Read chopi Luka 8 Bible Online

Luka 8 - chopi bible

Luka 8

¹Msana ka toneto, ene a ti tsimbila madhoropani ni mu mitini a txi txhumayela ni kunuwela Evhangeli ya Mfumo wa Txizimu.

² Vapostoli va Digumi ni Vambidi va ti kumweko nayo, kufana ni vavasikati vokari, va nga ti hanyisilwe ka mimoya yo biha ni ka mipando. Ka vona ku ti ni Mariya, a dhanwako ku mbwa Magdhala, awu ma nga humiswa kwakwe mtxhanu wa madhimoni ni mambidi;

³Jowana, msikati wa Kuza, nduna ya Herodha; ni Suzana ni vamwani vavasikati, va nga ti ti va vhuna ngu silo sawe.

⁴Ngako dibutho da hombe di di sengeletanile kwakwe, kumweko ni vathu va va nga ti tile ngu ka didhoropa ni didhoropa, Jesu a to womba-womba navo ngu txidinganiso, a txi khene:

⁵“Mphayi a humile kuya phaya; ku ti ngako a txi phaya, timbewu timwani ti to wela ha nzila, ti txi kandetelwa ngu vathu, se sinyana sa txitimwi si ti jokotela totshe.

⁶Timwani ti to wela ha marigwini, se ngako ti di mite, ti to wuna ngu kupwata thomu.

⁷Timwani ti wela ha mipani, se mipa yi kula kumweko nato, yi ti kura, ti fa.

⁸Aniko timwani ti to wela ha mafuni ka kunene, ti txi kula, ti veleka ngu dizana.” Ngako a di wombile-to, a to huwelela a txi khene: “Awu a ku ni tinzeve ta kuengisa a na engise.”

⁹Se vagondiswa vakwe va to mu wotisa va txi kha vona: “Txidinganiso txiya txi womba txani kani?”

¹⁰Ene a ti khene kwawe: “Anu mi ningilwe kuziva misisalo ya Mfumo wa Txizimu, kambe vamwani va gelwa ngu sidinganiso, tito, hambi va txi wona, va si wonisisi, hambi va txi engisa, va si ti pimi.”

¹¹“Aniko txhamuselo ya txidinganiso txiya ngu yiya: Mbewu ngu Dipswi da Txizimu.

¹²Ava va ku ha nzila, ngu vale va nga pfa dipswi, se Sathani a ta thavisa dipswi timbiluni kwawe, kasi va si kholwi ni kuhanyiswa.

¹³Ava va ku ha marigwini, ngu va va nga engisa dipswi, ve di amukela ngu kutsaka, kambe ve pwata mikoloti, va txi tumela ngu mbimoanyana; se ngu mbimo ya txiduko, va rereka.

¹⁴Ati ti nga wela mipani, ngu va va nga engisa dipswi, aniko, va di ngadi ve tsula masoni, va to di leka di kamaretwa ngu kuvilela ni kudhunda tithomba, ni kutitsakela ka wutomi wuwa, se va si ngadi ve veka mihando ya kuvitwa.

¹⁵Ati ti nga wela ha mafuni ka kunene, ngu va va nga engisa Dipswi ngu mbilu ya yinene ni yo lulama, ve di xayisa, ve veleka mihando ngu kutimisela.”

¹⁶ “Kha ku na m'thu wuwa a lumekako dilambu, a txi di fenengeta ngu txirundu, mwendo ku di veka hahatshi ka m'bhedhu; aniko a di hayeka ha ka txipande, ti to ava va wulelako ve wona kuwonekela.

¹⁷ Nguko kha ku na txilo txi ku kusisalani, txi na ku ambi wonekiswa, kambe kha ku na txilo txo siswa txi no mbi humelela kubasani.

¹⁸Ngu konaho, ti engiseni kha kwati ati ni mi gelako. Nguko awuwa a ku naso, a na engetelwa; aniko awu a ku si nga naso, a na tekelwa ni si a nga ti si themba ku a naso.”

