Read chopi Luka 4 Bible Online

Luka 4 - chopi bible

Luka 4

¹Jesu, a di tate ngu Moya wo Sawuleka, a to khukha mnamboni ka Jordhani, a txi yiswa txiwulani ngu wona Moya wo Sawuleka, ahawa a nga ya zumba mune wa magumi a masiku,

²Se e dukwa ngu Sathani. Mndani ka masiku ale, kha nga va ni kudya txilo, se mbimo yi ona ma nga guma ene a to pfa nzala.

³Sathani a to mu gela a txi khene: “Ngako u di Mwanana wa Txizimu, gela dirigwi diya di txi phinduka di maha sakudya.”

⁴ Jesu a to angula, a txi khene: “M'thu kha hanyi ngu sakudya dwe.”

⁵Sathani a to mteka a txi mu yisa mmangoni, a txi mkomba ngu txikhatianyana, yotshe mifumo ya ditiko,

⁶a txi mu gela ku khene: “Ni na kuninga wotshe wukoma wuwa ni kupfaliswa ka matiko awa, nguko si ningilwe ani, se ani na ninga wu ni ti lavako ku mninga;

⁷Ngako u txi ni khozela, sotshe siya si na lumba awe.”

⁸Jesu a mu xamute a txi khene: Khukha Sathani! “Ti bhatwe ti taku: ‘U na khozela Mkoma Txizimu txako, u txi thumela txona, dwe.’ ”

⁹Ngu msana, a to mu yisa Jerusalema, a txi ya mu veka txiroroni ka Dithepele, a txi khene kwakwe: “Ngako u di Mwanana wa Txizimu, ndaka u txi jatama hahatshi,

¹⁰ nguko ti bhatwe ti taku: ‘Ene a na leleta tingelozi takwe kasiku ti kulwela kotshe mu u tsimbilako kona.’

¹¹ Ti bhatwe kambe va txi kha vona: ‘Tona ti na ku khamukela manzani ka tona, kasiku mkondo wako wu si humbwi ngu dirigwi.’ ”

¹²Jesu a to xamula a txi khene: “Ti wombilwe tito: ‘U nga thuke u txi duka MKOMA, Txizimu txako.’ ”

¹³Se ngako a di hetile sotshe siduko, Sathani a to khukha e leka Jesu, kala yimwani mbimo.

¹⁴Sekoko Jesu a to wuya Galileya ngu mtamo wa Moya, se nduma yakwe yi txi hangalaka ka otshe maphambo a hafuhi.

¹⁵A ti ti gondisa masinagogani, a txi dhumiswa ngu votshe vathu.

¹⁶Ene a to tsula Nazareta, ahawa a nga kulela kona, se ngu toloveto yakwe, a to wulela disinagogani ngu ditshiku da Sabbata, se a txi khukha a txi ema kasi kugonda dibhuku.

¹⁷Va to mninga dibhuku da mprofeti Isaya. Mbimo yi a ngadi tula, a to mana wukhalo wu ku nga bhalwa tito:

¹⁸“Moya wa Mkoma wu txitimwi kwangu, nguko Ene a ni totile, kasiku ni ya huwelela mahungu amanene ka sisiwana, a ni rumete kuya nuwela mhaka ya kuthukunyulwa ka va vo sungwa, ni ka mabhofu kuningwa kutshumela me wona, kuya thusa ava va xaniswako,

¹⁹ni kupeka nyiwo ya dilembe do kateka da Mkoma.”

²⁰Ene a to petela dibhuku a txi di ningela ka muvhuneteli, se a txi khalahatsha. Votshe va va nga ti disinagogani va ti ti mu wonetela.

²¹Sekoko a to khata ku va gondisa a txi khene: “Nyamsi m'bhalo wuwa wu tatisekile tinzeveni kwanu.”

²²Votshe va ti ti mu fakazela ngu wunene, va txi xamala mapswi a kutala ngu kateko, ma nga txi huma ngu txisofuni kwakwe, va txi kha vona: “Ina hi nga ene mwanana wa Josefa, kani?”

