Read chopi Luka 3 Bible Online

Luka 3 - chopi bible

Luka 3

¹Ngu dilembe da wugumi ni mtxhanu da kufuma ka Tibheriyo Khezari, na Ponsio Pilato i di mfumeli wa Judheya, Herodha i di mfumeli wa Galileya, Filipi mnanda wakwe i di mfumeli wa Itureya, ni wa ditiko da Trakonita, Lisaniya i di mfumeli wa Abhileni;

²se Anasi ni Kayifasi i di Vaphaxeli va hombe, Txizimu txi wombawombile ka Johani, mwana Zakariya, a nga ti txiwulani.

³Se ene a to tsimbila ka dotshe ditiko da Jordhani, a txi txhumayela txibhabhatiso txa kuhunduluka, kasi kuve mana divalelo ya sionho;

⁴Nga ti ti nga bhaliswa tona dibhukuni ka mapswi a Mprofeti Isaya, a nga khene: “Dipswi da wule a kwangulako txiwulani di kha dona: Longisani nzila ya MKOMA, lulametani maphango akwe.

⁵Yotshe mikova yi na tatiselwa, ani yotshe mimango ni situnga si na khundumuselwa; se tinzila ta majikwa ti na lulametwa, ani tinzila ta sikhele ti na lulama;

⁶Votshe vathu va na wona kuhanyisa ka Txizimu.”

⁷ Se a to gela mabutho a vathu va nga txi ta ku ta bhabhatiswa ngene, a txi khene: “Lixaka la timamba, mi layilwe ngu mani kuthava kuhenya ku kutako kani?

⁸ Ngako i di toneto, humisani mihando yi yi kombisako kuhunduluka; mi nga thukeni mi alakanya mi txi khanu: ‘Hi ni tate, wathu Abrahamu’; nguko ni khani kwanu: Txizimu txi nga sikota kuhindula marigwi awa me maha vanana va Abrahamu.

⁹ Kambe nzanga yi vekilwe ha mikolotini ka mindonga; mndonga wuhi ni wuhi wu si velekiko mihando ya yinene, wu na wilwa wu rinzwa mndiloni.”

¹⁰Mabutho a vathu ma ti mu wotisa ma txi khene: “Se nji txani hi fanelako ku txi maha kani?”

¹¹Ene a to va xamula a txi khene: “Awule a ku ni mabhaji mambidi, a na abane ni wule a ku si nga ni da dimwedo; awule a ku ni sakudya a na mahe toneto nene.”

¹² Vasengisi ni vona va tile kasi ku ta bhabhatiswa, va ta mu gela ku kha vona: “M'gondisi, nji txani hi fanelako ku txi maha, kani?”

¹³Ene a to va xamula a txi khene: “Mi nga sengiseni simwani, hahanze ka sile mi nga sikelwa sona ngu mthetho.”

¹⁴Masotxhwa ni ona ma to mu wotisa ma txi kha ona: “Athu-ko, hi fanete kumaha txani, kani?” Ene a to xamula a txi khene: “Mi nga thumiseni wurena ka si i ku sa vane, mi nga mangaleleni m'thu hahanze ka mnandu, kambe tumelani kuenelelwa dwe ngu muholo wanu.”

¹⁵Ngako vathu va nga ti zumbile va txi rinzela ngu kuthemba timbiluni kwawe, ti to Johani i nga va i di ene Mesiya,

¹⁶ene Johani a to va gela votshe a txi khene: “Ani ni mi bhabhatisa ngu mati, aniko a na bwaka awule a ku ni mtamo kupinda ani, awule ani ni ku si nga ni fanelo ya kuthukunyula tingoti ta tikathula takwe; eyo a nata mi bhabhatisa ngu Moya wo Sawuleka ni mndilo.

¹⁷Manzani kwakwe ana ni txiselo txa kusangaya, a na hehera fulaho ya txithatheni kwakwe, e yi sengeleta mu txisangalani kwakwe. Se a na hisa maphumbu ngu mndilo wo mbi timeka.”

¹⁸Ngu sona siya ni simwani silayelo, Johani a ti txhumayela ka vathu Evhangeli.

¹⁹ Kambe, ngako mfumeli Herodha a di kawukilwe ngu Johani ngu timhaka ta Herodhiya, msikati wa Filipi, mwanawe, ni konaho ka totshe timwani to biha a nga ti maha,

²⁰a to engetela, txitimwi ka totshe tiya, mhaka ya kusekela Johani mkorani.

²¹Mbimo yi vathu votshe va nga gwita kubhabhatiswa, ni mbimo yi Jesu a nga ti kukhongelani, ngu msana ka kuva a di bhabhatisilwe nene, nzuma yi to tuleka.

²²Se Moya wo Sawuleka wu to txhika txitimwi kwakwe ngu txifaniso txa txituvane. Se dipswi da kuta ngu nzumani di to pfala, di txi kha dona: “Awe u Mwanana wangu wo randeka ngutu; ni vekile kwako kotshe kutsaka kwangu.”

²³Jesu a ti lava kuva ni magumi mararu a malembe, mbimo yi a nga khata kugondisa; se ngu kudinganisa ka vathu, i ti mwana Josefa; mwana Heli;

²⁴mwana Matate, mwana Levhi, mwana Meliki, mwana Janayi, mwana Josefa,

²⁵mwana Matatiya, mwana Amosi, mwana Nahume, mwana Esili, mwana Nagayi,

²⁶mwana Mahate, mwana Matatiya, mwana Semeyi, mwana Joseke, mwana Joda,

²⁷mwana Jowanani, mwana Resa, mwana Zorobhabheli, mwana Salatieli, mwana Neri,

²⁸mwana Meliki, mwana Adhi, mwana Kosana, mwana Elimadhana, mwana Heri,

²⁹mwana Joxuwa, mwana Eleyazari, mwana Jorimu, mwana Matate, mwana Levhi,

³⁰mwana Simiyoni, mwana Judha, mwana Josefa, mwana Jonamu, mwana Eliakimi,

³¹mwana Meleya, mwana Mena, mwana Matate, mwana Nathani, mwana Dhavhidha,

³²mwana Jese, mwana Obhedhi, mwana Bhowazi, mwana Sala, mwana Naasoni,

³³mwana Aminadhabhe, mwana Admini, mwana Arni, mwana Esroni, mwana Farezi, mwana Judha,

³⁴mwana Jakobe, mwana Isaake, mwana Abrahamu, mwana Tara, mwana Nakori,

³⁵mwana Serugi, mwana Ragawu, mwana Faleke mwana Ebheri, mwana Sala,

³⁶mwana Kayinana, mwana Arifaxadhe, mwana Semi, mwana Nowa, mwana Lameki,

³⁷mwana Metusela, mwana Enoki, mwana Jaredhi, mwana Mahalaleli, mwana Kayinana,

³⁸mwana Enosi, mwana Sete, mwana Adhamu, mwana Txizimu.