¹⁹Mame wa Jesu ni vanawe va to ta kwakwe, aniko ve tandeka ku mtshuketela ngu mhaka ya kutala ka vathu.

²⁰Se va to mu zivisa va txi kha vona: “Mame wako ni vananu va emile hahanze, va lava ku kuwona.”

²¹Kambe ene a to xamula a txi khene kwawe: “Mame wangu ni vanathu ngu va va engisako Dipswi da Txizimu, ve di thumisa.”

²²Ka dimwani ditshiku a to wulela ngalavani ni vagondiswa vakwe, se a txi khene kwawe: “He tshawunyeteni digova diya hi ya mtxhatuko ka dona.” Se va to khukha.

²³Va di ngadi va txi tsimbila, ene a to otela; se ku to vhiluka mkutxu wa diphuho da hombe digovani, ngalava yi txi lava kutala ngu mati; se va ti ha phangoni.

²⁴Se va to tshuketela ve mu wusa va txi kha vona: “M'gondisi, ha lova!” Se a to wuka a txi ema, a txi malata moya ni kuvhiluka ka mkutxu wa mati. Se si malate, ku txi va ni kutenga.

²⁵Se a txi khene kwawe: “Kukholwa kwanu ku hani kani?” Vona va to telwa ngu dizowa, ve gelana va txi kha vona: “I mani wu a malatako moya ni linene, si txi mu engisa, kani?”

²⁶Se va to hoka ditikoni ka Gerasa, di nga dingetana ni Galileya.

²⁷Ku ti ngako Jesu a di jatamile hahatshi, a to manana ni wamwamna wa didhoropa dileya, awu a nga ti wuleletwe ngu madhimoni, na a sa ambala txilo: Awu kambe a nga si zumbi nyumbani, aniko a ti hanyela mayivani.

²⁸Ku ti ngako a di woni Jesu, a to kwangula e ti wisa hahatshi masoni kwakwe, a txi womba ngu dipswi da hombe a txi khene: “I mhaka muni ni ku nayo ni nawe, Jesu, Mwanana wa Txizimu Nyatxitimwi? Na ku kombela, u nga ni xanise.”

²⁹Ene a wombile tiya nguko Jesu a ti rumile moya wu wo biha kuhuma ka m'thu wule. Moya wule i ti kale wu txi mu xanisa, a txi zumba a di sungilwe ngu titxhini ni makhodha, kambe ene e si bhenula e rethelwa txiwulani ngu didhimoni.

³⁰Jesu a mu wotisile a txi khene: “U mani ditina dako kani?” Ene a txi khene: “Ni Txikwata.” Nguko madhimoni o tala ma ti wulete kwakwe.

³¹Se ona ma to mkombela ti to asi ma yisi diphalani ko mbi gwita.

³²Mtxhambi wa hombe wa tikhumba wu ti ti ho mmangoni, wu txi dya. Se madhimoni ma to mkombela ti to e tumela ku ma txi wulela ka tona. Se ene a to ma tumelela.

³³Se madhimoni ma to huma ka m'thu wule, me wulela tikhumbani, se mtxhambi wa tikhumba wu to tutuma wu ya ti vinza lineneni, wu mbembemela konamo.

³⁴Vadyisi va mtxhambi, ngako va txi wona ti ti nga humelela, va to tutuma veya zivisa mhaka yiya didhoropani ni tithembweni.

³⁵Se vathu va to huma veya wona ti ti nga humelela. Ku ti ngako va txi hoka ka Jesu, va to mana m'thu wuwa madhimoni ma nga huma kwakwe, a di khalahatshile minengeni ka Jesu, a di ambate, a di ni kupima ka kunene, se ve thava ngutu.

³⁶Ava va nga wona timhaka tiya va to xawutela ti to a hanyisile kutxani awu a nga ti ni madhimoni.

