Read chopi Dhewuteronome 12 Bible Online

Dhewuteronome 12 - chopi bible

Dhewuteronome 12

¹Ayiya ngu yona nzileleto ni silayelo si mi no si xayisa, mi txi si vekisa ka ditiko di MKOMA, Txizimu txa vatate vanu, a nga mi ninga, mi txi di teka, ka otshe masiku a kuhanya kwanu ha mafuni.

²Mi na ya haxulela otshe makhalo awa vathu va mi yelako kuya va khozisa, va nga ti khozela ka ona sizimu sawe, txitimwi ka mimango ya hombe, amu ka mimango yo guleka ni mu ka simangwana, ni hahatshi ka yotshe mindonga yo nakana;

³ mi na ya khundumusela siluvelo sawe, mi na ya phatulela[2] mi hisetela sithombe sawe, ni sifaniso sa kona sa miphaxo, mi na fayetela sithombe so vatwa sa sizimu sawe, ni kufuvisa matina a sona ka wukhalo wule.

⁴Ngu didhawa da MKOMA, Txizimu txanu, mi nga maheni atile vona va ti mahako,

⁵aniko mi na ya khozela MKOMA, Txizimu txanu, ka wukhalo wule a no wu sawula hagari ka totshe tihunzu tanu, kasi kuveka kona ditina dakwe, ni kuva a txi zumba kona; se mi na va koneho.

⁶Se mi na yisa kona miningelo yanu yo hiswa, ni timhamba tanu, ni miningelo yanu ya sa wugumi, ni siningo sa kundiwitela sa manza anu, ni miphaxo ya kuxambanya kwanu, ni miningelo ya kuranda kwanu, ni matiwula a tihomu tanu ni tinvuta tanu.

⁷Se mi na ya dya masoni ka MKOMA, Txizimu txanu, mi na ya tsaka ngu wotshe mthumo wa manza anu, anu ni yotshe mimwaya yanu, mi tsakela asi MKOMA, Txizimu txanu, a no va a di mi katekisile ngu sona.

⁸Mi nge ya maha nga ti konkuwa hi ti mahako kona hawa nyamsi, mmwani ni mmwani a mahako tinene, nga ti a ti wonisako tona,

⁹nguko kha minzi kuwulela ka wukhalo wo humula ni ka thomba yi MKOMA, Txizimu txanu, a no mi ninga.

¹⁰Aniko mi na txhatuka Jordhani mi txi ya aka ka ditiko dile, MKOMA, Txizimu txanu, a no mi ninga di txi maha thomba yanu; ene a na ya mi vhikela ka votshe valala vanu, vale va mi randelako, kasi ku mi txi zumba ngu kudikha ni kutsana.

¹¹Sekoko ku nava ni wukhalo wule a no wu sawula MKOMA, Txizimu txanu, kasi ku ditina dakwe di zumba kona; mi na tisa koneho sotshe si ni mi leletako: Miningelo yanu yo hiswa, ni miphaxo yanu, ni sa wugumi sanu, ni mningelo wo ndiwitelwa wa manzani kwanu, ni sotshe si mi nova mi di xambanyile ka MKOMA.

¹²Se mi na tsaka masoni ka MKOMA, Txizimu txanu, anu ni vanana vanu va majaha ni vamahorana, ni sithumi sanu sa vavamna ni sa vavasikati, ni Valevhi vale va zumbako madhoropani kwanu nguko vona kha va nga ni txyavelo, hambi thomba, kumweko ni nanu.

¹³Ti wonele kasi ku u si mahi miningelo yo hiswa ka wumwani wukhalo, awu u wu wonako;

¹⁴aniko u na maha mningelo wako wo hiswa, ka wukhalo wule MKOMA a no wu sawula, ka limwelo la tihunzu tako, se emo u na mahela kona totshe ti ani ni ku leletako tona.

¹⁵Kambe madingano ni ti u ti lavako moyani kwako, u nga sikota kudaya txifuyo txako, udya nyama ya kona, ka otshe madhoropa ako, nga ti MKOMA, Txizimu txako, a nga ku katekisisa tona; kasi awu a nga mbi basa ni wu a nga basa, votshe va na dya, nga ti ku dyiswako tona nyama ya mhoti ni ya xangu.

