Read chopi Luka 7 Bible Online

Luka 7 - chopi bible

Luka 7

¹Ngako Jesu a di hetile kuwomba otshe mapswi akwe ka dibutho, a to wulela Kapernawume.

²Mmweyo wa nduna ya dizana, a ti ni txithumi, a nga ti txi dhunda ngutu, atxiya txi nga ti lwala, txi di hafuhi ni kufa.

³Ngako nduna yile yi di pfite kuwombawomba ngu Jesu, yi to rumela kwakwe madhota a Vajudha, kasi kuya kombela ti to a nate, a ta hanyisa txithumi txa yona.

⁴Mbimo yi vona va nga hoka ka Jesu, va to ya mkombela ngutu va txi kha vona: “Ana ni fanelo ya kumahelwa eto,

⁵nguko wa dhunda va ka kwathu, kambe ngene a nga hi akela disinagoga.”

⁶Se Jesu a to tsula navo. Ngako a di hafuhi ni kuhoka m'tini ka nduna, yona nduna yi to rumela vangana kuya womba, va txi kha vona: “MKOMA, u nga ti xuphe u hoka kheno, nguko kha ni nga ni fanelo ya kuva u txi ta wulela nyumbani kwangu;

⁷se kha na tipfa ni di ni fanelo ya ku ku tela, aniko womba dipswi dimwedo dwe, kasiku txithumi txangu txi na hanya.

⁸Nguko ani ni ku m'thu wo fumwa ngu vamwani, nina ni masotxhwa, aawa nani ni ma fumako. Ngako ni txi gela dimwedo ka ona, ni txi khani: ‘Tsula’, dona da tsula; ka dimwani, ni txi khani: ‘Ngono kheno’, da ta, ka txithumi txangu, ni txi khani: ‘Thuma tiya’ txa ti maha.”

⁹Ngako Jesu a txi pfa mapswi awa, a to xamala, a txi tshembereka a txi wonetela vathu vale va nga txi mu londetela, a txi khene kwawe: “Na mi gela ni khani: Kha ni nzi kumana likholo la hombe lo nga liya, hambi ka vathu va Israyeli.”

¹⁰Mbimo yi avale va nga ti rumilwe va nga tshumela va txi ya m'tini, va to ya mana txithumi se txi txi hanya wutomi wa ditshuri.

¹¹Msana keto, ene a to tsula ka didhoropa di dhanwako ku i Nayimi. Vagondiswa vakwe ni vathu vavangi, va to tsula nayo.

¹²Mbimo yi a nga hoka ha diphangoni ka didhoropa, a to manana ni vathu, va nga txi huma, va txi heleketa m'thu wa kufa, awu i nga ti mwanana wammweyo ekha wa mame wakwe wa noni; vavangi va kuhuma didhoropani va ti kumweko nayo mame wule wa noni.

¹³MKOMA, mbimo yi a nga mu wona, a to mpfela wusiwana, a txi khene kwakwe: “U nga dile!”

¹⁴Sekoko, a txi tshuketa hafuhi, a txi gwesa dibhokiso da txirumbi, se avale va nga ti txi rwala va to ema. Konako, Ene a to womba a txi khene: “Dijaha, ni khani: Wuka!”

¹⁵Konako, mufi a to khalahatsha a txi khata kuwombawomba. Se Jesu a to mningela ka mame wakwe.

¹⁶Votshe va to telwa ngu kuthava ngutu, va txi dhumisa Txizimu, va txi kha vona: “Mprofeti wa hombe a humelete hagari kwathu, Txizimu txi endete vathu va txona.”

¹⁷Se mahungu awa ma to hangalaka ni dotshe ditiko da Judheya ni ka otshe maphambo a hafuhi.

¹⁸Vagondiswa va Johani va to xawutela totshe timhaka tiya.

¹⁹Se Johani a to dhana vagondiswa vakwe va vambidi, e va ruma ka Jesu, kuya wotisa va txi kha vona: “Ngawe awu a tako mwendo hi ngadi hi verela mmwani kani?”

²⁰Vathu vava, ngako va di hokile kwakwe, va to ya kha vona: “Johani Mubhabhatisi a hi rumile kwako, a txi khene: Ngawe awu a tako mwendo hi ngadi hi verela mmwani kani?”

²¹Ka txonetxo txikhati, Jesu a txi hanyisa votala ka malwati ni ka mipando ni ka mimoya yo biha, e ninga kuwona ka mabhofu.

²²Se Jesu a to va xamula a txi khene: “Tsulani mi ya gela Johani ati mi nga ti wona ni ti mi nga tipfa; mabhofu ma wona, silima sa tsimbila, va tshekela va basiswa, maphanzeve ma engisa, vafi va wuswa, sisiwana sa txhumayelwa Evhangeli.

²³Kambe a katekile awu a no mbi mana txikhuvekiso ngu mhaka yangu.”

²⁴Ava va nga ti rumilwe ngu Johani, ngako va di khukhile, Jesu a to khata kuwombawomba ngu ta Johani ka vathu, a txi khene: “Mi ti ya wona txani txiwulani kani? I ti litshava li li nga txi dekadekiswa ngu moya kani?

²⁵Kasi mi ti ya wona txani kani? I ti m'thu wu a nga bomba kani? Wonani, ava va ambalako tinguwo ta wubombi ni va va dyako so tshamba, va zumba tinyumbani ka vakoma.

