Read chopi Luka 24 Bible Online

Luka 24 - chopi bible

Luka 24

¹Ngu ditshiku do khata da divhiki, ni mabimbi-kutxa, vavasikati va to ya diyivani, na va di ñote makha awa va nga ti longisete.

²Kambe ve mana txiwindi txi di wumbulutilwe ha txikeni ka diyiva.

³Ku ti ngako va di wulete, kha va mana txirumbi txa Mkoma Jesu.

⁴Se, va di ngadi va txi xamala ngu tona, hingani wona: Vavamna va vambidi va to humelela kwawe, va di ni tinguwo to phatima.

⁵Ngako va di tate ngu kuthava, vavasikati va to namisa tikhohe tawe, va txi wona hahatshi. Vavamna va to va gela va txi kha vona: “Mi lavela txani hagari ka vafi awu a hanyako, kani?

⁶ Kha nga ho hawa. A wukile kufani. Alakanyani ti a nga mi gela, a di ngadi Galileya:

⁷‘Mwanana wa M'thu a fanete kuningelwa manzani ka vaonhi, a txi bethelwa ha txihambanoni e tshumela e wuka ngu ditshiku da wuraru.’ ”

⁸Se ve ma khumbula mapswi akwe.

⁹Va txi khukha diyivani, va to ya xawutela timhaka tiya totshe ka va Digumi ni mmweyo ni ka votshe vamwani.

¹⁰Ava va nga bikela Vapostoli timhaka tiya, i ti Mariya wa Magdhala ni Jowana, ni Mariya, mame wa Jakobe ni vamwani va nga ti navo.

¹¹Kambe timhaketo ti ti fana ni mihahamu, se ngu konaho kha va ti tumela.

¹²Hambi keto, Pedro a to khukha e tutumela diyivani. Ngako a di namile e solela, a to wona tinguwo tokha, se e tshumelela mwani, na a txi xamala ngu ti ti nga humelela.

¹³Ngu ka donedo ditshiku, vambidi ka vagondiswa va Jesu va ti ti ya ka m'ti wu, wu dhanwako ku i Emawusi, awu wu nga ti kule ni Jerusalema txipimo txa digumi da makilometru ni mambidi.

¹⁴Kambe va ti ti tsimbila va txi bhula ngu totshe ti ti nga humelela.

¹⁵Mbimo yi va nga txi bhula ni kukanetisana, Jesu a to va hokela Ene apune, se e tsimbila kumweko navo.

¹⁶Aniko maso awe ma ti vhalekile, va si sikoti kum'ziva.

¹⁷Se ene a to va wotisa a txi khene: “Kasi ndimhaka muni toneto mi tsimbilako mi txi bhula ngu tona kani?” Se vona va to ema, na va di thuvikile.

¹⁸Se mmweyo wawe, ditina dakwe i ku Kleyopasi, a to xamula a txi khene: “Awe ngawe wekha muwa Jerusalema, u si tiziviko ati ti nga maheka ka masiku awa!”

¹⁹Se Ene a to va wotisisa a txi khene: “Ta txani, kani?” Vona va xamute va txi kha vona: “Atiya ti wombako ngu mhaka ya Jesu wa Nazareta, i nga ti mprofeti wa mtamo mu ka mithumo ni mu ka kuwombawomba, masoni ka Txizimu ni ka votshe vathu.

²⁰Vaphaxeli vathu va hombe ni vafumeli vathu, va mu ningete ti to e abaniselwa kufa ni kubethelwa ha txihambanoni.

²¹Athu hi ti ni txithembo ka ti to Ene ngene a no tirula Israyeli; aniko, hambi keto, ditshiku da nyamsi nda wuraru, kukhukhela ti di mahekile timhaka tiya.

²²Ti di mahile eto, vavasikati vokari va ka kwathu, ni vona va hi xamalisile, nguko va di tsute diyivani ni mixo ngutu,

²³kha va wu mana mmidi wakwe; se va wuyile, va txi ta womba ti to va woni txiwoniso txa tingelozi ti nga womba ku Ene wa hanya.

²⁴Ngu kota yeto, vamwanyani va nga ti ni nathu, va tsute ni vona diyivani veya mana nga ti vavasikati va nga wombisa tona. Aniko Ene kha va mu wona.”

²⁵Konaho Jesu a to va gela a txi khene: “Ehee, vathu va ku ambi engisisa ni va timbilu ta kuswela kukholwa ka totshe ti ti nga wombwa ngu vaprofeti!

²⁶Ina ti si laveki ti to Mesiya e xanisekisa tiya, se e wulela kudhumiswani kwakwe kani?”

