Read chopi Dhewuteronome 11 Bible Online

Dhewuteronome 11 - chopi bible

Dhewuteronome 11

¹“U na randa koko MKOMA, Txizimu txako, u vekisa yotshe mbimo ati a nga kugela, milayo yakwe, sileleto sakwe, ni sirumo sakwe.

²Se nyamsi mi na tiziva tito, kha ni wombawombi ni vanana vanu, ava va si tiziviko, ni va va nga mbi ti wona, ati a nga gondisa MKOMA, Txizimu txanu, wuhombe wakwe, dianza dakwe do tsana, ni diwoko dakwe da mtamo;

³ ni sikombiso sakwe, ni mithumo yakwe yi ene a nga yi maha ka Vaegipta, ni ka Faro, mfumeli wa Egipta, ni ka dotshe ditiko dakwe;

⁴ ni ti ene a nga maha ka dibutho da yimbi ya Egipta, ni ka sikotxikani sawe, ni ka mahantxhi awe, ati a nga maha ta ku va bhwabhwamelisa lineneni ko Bhilivila, mbimo yi vona va nga txi mi hinga, ahawa MKOMA a nga va fuvisa, kala ni nyamsi;

⁵ni tiya ene a nga mi mahela txiwulani, kala kuza mi hoka ka wuwa wukhalo;

⁶ ni ti MKOMA a nga maha ka Dhatani, ni ka Abhiramu, vanana va Eliyabhe, wa lihunzu la ka Rubheni; ahawa mafu ma nga asama txisofu txa ona ma txi va mita, kumweko ni mimwaya yawe, ni matenda awe, ni votshe vale va nga ti va londeta, hagari ka votshe va ka Israyeli.

⁷Maso anu ma woni yotshe mithumo ya hombe ayi MKOMA a nga yi maha.

⁸Ngu toneto, vekisani sotshe sirumo si ni mi leletako nyamsi, kasi ku mi mana mtamo wa kuwulela, mi teka ditiko di mi txhatukelako kuya di fuma.

⁹Kasiku mi txi andiselwa masiku anu ka ditiko di MKOMA a nga thembisa ngu txixambanyo, ti to a na di ningela ka vatate vanu ni vatukulu vawe, ditiko di di khulungako masi ni wulombe.

¹⁰Nguko ditiko di uyako ka dona, kuya di teka, kha di fanani ni di u nga huma ka dona, ditiko da Egipta, ahawa u nga ti phaya mbewu yako u txi theletela mati ngu mkondo wako, nga ti kumahwako amu ka thembwe.

¹¹Ditiko di mi yako ka dona, kasi kuya di teka, ditiko di di ku ni mimango ni mikova, adi di nakaniswako ngu mati a kuwa ngu nzumani.

¹²Ditiko di MKOMA, Txizimu txako, a di xayisako; maso a MKOMA, Txizimu txako, ma wonetela dona yotshe mbimo, kukhukhela kukhatani, kala kugumani ka dilembe.

¹³Se ku na maheka taku, ngako ngu ditshuri mi txi vekisa sirumo siya nyamsi ni mi leletako, mi txi randa MKOMA, Txizimu txanu, ni ku mkhozela, ngu yotshe mbilu yanu, ni wotshe moya wanu,

¹⁴ni na wuyisa mati ka ditiko danu, a kuwa ngu mbimo yi yi lavekako, mati a wuxika ni mati a mbimo ya minyuko. Ngu toneto, u nga sikota kuelula fulaho yako, ni vhinya yako, ni mtona wako.

¹⁵Ni na ninga lihawu libalani ka sifuyo sako, se mi na dya mi khura.

¹⁶Ti woneleni timbiluni kwanu, mi si phazami, mi txi hambukiswa, mi ya khozela simwani sizimu, mi txi khizama masoni ka sona,

¹⁷nguko MKOMA a nga mi henyela e tsiva nzuma, ku siwi kambe mati, mafu ma si swi me mi ninga sakudya, se anu mi lova ngu kukuluveta ka ditiko da dinene, adi MKOMA a nga mi ninga dona.

¹⁸Mapswi awa angu koko, ma veketeni timbiluni kwanu ni mimoyani kwanu, mi txi ma sugelela mawokoni kwanu, me maha txialakanyiso, ma txi maha txikombiso hagari ka timbanza tanu.

¹⁹Ma gondiseni ka vanana vanu, mi womba-womba ngu ona mi di khalahatshile mitini kwanu, ni kungako mi txi tsimbila tinzilani kwanu, kungako mi di otete ni kungako mi di wukile.

²⁰ Awe u na ma bhala aha ka misasimo ya nyumba yako, ni ha matimbani kwako,

²¹kasi ku masiku anu ni masiku a vanana vanu ma txi anda, ka ditiko diya MKOMA a nga xambanya ku di ningela ka vatate vanu, di txi anda kufana ni kuanda ka nzuma yi yi ku txitimwi ka mafu.

²²Nguko ngako mi txi vekisa kwati sotshe sirumo si nyamsi ni mi leletako, mi si londeta, mi txi randa MKOMA, Txizimu txanu, mi tsimbila ngu totshe tinzila takwe, na mi txi ti ningetetela kwakwe,

²³kambe MKOMA a na tutumisa masoni kwanu yotshe mifumoyo, na nanu mi na xula mifumo ya hombe ni ya mtamo kupinda anu.

²⁴Otshe makhalo ale mikondo yanu yi no ma kanda, ma nava i di anu. Ditiko danu di na khukhela txiwulani ka Libhanoni, ni kukhukhela mnamboni ka Ewufrate, kala lineneni ka mswa-ditambo.

²⁵ Kha ku na mbi va ni m'thu wo mi tsanela; MKOMA, Txizimu txanu, a na thela dizowa ni kudhudhumela ngu mhaka yanu, ka vathu va dotshe ditiko di mi no wulela ka dona, nga ti ene a nga mi gela.

²⁶Wonani, nyamsi na veka txikatekiso ni txiruko masoni kwanu:

²⁷Txikatekiso, ngako mi txi xayisa sirumo sa MKOMA, Txizimu txanu, asi nyamsi ni mi leletako;

²⁸kambe mi na va txiruko, ngako mi si xayisi sirumo sa MKOMA, Txizimu txanu, ni kungako mi txi huma ka nzila yi ni mi kombako nyamsi, mi txi londisa simwani sizimu, sile mi si si ziviko.

²⁹ Se ku na maheka tito, mbimo yi MKOMA, Txizimu txako, a no ku wuleta ka ditiko di uyako ka dona kuya di teka, u na ya huwelela txikatekiso txitimwi ka mmango wa Gerizimi, se txiruko u na ya txi huwelela txitimwi ka mmango wa Ebhali.

³⁰Ina mimango yiya kha yi maneki mtxhatuko ka Jordhani, ngu msana ka nzila ya mswa-ditambo, ditikoni ka Vakanana, avale va nga aka kona Arabhe, masoni ka Giligali, hafuhi ni mikusu ya More kani?

³¹Nguko mi na txhatuka Jordhani mi ya wulela ni kuteka ditiko di MKOMA, Txizimu txanu, a mi ningako; se di na mi lumba, mi aka ka dona.

³²Ngu mhaka yeto koko, khatalelani kuxayisa yotshe milayo ni sotshe sileleto si nyamsi ni mi ningako.”