²⁶Se mi ti ya wona txani kani? I ti mprofeti kani? Ina! Ani na mi gela: Ngu wu a palako mprofeti.

²⁷Ngene wu, ku nga bhalwa timhaka takwe, va txi kha vona: ‘Wona, ni ruma mtumi wangu masoni kwako; wu na kulongisela tinzila.’

²⁸Se ani ni khani, hagari ka va va nga velekwa ngu vavasikati, kha nga ho wa hombe kupinda Johani; kambe awu i ku wam'dotho Mfumoni ka Txizimu mbwa hombe kupinda ene.”

²⁹ Votshe va nga ti mu engisa, hambi vakhupisi ni vona va dhumisile kululama ka Txizimu, ve bhabhatiswa ngu txibhabhatiso txa Johani.

³⁰Kambe Vafarisi ni vagondisi va mlayo va nyenyile makungo awa Txizimu txi nga ti nawo kwawe, nguko va nga lamba kubhabhatiswa ngu ngene.

³¹Jesu a to engeta a txi khene: “Vathu va liveleko liya ni na va fananisa ni txani kani? Va fana ni txani kani?

³²Va fana ni vanana va va zumbako mtendelani, va dhananako va txi kha vona: ‘Hi mi vetete titshodi, kambe kha ma sinya, hi salukile aniko kha ma dila.’

³³Nguko Johani Mubhabhatisi a tile, asi dyi sakudya, asi seli vhinya, kambe mi txi khanu: ‘Ana ni didhimoni.’

³⁴Mwanana wa M'thu, ene a tile, wa dya ni kusela, mi txi khanu: ‘Hi nga wonani: Nyalimito ni didevi, mndoni wa vakhupisi ni vaonhi.’

³⁵Aniko wuzivi wu lulamilel masoni ka vanana va va wu amukelako.”

³⁶Mfarisi wokari a to dhana Jesu kutadya nayo sakudya. Ene a to wulela nyumbani ka wule wa mfarisi, a txi khalahatsha ha mezani ka sakudya.

³⁷ Konaho ku to bwaka wamsikati wa kona didhoropani mule, awu i nga ti txionhi. A tile ngu kupfa ti to Jesu a ha sakudyani nyumbani ka mfarisi; a to neha txikadyana txa kuwumbwa ngu mraka wo basa, txi di ni mafura o bhumula.

³⁸Se a di zumbile ngu msana kwakwe, a txi dila, a to khata ku nakanisa mikondo ya Jesu ngu mirongo, a txi yi bahulela ngu misisi, a txi yi pswopswa, ngu msana a txi yi totela mafura ale o bhumula.

³⁹Ngako a txi ti wona, mfarisi wu a nga mu dhanela sakudya, a to pimisa mbiluni kwakwe, a txi khene: “Idiku mamowa wo va mprofeti, a ndi na m'ziva wu wamsikati a m'gwesako, ti to i mani, nguko ene njionhi.”

⁴⁰Aniko Jesu a to angula a txi khene: “Simoni, ni na ni dipswi ni nawe.” Ene a ti khene: “Womba, M'gondisi.”

⁴¹Jesu a ti khene: “Mtxenekisi wa male a ti ti ni vathu vambidi, va nga ti ni sikweneti kwakwe: Mmweyo a ti ti ni txikweneti txa 500 wa madhenari, se mmwani a ti ni txikweneti txa mtxhanu wa magumi.

⁴²Ngako va nga ti si nga ni so diha ngu sona, a to va divalela sikweneti sawe votshe vavambidi. Se ngu wuhi ka va vavambidi, a no va ni lirando ngutu kwakwe kani?”

⁴³Simoni a nje khene: “Ani ni pimisa ti to ngu wule a nga divalelwa ngutu kupinda mmwani.” Se Jesu a txi khene kwakwe: “U xamute ditshuri.”

⁴⁴Se a txi tshembereka, a txi wonetela awule wamsikati, a txi gela Simoni ku khene: “Wa mu wona wu wamsikati, kani? Ni wulete nyumbani kwako, khwa ni ha mati a kusamba mikondo, aniko ene a nakanisile mikondo yangu ngu mirongo yakwe, a txi yi bahulela ngu misisi yakwe.

⁴⁵Awe khwa ni pswopswa, kambe ene, kukhukhela ni wulela hawa, kha leki ku ni pswopswa mikondo.

⁴⁶Awe khwa ni tota msungo ngu mafura, aniko ene a ni totile mikondo yangu ngu mafura o bhumula.

⁴⁷Ngu mhaka ya toneto, na kugela ku khani: A divaletwe sionho sakwe sasingi, nguko a kombile lirando la hombe ngutu. Aniko awule a nga divalelwa sa sidotho, wo va ni lirando la lidotho.”

⁴⁸Msana keto, a to gela wule wamsikati a txi khene: “U divaletwe sionho sako.”

⁴⁹Kunukunuko, ava a nga ti navo ha mezani ka sakudya va to womba timbiluni kwawe va txi kha vona: “I mani ene wu a sikotako ni kudivalela vathu sionho sawe kani?”

⁵⁰Aniko ene a to gela wu wamsikati, a txi khene: “Likholo lako li ku hanyisile; tsula ngu kudikha.”