴⁰Mbimo yi a nga hoka koneyo, a to va gela, a txi khene: “Khongelani kasiku mi si wi kudukwani.”

⁴¹Sekoko, e phawuka kwawe, a txi ya kule nyana ka kudingana kurinzwa ka dirigwi, ahawa a nga ya khizama, e khongela, a txi khene:

⁴²“Tata, u txi ti lava, hambukisa digombe diya da sixaniso di txi ya kule ni nani. Aniko, ku nga mahwe kuranda kwangu, ku na mahwe kuranda kwako.”

⁴³Konako, ku to humelela ngelozi ya kuta ngu nzumani, yi ta mtsanisa.

⁴⁴Ene, a di tate ngu kupandiseka, a to simama kukhongela ngutu, mnyuko wu a nga txi dhunuka, wu txi nga mathotho a mnoha, ma nga txi thothoketela ha mafuni.

⁴⁵A di gwitile kukhongela, a to wuya ka vagondiswa, a ta va mana va txi otela, ngu kupfa dikhodho.

⁴⁶Se a txi khene kwawe: “Nji txani mi txi otela kani? Wukani, mi txi khongela, kasiku mi si wi kudukwani.”

⁴⁷Ene a di ngadi a txi womba-womba, ku to haruka mtxawa wa vathu, na va txi thangelelwa ngu mmweyo wa va digumi ni vambidi, a dhanwako ku i Judha, a nga ti thangete masoni; ene a to tshuketela Jesu, a txi mu pswopswa.

⁴⁸Jesu a to mu gela ku khene: “Judha, wa ningela Mwanana wa M'thu ngu kupswopswa, kani?”

⁴⁹Ngako vale va nga ti nayo, va txi wona ti ti nga txi lava ku mu humelela, va to mu wotisa ku kha vona: “Mkoma, hi txi va limaza ngu matxhari kani?”

⁵⁰Se mmweyo wawe a to peka txithumi txa mphaxeli wa hombe, e txi wila nzeve ya txinene.

⁵¹Kambe Jesu a to khene: “Basi! Lekani!” Se a to gwesa nzeve, e mu hanyisa.

⁵²Ngu msana, a to gela vale va nga ta, va di mu xomete, vaphaxeli va hombe, tinduna ta Dithepele ni madhota a ditiko, a txi khene: “Mi ta ni matxhari ni migomba, nga mi to xomela dikhamba kani?

⁵³Ka otshe masiku awa ni nga ti ni nanu Dithepeleni, kha ma ni gwesa ngu manza anu, aniko atxiya ngu txona txikhati txanu ni mfumo wa txidema.”

⁵⁴Sekoko va to ñola Jesu, va txi mteka, ve m'yisa m'tini ka mphaxeli wa hombe. Pedro a txi londetela a di kule.

⁵⁵Ngako va di dhivete mndilo ha mtendelani, va txi khalahatsha ve wora, Pedro a to khalahatsha kumweko navo.

⁵⁶Sekoko, mmweyo wa txithumi txa wamsikati, a di mu woni a di khalahatshile ha txikho, a to mu wonisisa, a txi khene: “Awuwa nene a ti kumweko nayo!”

⁵⁷Kambe Pedro a to kaneta, a txi khene: “He wamsikati, ani eyo kha ni mu zivi.”

⁵⁸Msana ka mbimoanyana ya yidotho, mmwani a nga mu wona, a to khene: “Nanawe u mmweyo wawe!” Kambe Pedro a to angula a txi khene: “He mo, kha ni nga mmweyo wawe ani!”

⁵⁹Msana ka mbimo yi yi dinganako txikhati tximwetxo, mmwani a to simama nene, a txi khene: “Kha ditshuri awuwa a ti kumweko nayo, nguko nene mbwa Galileya.”

⁶⁰Pedro a to angula, a txi khene: “He mo, ani kha ni tizivi eto u wombako.” Se, kunukunuko, ene a di ngadi a txi womba-womba, ku to emba mkuku.

⁶¹Mkoma a to tshembereka a txi wonetela Pedro, se Pedro a txi khumbula dipswi da Mkoma, a nga mu gela ku khene: “Na mkuku wu sanzi kuemba, nyamsi awe u na ni lamba kararu.”

⁶²Se ene a to huma hahanze eya dila ngu txiviti.

⁶³Ngu yoneyo mbimo, avale va nga txi woneleta Jesu, va ti mu poyilela ni ku mu peka.

⁶⁴Va txi mu tsiva maso, va txi mu wotisa, va txi kha vona: “Hinga huta! I mani a nga kupeka kani?”

⁶⁵Va txi mu ruketela kambe ngu marukelo o tala.

⁶⁶Mbimo yi di nga txa, di to sengeletana dibanza da madhota a ditiko, vaphaxeli va hombe ni vabhali, ava va nga mteka va txi mu yisa Wulamuleloni kwawe.

⁶⁷Se va txi m'gela ku kha vona: “Ngako awe u di Mesiya, hi gele.” Ene a to xamula a txi khene: “Hambi ni txi mi gela, kha mi na mbi kholwa;

⁶⁸Se ni txi mi wotisa kambe, kha mi na mbi ni xamula.

⁶⁹Aniko kukhukhela ka yona yiya mbimo, Mwanana wa M'thu a na ya khalahatsha txineneni ka Txizimu txa mtamo wotshe!”

⁷⁰Konaho, votshe va to angula, va txi kha vona: “Se awe u Mwanana wa Txizimu, kani?” Ene a to va xamula a txi khene: “Mi womba tonato. Ngani!”

⁷¹Sekoko va to kwangula va txi kha vona: “Hi ngadi hi txi na lava wufakazi wa txani kambe kani? Athu hipune ha mu engisa, a txi womba ngu txisofu txakwe.”