Read chopi Luka 9 Bible Online

Luka 9 - chopi bible

Luka 9

¹Jesu, adi sengeletile vale va digumi ni vambidi, a to va ninga mtamo ni wukoma txitimwi ka madhimoni otshe ni mtamo wa kuhanyisa malwati.

²Se e va ruma kuya txhumayela Mfumo wa Txizimu ni kuhanyisa valwali.

³ A txi khene kwawe: “Ngu sa nzila, mi nga thukeni mi longa txilo, hambi i di ndonga, msava mwendo mbuva, mwendo male; hambi kuva ni mabhaji mambidi.

⁴Nyumba yihi ni yihi mi no wulela ka yona, zumbani ka yona kala kuza mi khukha.

⁵Kambe ava va si mi amukeliko, ngako mi txi huma mtinimo, huphutani lithulu la mikondo yanu, kasiku ti na maha wufakazi kwawe.”

⁶Koneho va to huma, ve tsimbila ngu mkhokhola ni mkhokhola, na va txi gondisa Evhangeli, ka otshe makhalo ve hanyisa valwali.

⁷ Mfumeli Herodha a to pfa totshe ti ti nga mahwa ngu Jesu, se a txi kanganyiseka ngutu, nguko vamwani va ti ti kha vona: “I Johani a nga wuka ngu ka vakufa.”

⁸Vamwani va txi kha vona: “I Elija a nga humelela,” vamwani va txi kha vona: “I mmweyo wa vaprofeti va kale a nga wuka ka vakufa.”

⁹Kambe Herodha a txi khene: “I di Johani, ni mu wite msungo; i nga va mani wuwa ni pfako timhaka takwe, to nga tiya kani?” Se e vilela ku mu wona.

¹⁰Ku ti ngako vapostoli va di tshumete, va to ya gela Jesu totshe ti va nga ti maha, se ene a txi va teka eya navo, vona vokha, ka diphambo da didhoropa di di dhanwako ku i Bhetsayidha.

¹¹Ngako mabutho ma di ti zivile, ma to mu londeta, se ene a di va amukete, a to womba-womba navo ngu timhaka ta Mfumo, e hanyisa va va nga txi vilela kuhanyiswa.

¹²Ditambo di txi ya kuswani, se va Digumi ni Vambidi va to mtshuketela va txi mu gela ku kha vona: “Tsulisa dibutho da vathu, kasiku ve tsimbila ngu mitini ni tinyumbani, va na mana sakudya ni wukhalo wa kuotela nguko ahawa hi ku kona njiwulani.”

¹³Ene a to va gela ku khene: “Va ningeni anu sakudya.” Vona va xamute va txi kha vona: “Ho va ni mtxhanu wa mapawu ni sihaka simbidi kugwita. Hahanze ka kuva hi tsula athu hi txi ya xava sa kudingana dibutho diya dotshe.”

¹⁴Kunene vona i ti mtengo wa hafuhi ka 5.000 wa vavamna; Jesu a to gela vagondiswa vakwe a txi khene: “Va geleni ve khalahatshela ngu mitxawa ya mtxhanu wa magumi.”

¹⁵Vona va mahisile toneto, va txi va gela ve khalahatshela votshe.

¹⁶Jesu a to teka mapawu a mtxhanu ni sihaka sile sa simbidi, a txi gula maso a txi wona nzumani, a txi si katekisa, a txi si bhandelela, a txi si ningela ka vagondiswa, kasiku vona ve phakela dibutho;

¹⁷Votshe va dyite va txi khura; msana keto, va tshumete ve rolela asi si nga sala: Digumi da sirundu ni simbidi.

¹⁸Ka ditshiku dokari, ngako Jesu a txi khongela ka wukhalo wa kusisaleka, vagondiswa vakwe va ti kumweko nayo, se ene a txi va wotisa ku khene:

¹⁹ “Vathu va kha vona ngani mani kani?” Vona va to xamula va txi kha vona: “Va u Johani Mubhabhatisi, se vamwani va kha vona u Elija, vamwani kambe va kha vona u mmweyo wa vaprofeti, a nga wuka ngu ka vakufa.”

