Read chopi Dhewuteronome 10 Bible Online

Dhewuteronome 10 - chopi bible

Dhewuteronome 10

¹Konako MKOMA a to womba a txi khene kwangu: “Vata kambe sileti simbidi sa marigwi kufana ni so khata, u txi kwela u txi ta naso kwangu, txitimwi ka mmango, maha kambe dibhokiso da mapulango.

²Ni na bhala kambe ha siletini mapswi ale ma nga ti ka sileti so khata, asile u nga faya, se awe u na ya si veka amu ka dibhokiso.”

³Ni to maha dibhokiso ngu mapulango a setime, ni vata sileti simbidi sa marigwi, so fana ni so khata, se ni txi kwela mmangoni, ni sileti sa simbidi, ni di si ñote manzani kwangu.

⁴Sekoko MKOMA a to bhala aha ka sileti, yoneyo mhaka a nga ti yi bhate ha kukhatani, i ku milayo ya digumi, ayi MKOMA a nga ti yi wombile mmangoni, na a di hagari ka mndilo, ka ditshiku da msengetano; se MKOMA a to si ningela kwangu.

⁵Ni to engeta ni relela ngu mmangoni, ni txi veka amu ka dibhokiso sileti sa simbidi, dona dibhokiso dile ni ngadi maha; sona si ngadi kona mule, madingano ni ti MKOMA a nga leletisa tona.

⁶ Se vanana va ka Israyeli va to khukha konako ha txisimani ka vanana va ka Jahakani va txi ya Mosera. Ka wona wuwa wukhalo ngu kona a nga fela kona Aroni, a txi tshotshwa kona kambe. Mwanakwe, Eleyazari, a to mtsiveta ha wukhaloni ka wuphaxeli.

⁷Va to khukha ngu hale, veya Gudhigodha, va txi khukha ngu Gudhigodha veya Jotibhata, ka ditiko do tala ngu sinambwana sa mati.

⁸ Ngu ka yona mbimoyo ya yimweyo, MKOMA a to sawula nyumba ya ka Levhi, kasi kuva txi rwala dibhokiso da txitumelelano txa MKOMA, ni kumaneka masoni kwakwe va txi khozela MKOMA, va txi mthumela ni kukatekisa vathu ngu ditina dakwe, kala nyamsi.

⁹Ngu mhaka ya toneto, Valevhi kha va na kuavelwa thomba kumweko ni vanawe; MKOMA ngene i kuthomba yawe, nga ti MKOMA, Txizimu txako, a nga va gelisa tona.

¹⁰ Ani ni to zumba mmangoni mune wa magumi a masiku, ni mune wa magumi a wusiku, kufana ni txikhati txo khata, MKOMA a to ni engisa kambe, ku nga dile do khata, se ene MKOMA kha ni lovisa.

¹¹Kambe MKOMA a to khene kwangu: “Khukha u txi tsimbila, u thangela masoni ka vathu, kasi kuva txi ya wulela ve teka ditiko di ni nga xambanya ka vatate vawe, ti to ni na va ninga.”

¹²“Konkuwa koko, awe Israyeli, MKOMA, Txizimu txako, a kombela txani kwako, i si nga ti to u thava MKOMA, Txizimu txako, ni ti to u londeta totshe tinzila takwe, u mranda, ni ku mthumela MKOMA, Txizimu txako, ngu yotshe mbilu yako ni wotshe moya wako,

¹³ni kuva u vekisa sirumo sa MKOMA, ni milayo yakwe, ayiya nyamsi ni ku leletako, kasi ku u mana kuzumbiseka, kani?

¹⁴Wona nzuma ni nzuma ya tinzuma, si lumba MKOMA, Txizimu txako, kumweko ni mafu ni sotshe si si kuho ka ona.

¹⁵Aniko MKOMA a ti ningetete dwe ka vatate vako, a txi va randa! Se msana kwawe a to sawula liveleko lawe, i ku anu ngu wutumbu, hagari ka votshe vathu, nga ti ni nyamsi ti wonekako.

¹⁶Yisani wukwerani timbilu tanu, mi si bangisi tithamo tanu.

¹⁷ Nguko koko MKOMA, Txizimu txanu, Njizimu txa sizimu, MKOMA wa vakoma, Njizimu txa hombe, nyamitamo, wa kuthaviseka, awule a ku si nga ni txisawulela hagari ka vathu, awu asi tumeliko kuxawa.

¹⁸Awu a emelako avale vo felwa ngu vaveleki, ni tinoni, kambe wa randa mluveli, a txi mninga sakudya ni syambalo.

¹⁹Ngu toneto, randani mluveli, nguko nanu mi ti ti valuveli ditikoni ka Egipta.

²⁰Thava MKOMA, Txizimu txako, u txi mkhozela ene ekha, kambe namarela kwakwe u txi xambanya ngu ditina dakwe.

²¹MKOMA ngene i ku wudhumo wako ni Txizimu txako, awule a nga ku mahela simaha sa hombe, so xamalisa, asi u nga si wona ngu maso ako.

²² Vakale vako i ti mtxhanu wa magumi ni mambidi dwe, mbimo yile va nga wulela ditikoni ka Egipta, konkuwa MKOMA, Txizimu txako, a ku andisile u txi tala nga tinyeleti ta nzumani.”