Read chopi Dhewuteronome 1 Bible Online

Dhewuteronome 1 - chopi bible

Dhewuteronome 1

¹Aawa, mapswi ale Mosi a nga xawutela ka votshe va ka Israyeli, mtxhatuko ka Jordhani, txiwulani, ka libala li ku masoni ka Sufe, ngu hagari ka Parani, ni Tofela, ni Labhani, ni Hazerote, ni Dhizahabhi.

²Mnava wa digumi da masiku ni dimwedo a kutsimbila ngu nzila ya mmangoni ka Seyiri, kukhukhela Horebhi kala Kadhesi-Bharineya.

³Se ku to maheka taku, ka dilembe da mune wa magumi, ka ditshiku do khata ka mtxima wa digumi ni wumwewo, Mosi a wombile ka vanana va ka Israyeli totshe ti MKOMA a nga mleleta, kasi ku e va gela,

⁴ atiya ti mahekile msana ka kuva a di xute Sihoni, mfumeli wa Vaamori, avale va nga ti akile Hesibhoni, ni Oge, mfumeli wa Bhasani, a nga ti akile Axitaroti, ni Edreyi.

⁵Ngu mtxhatuko ka Jordhani, ditikoni ka Mowabhi, Mosi a to khata kuxawutela mlayo wuwa, a txi khene:

⁶“MKOMA, Txizimu txathu, a wombawombile mmangoni ka Horebhi, a txi khene: Anu mi zumbile ngutu ka wuwa mmango.”

⁷Tshumelani mi txi tsula mmangoni ka Vaamori, ni ka votshe avale va nga aka hafuhi kwawe, ni libalani ni mmangoni ni mkovani, ni wulambwe, ni lineneni, ni ditikoni ka Vakanana, ni Libhanoni, kala mnamboni wa hombe, i ku mnambo wa Ewufrate.

⁸Ngu diya ditiko di ani ni nga mi ninga; wulelani ka dona mi txi di fuma, adi MKOMA, ngu txixambanyo, a nga thembisa ku di ningela ka vatate vanu, Abrahamu, Isaake ni Jakobe, se ngu msana kwawe di na va i di da situkulwana sawe.

⁹Ka yoneyo mbimo, ani ni mi gete ni txi khani: “Nokha, kha ni sikoti ku mi thangela motshe.

¹⁰MKOMA, Txizimu txanu, a mi andisile ti to nyamsi, se mi tate nga tinyeleti ta nzumani!

¹¹MKOMA, Txizimu txa vatate vanu, a na mi andise, amu ka digumi da mazana, a txi mi katekisa, nga ti a nga mi thembisisa tona!

¹²Ni nga sikotisa kutxani, ani nokha, kurwala kunemela kwanu, ni mirwalo yanu, ni timhaka tanu kani?

¹³Sawulani vavamna va wuzivi, ni wutxhari, va mapimo, va zivanekako, hagari ka nyumba ni nyumba, amuwa kwanu, se ani ni na va emisa veva vathangeli vanu.”

¹⁴Sekoko anu mi ni xamute mi txi khanu: “Eto u ti wombako ndinene!”

¹⁵Ni tekile vathangeli va tihunzu tanu, vathu vo ziva, ni mapimo, ni txi va maha vathangeli vanu: Vathangeli va 1.000, vathangeli va dizana, vathangeli va mtxhanu wa magumi, ni vathangeli va digumi, ni vaxayisi va tihunzu tanu.

¹⁶Ka mbimo yoneyo, ni leletete ka vathangeli vanu ni txi khani: Engisani timhaka ta vananu, mi txi lamula ngu kululama mhaka ya m'thu ni mwanawe, mwendo ni mluveli wu a hanyako nayo.

¹⁷Mi nga yeni ngu khohe kulamulani kwanu: Mi na engisa ngu kufana mhaka ya wam'dotho ni mhaka ya wa hombe. Mi nga thaveni txiemo txa m'thu, nguko kulamula kuta ngu ka Txizimu. Ngako mhaka i di yo karata kwanu, yi tiseni kwangu, kasi ku ani ni txi ta yi engisisa.

¹⁸Ka mbimo yoneyo ani ni mi leletete toshe ti mi ku ni fanelo ya ku ti maha.

¹⁹Sekoko hi to khukha ngu Horebhi, hi tshawunyeta txiwula txile txa hombe txo thisa. Anu mi ti wonil, hi tsimbite ngu nzila ya mmango wa Vaamori, nga ti a nga leletisa tona MKOMA, Txizimu txathu; hi txi hoka Kadhesi-Bharneya.

²⁰Sekoko ani, ni mi gete ni txi khani: Mi hokile hafuhi ka mmango wa Vaamori, awu MKOMA, Txizumu txathu, a no hininga.

²¹Wona MKOMA, Txizimu txako, a ku ningile ditiko diya: Kwela u txi ya di teka, nga ti MKOMA, Txizimu txa vatate vako, a nga kuleletisa tona. U nga ve ni dizowa, kambe u nga dhudhumele.

²²Sekoko, anu motshenu, mi tile kwangu mi txi ta womba tiya: A hi rumeni vathu masoni kwathu, kasi ku ya xola ditiko, ni ti to va txi ta hi gela ngu mhaka ya nzila yi hi no tsimbila ngu yona, ni didhoropa di hi no wulela ka dona.