²⁰Ene a to khene kwawe: “Anu-ko, mi khanu ngani mani kani?” Pedro a to xamula a txi khene: “U Mesiya wa Txizimu.”

²¹Ene Jesu a to va layisisa ta tinene ti to va si geli m'thu ni wammweyo,

²²A txi txhamusela ku khene: “Mwanana wa M'thu a fanete kuxaniseka ngutu, a txi vengelwa ngu madhota a ditiko ni vaphaxeli va hombe ni vabhali, a txi ningelwa kuya dawa, aniko ngu ditshiku da wuraru, a na wuka.”

²³ Se a txi gela votshe ku khene: “Ngako m'thu a txi lava ku ni londisela, a na ti lambe apune, a txi pakata txihambano txakwe, ditshiku ni ditshiku, a txi ni londisa.

²⁴Nguko awu a lavako kuponisa wutomi wakwe, a na wu mwalata; ani wu a mwalatako wutomi wakwe ngu mhaka yangu, a na wu hulukisa.

²⁵Ngu toneto, ti vhuna txani ka m'thu kumana ditiko dotshe, a txi mwalalelwa ngu wutomi wakwe mwendo ku ti lovisa kani?

²⁶Nguko ni wuhi a telwako ngu tingana ngu ngani, ni timhaka tangu, Mwanana wa M'thu a na telwa ngu tingana ngu ngene, mbimo yi a no wuya, wudhumoni kwakwe ni ka Tate, ni ka tingelozi to sawuleka.

²⁷Ni tsanisile ni khani kwanu: Va ho vamwani va nga ema kona hawa, ava va no mbi gweswa ngu lifo, va sinzi kuwona Mfumo wa Txizimu.”

²⁸Msana ka timhaka tiya na masiku ma txi lava kuva a mtxhanu ni mararu, Jesu a to teka Pedro ni Johani ni Jakobe, e kwela navo mmangoni kuya khongela.

²⁹Ku ti ngako a txi khongela, khohe yakwe yi to phinduka, tinguwo takwe ti basa, ti txi phatima.

³⁰Se ku to woneka vavamna vambidi, va nga txi womba-womba nayo, i ku Mosi ni Elija,

³¹ava va nga woneka ngu kuphatima, va txi womba-womba ngu ti a no khukhisa tona ngu Jerusalema.

³²Kambe Pedro ni va a nga ti navo, va ti nemelwa ngu wukohe. Mbimo yi va nga wuka, va to wona kuphatima kwakwe, ni vavamna va vambidi ava va nga ti emile nayo.

³³Ngu txikhati txi va nga txi lava kuhambana nayo, Pedro a to khene ka Jesu: “MKOMA, ta tshura ngako hi txi zumba kona hawa; hi tumelele hi txi aka midhuti miraru; wumwani mbwako, wumwani mbwa Mosi, wumwani mbwa Elija.” Kambe asi ti zivi ati a nga txi womba-womba tona.

³⁴A di ngadi a txi womba-womba, direfu di to ta, di ta va fenengeta; va di direfuni, va to telwa ngu dizowa vagondiswa.

³⁵Di to huma dipswi direfuni di txi kha dona: “Awuwa i Mwanana wangu wa kusawuleka. Mu engiseni.”

³⁶Di di ngadi di txi pfala dipswi diya, Jesu a to maneka i di ene ekha. Keyo masiku vagondiswa va to malala, va si geli m'thu ati va nga ti wona.

³⁷Ngu ditshiku di di londetako, mbimo yi va nga txi kwitima ngu mmangoni, dibutho da hombe di to mu hingeta.

³⁸Se wamwamna a nga ti hagari ka dibutho, a to kwangula, a txi khene ka Jesu: “M'gondisi, na ku kombela, ngono u ta wona mwanana wangu, nguko ngene ekha ni ku nayo.

³⁹Ngako moya wu txi mñola, koneko wo kwangula, a txi dhudhumela, e pupuma diphutu, wu txi mu ginyalata, wu si tumeli ku mu leka, hambiko wu nga mu karata ngutu.

⁴⁰Ni kombete ka vagondiswa vako, ni txi khani va na wu tovele, aniko va tandekile.”