³⁷Se vathu votshe va ditiko da Vagerasa va to kombela Jesu ti to e khukha ditikoni kwawe, nguko va ti ni kuthava ka hombe. Se Jesu a to wulela ngalavani e tshumela.

³⁸Se m'thu wuwa madhimoni ma nga huma kwakwe, a to mkombela kutsula nayo, aniko Jesu a mu tshumetile a txi khene:

³⁹“Tshumelela ka va ka kwanu, u txi ya xawutela totshe ti Txizimu txi nga ku mahela tona.” Se ene a to tsimbila ka dotshe didhoropa e huwelela totshe ti Jesu a nga mmahela tona.

⁴⁰Ku ti ngako Jesu a di tshumete, a to amukelwa ngu dibutho, nguko votshe va ti m'verete.

⁴¹Se kutota wamwamna wu a dhanwako ku i Jayiro, awu i nga ti mthangeli wa disinagoga, a txi ti wisa minengeni ka Jesu, e mkombela ku e wulela nyumbani kwakwe

⁴²nguko a ti ni mwanana wa txihoranana wammweyo ekha, wa tanga yo lava kuhoka ka digumi da malembe ni mambidi, a nga ti hafuhi ni kufa.

⁴³Jesu a di ngadi a txi ya kona, vathu votala va to mu kamanyeta. Se wamsikati wokari, a nga ti ni malwati a lingolengole, awu a nga lwala digumi da malembe ni mambidi, a txi heta male yakwe yotshe ngu vadhokodhele, aniko ni wammweyo kha sikota ku mu hanyisa.

⁴⁴A to tshuketela Jesu ngu msana, e gwesa wuziva wa nguwo yakwe, se wulwati wakwe wu ema konako.

⁴⁵Jesu a to wotisa a txi khene: “I mani a nga ni gwesa kani?” Votshe va kanetile. Pedro a ti khene: “M'gondisi, u randetwe ngu dibutho, di txi ku kamanyeta.”

⁴⁶Kambe Jesu a ti khene: “Ku ni m'thu wu a nga ni gwesa, nguko ni ti pfite ngu mtamo wu nga huma kwangu.”

⁴⁷Sekoko ngako wamsikati a di woni ti to a tumbutwe, a to ta ngu kudhudhumela, a ta khizama minengeni kwakwe, a txi ti landula apune masoni ka vathu votshe, na a txi womba tiya a nga mu gwesela tona ni kuhanyiswa kwakwe ngu txikuluveta txa konako.

⁴⁸Se Jesu a txi khene kwakwe: “Mwanangu, kutumela kwako ku ku hanyisile; tsula ngu kudikha.”

⁴⁹Ku ti ngako a di ngadi a txi womba-womba, ku to bwaka mmwani wa kuta ngu nyumbani ka mthangeli wa disinagoga, a txi khene kwakwe: “Mwanana wako a fite. U nge ngadi u txi karata M'gondisi.”

⁵⁰Aniko Jesu, ngako a txi tipfa a to khene kwakwe: “U nga thave, tumela dwe. A na hanya.”

⁵¹Ku ti ngako a di hokile m'tini, kha tumelela ni wammweyo kuwulela nayo nyumbani, hahanze ka Pedro ni Johani ni Jakobe, kumweko ni tate ni mame wa mwanana wule wa txihoranana.

⁵²Kambe va ti ha masalukoni, va txi dila ngu ngene. Se Jesu a txi khene: “Mi nga dileni. Kha fa, a to otela.”

⁵³Se vona ve mu seka, nguko va txi tiziva ku a fite.

⁵⁴Aniko ene a to mñola ngu diwoko, e guleta dipswi, a txi khene: “M'horana, wuka.”

⁵⁵Konako, moya wakwe wu to tshumelela kwakwe, se ene kunukunuko a to wuka. Se Jesu a to va gela ve mninga sakudya.

⁵⁶Se vaveleki vakwe va to xamala ngutu. Se ene a to va leleta ku va si geli m'thu ati ti nga humelela.