²³Ene a to va gela a txi khene: “Ngu ditshuri mi na womba kwangu divingu di diku: ‘Ñanga, ti hanyise upune.’ Totshe ti hi nga tipfa va txi kha vona u ti mahile Kapernawume, ti mahe ni kona muwa ditikoni kwanu.”

²⁴Ngu msana a to sanzekela mapswi a ku khene: “Kha ditshuri na mi gela ku khani: A walo mprofeti wu a amukelwako ngu txithavo ditikoni kwawe.

²⁵Aniko kha ditshuri na mi gela kambe ti taku khani: Ka masiku a mprofeti Elija, ku ti ni tinoni to tala ditikoni ka Israyeli, mbimo yi nzuma yi nga sekwa, txipimo txa malembe mararu, ni mtxhanu wa mitxima ni wumwewo, ku txi tumbuluka paya ka dotshe ditiko.

²⁶Kambe Elija kha rumelwa ka noni ni ya yimweyo ka tona; a rumetwe ka noni ya Serepita ka Sidhoni dwe.

²⁷Va ti ti ho kambe vathu va tshekela ditikoni ka Israyeli, mbimo ya mprofeti Elixa, aniko kha basiswa ni wammweyo kwawe, hahanze ka Nahanani wa Msiriya.”

²⁸Va txi engisa mapswi awa, votshe disinagogani, va to tala ngu kuhenya.

²⁹Se va di khukhile, va to m'humisa hahanze ka didhoropa va txi mu yisa txitimwi ka mmango wu didhoropa dawe di nga ti aketwe ka wona, kasi kuya mu susumeta a txi wa hahatshi.

³⁰Aniko ene a to pinda ngu hagari kwakwe, a txi teka nzila yakwe e tsula.

³¹Se a to kwitima eya Kapernawume, didhoropa da Galileya, se e gondisa vathu ngu masiku a Sabbata.

³² Vona va ti xamala ngu kugondisa kwakwe, nguko dipswi dakwe di ti ni mtamo.

³³M'thu a ti ti ho disinagogani, awu a nga ti ni moya wa nzambwa, wa didhimoni, e kwangula ngu dipswi da hombe,

³⁴a txi khene: “Ha! Nji txani u ku natxo ni nathu, awe Jesu wa Nazareta? U tete ku ta hi lovisa, kani? Na kuziva ti to ngawe mani, awe u Msawuleki wa Txizimu.”

³⁵Se Jesu a to wu dhusa, a txi khene: “Malala, u huma kwakwe.” Ngako didhimoni di di mu ginyalatile hagari kwawe, di to huma kwakwe di sa mu maha phango.

³⁶Se ve xamala votshe, va txi wotisana va txi kha vona: “Ti womba txani tona tiya, kani? Ene a ruma mimoya ngu txikomakoma ni nyala, se yi huma!”

³⁷Konaho nduma yakwe yi pfala ka maphambo otshe a ditiko dile.

³⁸Se a to huma disinagogani e wulela nyumbani ka Simoni. Kambe mkokati wa Simoni a ti lwala ngu txindeyandeya, se ve mu kombelela kwakwe.

³⁹Se Jesu a to nama txitimwi kwakwe, a txi dhusa txindeyandeya txi mu leka; se ene kunukunuko a to wuka e va thumela.

⁴⁰Ngako di txi swa ditambo, votshe va va nga txi lwala ngu wulwati wuhi ni wuhi, va ti tiswa kwakwe, se e sanzeka manza akwe txitimwi ka mmweyo ni mmweyo, a txi va hanyisa.

⁴¹Madhimoni ma to huma ka votala, me huwelela ma txi: “Awe u Mwanana wa Txizimu.” Kambe Jesu a to ma dhusa e ma tsimba kuwombawomba, nguko ma ti m'ziva ta tinene ti to ngene Mesiya.

⁴²Ngako di di txite, a to huma eya ka wukhalo wa ekhalela, se vavangi va ti mu lava. Ngako va di mu mani, va to zama ku mu tsivela, kasiku asi khukhi kwawe.

⁴³Aniko a txi khene kwawe: “Ni fanete kuya txhumayela ka mamwani madhoropa Evhangeli ya Mfumo wa Txizimu, nguko ni rumetwe toneto.”

⁴⁴Se a txi gondisa masinagogani ka Judheya.