⁴¹Jesu a to xamula a txi khene: “Anu livelekonu la kwa mbi kholwa ni lo gombonyeka, ni na va ni nanu ni kulaphisa mbilu kala ditshiku muni kani? Tisa mwanana wako hawa.”

⁴²A di ngadi a txi tshuketa, didhimoni di to mu ginyalata, di txi mu dhudhumelisa, kambe Jesu a to dhusa moya wule wa nzambwa, se e hanyisa mwanana e mningela ka tate wakwe.

⁴³Se votshe va to xamala mtamo wu wa hombe wa Txizimu. Ku ti ngako votshe va txi xamala totshe ti Jesu a nga ti maha, ene a to gela vagondiswa vakwe a txi khene:

⁴⁴“I di anu, engisani ta tinene mapswi awa: Mwanana wa M'thu a na ningelwa manzani ka vathu.”

⁴⁵Kambe vona kha va ma manisisa mapswi awa: Ma ti sisate kwawe; se ve thava ni ku mu wotisa ati ma txhamuselako tona.

⁴⁶Se ku to humelela kukanetisana hagari kwawe, kasi kuziva ti to wa hombe wawe i mani.

⁴⁷Ku ti ngako Jesu a txi wona mialakanyo ya timbilu tawe, a to teka tximwananana e txi veka hafuhi kwakwe, se a txi khene kwawe:

⁴⁸ “Wuhi ni wuhi a amukelako tximwananana txiya ngu ditina dangu, wa ni amukela; se awu a ni amukelako, a amukela wu a nga ni ruma. Nguko awu i ku wam'dotho hagari kwanu motshenu, ngene i ku wa hombe.”

⁴⁹Se Johani a to womba a txi khene: “M'gondisi, hi woni m'thu wokari a txi tovela madhimoni ngu ditina dako, se hi mtsimbile, nguko kha hi londisi.”

⁵⁰Jesu a txi khene kwakwe: “Mi nga mu tsimbeni, nguko awu asi lwiko ni nanu, a ema ni nanu.”

⁵¹Ngako ma txi hoka masiku a kuguletwa kwakwe, Jesu a to tsana a txi teka nzila ya kuya Jerusalema.

⁵²A txi rumela mitumi masoni kwakwe. Vona va to khukha ve tsula, veya m'tini ka Vasamariya kasi kuya mu lulamisela sotshe kona.

⁵³Aniko Vasamariya kha va mu amukela, nguko a nga txi endela Jerusalema.

⁵⁴Va di woni tiya vagondiswa Jakobe ni Johani, va to kha vona: “MKOMA, wa ti lava hi rumela mndilo wu txi txhika ngu nzumani wuta va fuvisa kani?”

⁵⁵Aniko ene a to tshembereka e va kawuka, a txi khene: “Kha mi wu zivi moya wu mi ku nawo. Nguko Mwanana wa M'thu kha tela ku ta lovisa vathu, aniko a tete ku ta va hulukisa.”

⁵⁶Se va to huma veya ka wumwani m'ti.

⁵⁷Mbimo yi va nga txi tsimbila, m'thu wokari a to gela Jesu, hanzila, ku khene: “Ani ni na kulondisela kotshe mu u no tsimbilela kona.”

⁵⁸Jesu a to mu xamula a txi khene “Vanyapwe va na ni mibhala, sinyana ni sona si na ni sisaka; aniko Mwanana wa M'thu kha nga ni ko khigetela kona msungo.”

⁵⁹Se a txi gela mmwani ku khene: “Awe ni londise.” Eyo a to xamula ku khene: “Ni tumelele ni ya thanga ngu kutshotsha tate wangu.”

⁶⁰Jesu a ti khene kwakwe: “Leka vafi va txi kelela vafi vawe. Kambe awe tsula u txi ya zivisa timhaka ta Mfumo wa Txizimu.”

⁶¹Mmwani nene a m'gete ku khene: “Ani ni na kulondisela, MKOMA, aniko ni tumelele ni ya thanga ngu kusatisana ni vale va ku nyumbani kwangu.”

⁶²Aniko Jesu a to mu angula ku khene: “Awu a ñolako digejo, e tshembereka a txi wonetela msana, kha nga ni fanelo ya Mfumo wa Txizimu.”