Read chopi Luka 6 Bible Online

Luka 6 - chopi bible

Luka 6

¹ Ngu ditshiku da Sabbata, Jesu a to pinda hagari ka tithembwe, se vagondiswa vakwe ve funya maphumbu a silo ve tsikitela ngu manza, ve dya.

²Vafarisi vokari va txi kha vona kwawe: “Mi mahela txani ati ti si faneliko kumahwa ngu Sabbata?”

³Jesu a to va xamula a txi khene: “Ina kha ma gonda ati ti nga mahwa ngu Dhavhidha ditshiku di a nga pfa nzala ene ni va a nga ti navo kani?

⁴Ene a to wulela nyumbani ka Txizimu e teka mapawu a mhamba, e dya, e ninga ni va a nga ti navo, hambiko si nga ti sa fanela kudyiwa ngu vamwani vathu, i si nga vaphaxeli dwe.”

⁵Se a txi khene kwawe: “Mwanana wa M'thu i Mkoma wa yona Sabbata.”

⁶Ngu dimwani ditshiku da Sabbata, Jesu a to wulela disinagogani a txi gondisa. Se a ti ti ho m'thu, awu diwoko dakwe da txinene di nga ti khwanyete.

⁷Vaphaxeli ni Vafarisi va to mu wonetela, kasi kuwona ti to mwendo a na hanyisa ngu Sabbata kani, ti to va na mana txi va no mu mangalela ngu txona.

⁸Kambe Jesu a txi yi ziva mialakanyo yawe, a to khene ka m'thu wu wo khwanyela diwoko: “Khukha u txi ema hawa hagari.”

⁹Sekoko a to khukha a txi ema. Jesu a to khene kwawe: “Na mi wotisa ti to ngu ditshiku da Sabbata ku lulamile kumaha tihi kani, kumaha ta tinene mwendo kumaha ta walo; kuhanyisa m'thu mwendo ku mu lovisa kani?”

¹⁰Se a to va wonisisa votshe, a txi gela m'thu wule a txi khene: “Nawuluta diwoko dako.” Ene a to mahisa toneto, se diwoko dakwe di hanyiswa.

¹¹Konaho vona va to tala ngu kuhenya, se ve wombawombisana ngu ti va no ti maha ka Jesu.

¹²Ka ale masiku Jesu a to ya mmangoni kuya khongela. Se e pila wusiku wotshe a txi khongela ka Txizimu.

¹³Ngako di di txite, a to dhana vagondiswa vakwe, se e sawula, hagari kwawe, Digumi ni Vambidi, ava a nga va raya ditina daku i Vapostoli.

¹⁴I Simoni, awu a nga m'raya ku i Pedro, ni Andreya mwanawe; ni Jakobe, ni Johani, ni Filipi, ni Bhartolomewu,

¹⁵ni Matewu, ni Tomasi, ni Jakobe mwana Alfewu, ni Simoni a dhanwako ku i Zelote,

¹⁶ni Judha mwana Jakobe, ni Judha Iskariyoti, awu a nga ningela Jesu.

¹⁷Ku ti ngako a di kwitimile navo ngu mmangoni, a to ema ha ndandalani, se dibutho da hombe da vagondiswa vakwe ni vathu vavangi va kuta ngu ka dotshe da Judheya, ni Jerusalema, ni matiko a hafuhi ni linene a Tiro ni Sidhoni,

¹⁸ve ta kwakwe ku ta mu engisa ni ku ta hanyiswa ka malwati awe. Ni va va nga txi karatwa ngu mimoya ya nzambwa ni vona va ti ti hanyiswa

¹⁹Dibutho dotshe di ti lava ku mu gwesa, nguko mtamo wu ti huma ngu kwakwe, wu txi va hanyisa votshe.

²⁰Jesu a to gula maso a txi wona vagondiswa vakwe, a txi khene: “Mi katekile anu sisiwana, nguko Mfumo wa nzumani mbwanu.

²¹Mi katekile anu mi pfako nzala konkuwa, nguko mi na khura. Mi katekile anu mi dilako konkuwa, nguko mi na seka.

²²Mi katekile anu, ngako vathu va txi mi venga, va txi mi tovela, va txi mi ruketela, va txi nyenya ditina danu nga do va ni nduma yo biha, ngu mhaka ya Mwanana wa M'thu.

²³Tsakani ka donedo ditshiku, mi txi giya, nguko nzumani, hakhelo yanu yi na va i di ya hombe; vatate vawe ni vona ngu toneto va nga mahisa tona ka vaprofeti.

²⁴Aniko, dikhombo danu anu vanyatithombe, nguko mi ku mani kale kuthavelelwa kwanu.

²⁵Dikhombo danu anu konkuwa mi nga khura, nguko mi na va ni nzala. Dikhombo danu, anu konkuwa mi sekako, nguko mi na pandiseka mi txi dila.

²⁶Dikhombo danu, ngako vathu votshe va txi mi dhumisa. Ngu toneto, vatate vawe va nga txi mahisa tona ka vaprofeti va makuhu.”

