Read chopi Dhewuteronome 13 Bible Online

Dhewuteronome 13 - chopi bible

Dhewuteronome 13

¹Ngako ku txi humelela hagari kwanu, mprofeti, mwendo mlori a txi mi komba txikombiso mwendo txidiwukiso,

²“se kumaheka txikombiswetxo mwendo txidiwukiso txile a nga nga txi womba a txi khene: A hi londeteni simwani sizimu, sile u si si ziviko, hi txi si thumela,”

³u nga engise mapswi a mprofeti eneyo mwendo mlori eneyo, nguko MKOMA, Txizimu txanu, ngene a mi dukako, kasi kuziva ti to ina ngu ditshuri ma randa MKOMA, Txizimu txanu, ngu yotshe mbilu yanu, ni wotshe moya wanu.

⁴Mi na londisa MKOMA, Txizimu txanu, mi txi mthava, mi vekisa sirumo sakwe, mi txi engisa dipswi dakwe, mi txi thumela ene, mi namarela kwakwe.

⁵Se mprofeti wule mwendo mlori, a fanete kudawa, nguko a kujetete vathu kuhambana ni MKOMA, Txizimu txanu, awu a nga mi humisa ditikoni ka Egipta, a txi mi hulukisa ka nyumba ya wukhumbi; kasi ku mi hambukisa ka nzila yi MKOMA, Txizimu txanu, a nga mi leleta, kasi ku mi tsimbila ngu yona; ngu kumaha keto, mi na thavisa wubihi hagari kwanu.

⁶Ngako mwananu, awu i ku mwanana wa mame wako, mwendo mwanana wako wa mfana, mwendo wa dihorana, mwendo msikati wa mbilu yako, mwendo mndoni wako wo randeka ngutu, a txi lava ku ku kujetela ngu malengo, a txi khene: “He tsimbile hi txi ya khozela simwani sizimu,” sizimu sile awe ni vatate vako mi nga mbi si ziva,

⁷hagari ka sizimu sa vathu vale i ku vaakelani vanu, va hafuhi mwendo va kule ni nawe, kukhukhela magwito ka mafu kala kumwani magwito,

⁸u nga tumelelani nayo, hambi ku mu engisa, kambe maso ako ma nga mtsetse; u nga ve ni wumbilu nayo, kambe u nga msise,

⁹aniko kha ditshuri u fanete ku m'daya; dianza dako ngu dona di no khata di txi mpeka, kasi ku m'daya, se ngu msana manza a votshe vathu.

¹⁰Se u na m'balisela ngu marigwi kala a txi fa, nguko a duketile ku ku hambukisa ka MKOMA, Txizimu txako, awu a nga kuhumisa ditikoni ka Egipta, amu ka nyumba ya wukhumbi.

¹¹Kasi ku votshe va ka Israyeli ve tiengisa, ve thava, ni ti to va siswi ve maha to biha, to nga toneto hagari kwanu.

¹²Ngako u txi engisa kuwomba ti to ka dimwani didhoropa ka ale MKOMA, Txizimu txako, a nga kuninga kuzumba ka ona,

¹³vathu vokari, vanana va Beliyali, va humile hagari kwanu, va timetile vaaki va didhoropani kwawe, va txi kha vona: “He tsimbileni hi ya khozela simwani sizimu,” sizimu sile mi si si ziviko,

¹⁴sekoko u fanete kuxolisisa, u wonisisa, ni ku wotisisa kha kwati. Ngako i ti ditshuri, ngako ti di tsani ti to mhakeyo yo biha yi mahekile hagari kwanu,

¹⁵sekoko u na daya ngu ditxhari vaaki va didhoropa donedo, ni dona didhoropa di khundumusele, kumweko ni sotshe sile si ku ka dona, kumweko ni sihari sawe sa sifuyo.

¹⁶Se u na tshanganisa yotshe thomba yawe hagari ka mthanda wa didhoropa, u hisa dotshe didhoropa, ni yotshe thomba ya dona, sotsheso u hisela MKOMA, Txizimu txako, u si siyi ni txa tximwetxo; se di na va dirumbi yotshe mbimo, kha di na mbiswa di aketwa.

¹⁷Kambe ni txa tximwetxo ka sile i ku so yila, kha kulaveki txi maneka manzani kwako, kasi ku MKOMA a txi boxa dikhulo da txiviti txakwe, a txi kupfela wusiwana, a txi va ni wumbilu ngu ngawe, a txi kuandisa, nga ti a nga xambanya ka vatate vako,

¹⁸ngako u txi engisa dipswi da MKOMA, Txizimu txako, u vekisa sotshe sirumo sakwe, asi nyamsi ni ku leletako, u maha ti i ku to lulama masoni ka MKOMA, Txizimu txako.