²⁷Sekoko, a to khata ngu mibhalo ya Mosi ni ya vaprofeti e va txhamusela totshe ti ti wombawombako ngu ngene mu ka Mibhalo yotshe.

²⁸Va di hokile hafuhi ni m'ti wu va nga ti ti ya ka wona, Jesu a to maha nga wolava kupinda.

²⁹Vona va to mkombela ngu kutamarisa va txi kha vona: “Zumba ni nathu, nguko ditambo di ya kuswani, se mbusiku.” Se Ene a to wulela m'tini e zumba navo.

³⁰Se a di khalahatshile navo ha mezani, a to teka dipawu, e di katekisa, se ngu msana e di bhanda, e va ninga.

³¹Konaho maso awe ma to ambuluka, va txi m'ziva; aniko Ene a to mwalala masoni kwawe.

³²Vona va to gelana va txi kha vona: “Ina hi si pfi kufutumela mndani ka timbilu tathu, mbimo yi a nga ti womba-womba ni nathu ha nzila, na a txi hi txhamusela ni ku hi tuletela ta Mibhalo, kani?”

³³Se ka yona mbimo yile ya yimweyo, va to khukha ve wuya Jerusalema, ve ta mana ava va Digumi ni mmweyo va di tshanganile ni vakwawe,

³⁴ava va nga va gela va txi kha vona: “Ngu ditshuri, Mkoma a wukile; kambe a ti wonekisile ka Simoni!”

³⁵Se ni vona va to xawutela ati ti nga va humelela hagari ka nzila, ni ti va nga mu zivisa tona Jesu, mbimo yi a nga va khwemulela dipawu.

³⁶Se va di ngadi va txi xawutela mhaka yiya, Ene a to ti wonekisa hagari kwawe, a txi va losa, a txi khene: “Kudikha ku nave ni nanu!”

³⁷Vona va to dhuka ngutu, va txi telwa ngu dizowa, ngu kupimisa ti to njigono va txi wonako.

³⁸Se ene a to va gela a txi khene: “Mi thava txani, kambe mi kana-kana ngu txani timbiluni kwanu kani?

³⁹Wonani manza angu ni mikondo yangu. Ngani ngu wutumbu wangu. Ni aveteteni mi txi wona, nguko txigono kha txi nga ni nyama ni marambu, kufana ni ti mi ni wonisako tona, ani ni ku naso.”

⁴⁰Se a di wombile tiya, a to va komba manza akwe ni mikondo yakwe.

⁴¹Kambe, nga ti va nga sinzi kukholwisisa, ngu kutsaka ni kuxamala, a to khene kwawe: “Mina ni sakudya kona hawa, kani?”

⁴²Sekoko vona va to mninga msuna wa txihaka txo bawulwa.

⁴³Ene a to wu teka a txi dya masoni ka votshe.

⁴⁴Se a txi va gela ku khene: “Ngu ona mapswi awa ni nga mi gela, ni di ngadi ni nanu: ‘Ta ku khani ti ni fanelo ya kutatiseka totshe ti ti nga bhalelwa ani dibhukuni ka Mlayo wa Mosi ni ka Vaprofeti ni mu ka Masalmo.’ ”

⁴⁵Sekoko a to va tula mapimo awe, kasiku ve mana kupfisisa Mibhalo;

⁴⁶Se a txi khene kwawe: “Ti bhatwe ti to Mesiya a ti fanela kuxaniseka, a txi wuka ngu hagari ka vakufa ngu ditshiku da wuraru,

⁴⁷ni tiya kambe taku ku na txhumayelwa, ngu ditina dakwe, mhaka ya kutilaya ni kudivalelwa ka sionho ka otshe matiko, kukhukhela Jerusalema.

⁴⁸Se anu mi tifakazi ta mhaka yiya.

⁴⁹ Wonani: Ani ni na ya mi rumela, txi ta kwanu, txithembiso txa Tate wangu. Kambe zumbani didhoropani kala kuza mi txi ambaliswa mtamo wa kuta ngu txitimwi.”

⁵⁰ Msana keto, a va tekile a txi va yisa hafuhi ni Bhetaniya, a txi guleta manza a txi va katekisa.

⁵¹Mbimo yi a nga txi va katekisa, a to va siya, a txi guleka a txi ya txitimwi.

⁵²Vona va to mu khozela, ve tshumela va txi wuya Jerusalema, va di tate ngu litsako la hombe.

⁵³Txotshe txikhati va ti maneka Dithepeleni, va txi dhumisa Txizimu.