²⁷“Aniko ani na mi gela, anu mi ni engisako, ni khani: Randani valala vanu, mahani wunene ka vale va mi zondako,

²⁸wombani mapswi a wunene ka vale va mi ruketelako, khongelelani avale va mi xanisako.

²⁹Ka wule a ku pekako dithama, mu ningetele dimwani; awule a ku tekelako dibhaji, u nga mu lambele dihembe.

³⁰Awu a kombelako, mu he, aniko u nga vile awule a ku tekelako txako.

³¹ Ati mi ti dhundako ku vamwani va txi mi mahela tona, na nanu va maheleni toneto;

³²Ngako mi txi randa avale va mi randako dwe, ngu tshungulwa ka txani mi no kumana ka toneto kani? Vonhi ni vona va randa vale va va randako.

³³Se ngako mi txi mahela wunene dwe awule a mi mahelako wunene, ngu tshungulwa ka txani mi no kumana ka toneto kani? Vaonhi ni vona va ti maha toneto.

³⁴Se ngako mi txi lomba so maha dwe awule mi rinzelako kutshumetelwa ngene, mi na bongwa ka tihi kani? Vaonhi ni vona va lombisa simaha vamwani, kasiku ve tshumetelwa ngu simwani so fana.

³⁵Kasi i di anu, randani valala vanu, mahani wunene, mi txi lombisa simaha sanu ka vamwani, hambi mi si rinzeli kutshumetelwa ngu vona. Kudihelwa kwanu ku nava ka hombe, mi na va mi di vanana va Nyatxitimwi, nguko Ene wa maha wunene ka vale va si ziviko kubonga ni ka vale va tshofu.

³⁶Telwani ngu wunene, nga Tate wanu nene a ku ni wunene.”

³⁷“Mi nga lamuleni kasiku na nanu mi si lamulwi ngu Txizimu, mi nga ningeni mnandu vamwani, kasiku na nanu mi si ningwi mnandu; divalelani sionho sa vamwani, kasiku na nanu mi na divalelwa.

³⁸Hanani vamwani, kasiku na nanu mi na hiwa. Ha tikhanani kwanu ku na thelwa mpimo wa wunene, wo zindetwa, wu txi khusungelwa, wo tala wu txi thekela; nguko mpimo wu mi no pimela vamwani, ngu wonewo nanu mi no pimelwa ngu wona.”

³⁹A to va mahela txidinganiso txiya: “Ina dibhofu di nga sikota kukombisa nzila dimwani dibhofu kani? Ina kha ma na mbi wa ngu wumbidi wa ona diphalani kani?

⁴⁰ M'gondi kha pindi m'gondisi wakwe, aniko m'gondi wuhi ni wuhi a nga gondiswa ta tinene, a na fana ni m'gondisi wakwe.”

⁴¹“U wonisa kutxani txizokoro txi txi ku disoni ka mwananu, u si woniko mtanda wu wu ku disoni kwako kani?

⁴²U nga sikotisa kutxani kugela mwananu u txi khawe: ‘Mwanathu, thutha ni thavisa txizokoro disoni kwako’ na kasi awe khu woni mtanda wu wu ku disoni kwako kani? Mxengeteli, thanga ngu kuthavisa mtanda wu wu ku disoni kwako, se ngu kona u no wona kuthavisa txizokoro disoni ka mwananu.”

⁴³“Kha wu nga ho mndonga wa wunene wu ningako m'hando wo biha, kambe kha wu nga ho mndonga wo biha wu ningako m'hando wa wunene.

⁴⁴Nguko mndonga ni mndonga wu ziwa ngu mihando ya wona; kha va haphi maxanvu amu ka sihaha; kambe kha va haphi mauvha amu ka likwakwati.

⁴⁵ M'thu wamnene a humisa sa sinene ngu ka txuma txa txinene txa mbilu yakwe. Aniko m'thu wa tshofu, ngu ka txuma txa tshofu ya mbilu yakwe, a humisa so biha, nguko txisofu txa m'thu txi womba-womba ngu tile ti nga tala mbiluni.”

⁴⁶“Njani mi ni dhanako mi txi khanu: ‘MKOMA, Mkoma’, kuve kha mi mahi ti ni mi gelako tona kani?

⁴⁷Wuhi ni wuhi a tako kwangu, se a txi engisa mapswi angu, e va e ma thumisa, ni na mi kombisa awu a fanako nayo.

⁴⁸A fana ni m'thu wu a akako nyumba, awu a nga kela e hokomisa, a txi veka makhato ha dirigwini; se ngako yi txi ta ndambi, mtalo wa mati wu yi peka, kha yi dekadeki, nguko yi akilwe kha kwati.

⁴⁹Aniko awu a engisako mapswi angu, asi ma thumisi, a fana ni m'thu wu a nga aka nyumba yakwe ha divhunyeni, yi si na makhato; ngako mtalo wa mati wu txi yi peka, yi kuluveta kuwa, se kulova ka nyumba yiya ku txi va i di ka manyala.”