²³Ma woneloyo ma to ni tsakisa, aha ni nga sawula hagari kwanu digumi da majaha ni mambidi, m'thu mmweyo ngu nyumba ni nyumba.

²⁴Vona va to khukha ve kwela mmango, ve tsimbila va txi ya hoka mkovani ka Esikole, aha va nga ya di xola dona ditikodo.

²⁵Va to teka mihando ya dona ditikodo, ve wuya nayo kwathu. Aha va nga ta xawutela va txi kha vona: “Ditiko di MKOMA Txizimu txathu a hi ningako, dinene ngutu.”

²⁶Kambe anu kha ma ti lava kukwela mi txi ya ka dona, aniko mi to tereka, mi kaneta sileleto sa MKOMA, Txizimu txanu.

²⁷Se mi to ngungurukela, mi di mu matendani kwanu, mi txi khanu: MKOMA wa hi venga! A hi humisile ditikoni ka Egipta, kasi ku ta hi ningela manzani ka Vaamori ve hi lovisa!

²⁸Hi na kwela hi txiya hani kani? Vanathu va hi wite misana, ngu ku kha vona: Vathu va kona mbavangi ngutu kupinda athu, kambe mba nyasihakate, madhoropa a kona nga hombe, ma ku ni maguma o guleka kala nzumani. Kambe koneyo hi woni ni vanana va Anaki.

²⁹Konako ani ni mi gete ni txi khani: “Mi nga wikeni misana, kambe mi nga telweni ngu dizowa ngu mhaka yawe!

³⁰MKOMA, Txizimu txathu, ngene a no ya masoni kwanu, ene a na mi lwela, kufana ni tile a nga ti maha ngu nganu ditikoni da Egipta, khoheni kwanu.

³¹ Hambi ni txiwulani, mi ti woni ti to MKOMA, Txizimu txako, a mi belekile, nga ti m'thu a belekisako tona mwanana wakwe, ka yotshe nzila yi mi nga tsimbila ngu yona, kala mi hoka ka wuwa wukhalo.”

³²Hambi keto kha mi mthembi MKOMA, Txizimu txanu,

³³awule a nga thangela masoni, a txi mi lavela wukhalo, kasi ku mi txi gova ka wona, ni wusiku a txi mi woninga ngu mndilo, ti to mi mana kuwona nzila yi mi fanelako kutsimbila ngu yona, ni mitshikari a txi mi komba nzila ngu direfu.

³⁴MKOMA koko, a di pfite diguwa da mapswi anu, a to henya, e xambanya a txi khene:

³⁵Ni wammweyo m'thu wa liveleko liya lo biha timbilu, kha na mbi wona ditiko da dinene, adile ni nga thembisa ngu kuxambanya ti to ni na di ningela ka vatate vanu,

³⁶hahanze ka Kalebhi, mwana Jofone, ene a na di wona. Ni na mninga ditiko di a nga pinda ngu ka dona, kumweko ni vanana vakwe, nguko ene a ti karatile e londeta nzila ya MKOMA, asi kanakani.

³⁷Ngu mhaka yanu, MKOMA a henyile, hambi ni nani a ni henyete, a txi khene: “Nanawe khu na mbi wulela ka dona.

³⁸Joxuwa m'vhuneteli wako, mwana Nune, ngene a no ya wulela ka dona. Mtsanise a na maha ti to Israyeli e di teka, di txi maha thomba yawe.

³⁹Ni vanana vanu, avale mi nga txi khanu va na ñolwa ve maha tikhumbi, vanana vanu avale va sinziko kuziva kuhambanisa ta tinene ni to biha, ngu vona va no wulela kona; ani ni na va ninga dona ditikodo, va txi di fuma.

⁴⁰Kambe anu, tshumelani, mi tsula txiwulani, ngu nzila ya linene lo Bhilivila.”

⁴¹Sekoko anu mi ni xamute mi txi khanu: “Hi onhile ka MKOMA. A hi kweleni hi txi yalwa, nga ti a nga leletisa tona MKOMA, Txizimu txathu.” Mmwani ni mmwani hagari kwanu, a to xoma matxhari akwe a yimbi, ngu kupimisa ti to ku na hehuka kukwela mmango.

⁴²Sekoko, MKOMA a ti khene kwangu: “Va gele u txi khawe: Mi nga kweleni, kambe mi nga lweni, nguko mi nga ya xulwa ngu valala vanu, nguko ani kha ni na mbi maneka hagari kwanu.”

⁴³Kambe ni mi gete ngu toneto. Hambi keto, kha ma ni engisa, mi to kaneta kuleleta ka MKOMA: Mi kwela mmango ngu txikanyiso.

⁴⁴Se Vaamori, vale va nga aka txitimwi ka mmango, va to huma konako va txi mi hingeta, ve mi tutumisa nga tinombe, aha va nga mi khozisa kukhukhela Seyiri, kala Horima.

⁴⁵Mi to tshumela mi txi dila masoni ka MKOMA; aniko MKOMA kha nga engisa tihuwa tanu, kambe kha nga komba kukhatala ngu nganu.

⁴⁶Ngu mhaka ya toneto, mi zumbile masiku amangi kona Kadhesi, ka ona masiku ale mi nga maneka koneyo.