¹⁶ Kambe mnoha mi nga dyeni, wu theketeni ha mafuni ku nga mo theketa mati.

¹⁷Ha mwayani kwako, u nga dyele kona sa wugumi sa fulaho yako ni sa vhinya yako ya yiphya ni sa mtona wako, ni matiwula a tihomu tako ni matiwula a tinvuta tako, hambi sile u nga thembisa ngu txixambanyo, hambi miningelo ya kuranda kwako, hambi ni yihi miningelo yo ndiwitelwa, ayi yi humako manzani kwako.

¹⁸Awe u na si dyela masoni ka MKOMA, Txizimu txako, ka wukhalo wu MKOMA, Txizimu txako, a no wu sawula, awe ni mwanana wako wa dijaha ni wa dihorana, khumbi yako ya wamwamna ni ya wamsikati, ni Mulevhi wu a zumbako kumweko ni nawe. Kambe u na tsaka masoni ka MKOMA, Txizimu txako, ngu yotshe mithumo ya manza ako.

¹⁹Ti wonele u si divali Mulevhi, ka otshe masiku a kuhanya kwako, amu mafuni.

²⁰Mbimo yi MKOMA, Txizimu txako, a no endelekisa ditiko dako, nga ti a nga kugela, se u txi womba ku khawe: “Ani ni na dya nyama,” nguko u txi navela kudya nyama, wa sikota kudya nyama nga ti u ti lavisako tona.

²¹Ngako wu txi maneka wu di kule ni nawe wukhalo wule wu nga sawulwa ngu MKOMA, Txizimu txako, kasi ku di txi dhumiswa koneyo ditina dakwe, konako u nga sikota kudaya tihomu tako ni tinvuta tako, ati MKOMA, Txizimu txako a nga kuninga, nga ti ni nga kuleleta; u nga sikota kudyela nyumbani kwako, nga ti u ti lavisako tona.

²²Aniko u na dya nga ti ku dyiswako tona nyama ya mhoti, ni myama ya xangu: Awule a nga basa ni wule a nga mbi basa va na dya txikhati tximwetxo.

²³ Kambe ti wonele, u si dyi mnoha, nguko mnoha mbutomi. Ngu toneto, u nga dye wutomi ni nyama.

²⁴U nga thuke u txi dya mnoha! Wu thekete ha mafuni nga mati.

²⁵U nga wu dye, kasi ku u na mana kuzumbiseka ta tinene, kumweko ni vanana vako, msana kwako, ngako u txi maha ti i ku to lulama masoni ka MKOMA.

²⁶Kasi miningelo yako yo sawuleka u ku nayo ni yile u nga yi thembisa, u na yi teka u tsula nayo ka wukhalo wo sawuleka, awule MKOMA a nga wu sawula.

²⁷U na maha miningelo yako yo hiswa, nyama ni mnoha, ha txiluveloni ka MKOMA, Txizimu txako; mnoha wa timhamba tako wu na thelwa ha txiluveloni ka MKOMA, Txizimu txako, kambe u na dya nyama ya kona.

²⁸Vekisa ni kuxayisa otshe mapswi awa ni ku leletako ona, kasi ku u na mana kuzumbiseka ta tinene, awe ni vanana vako msana kwako, ngu mbimo yotshe, ngako u txi maha ati i ku ta tinene, ni ti i ku to lulama masoni ka MKOMA, Txizimu txako.

²⁹Ngako MKOMA, Txizimu txako, a di fuvisile matiko masoni kwako, aya u yelako kuya ma teka me maha ako, u txi aka ka ona,

³⁰ti wonele u si bzwetwi, u nga londetele mahanyelo awe, msana ka kuva va di fuvisilwe masoni kwako; u nga londetele sizimu sawe, u txi khawe: “Vathu vava va khozelisa kutxani sizimu sawe kani? Ni na maha toneto nani!”

³¹U nga ti mahe eto masoni ka MKOMA, Txizimu txako! Nguko totshe ti MKOMA a ti nyenyako, totshe ti ene asi ti laviko, vona va ti mahile ka sizimu sawe, aha koza va txi hisa vanana vawe vavafana ni vamahorana, va txi dhumisa sizimu sawe.

³² U na xayisa totshe ti ni no kuruma; u nga engetele txilo, hambi kuhungula.