Read chopi Dhewuteronome 14 Bible Online

Dhewuteronome 14 - chopi bible

Dhewuteronome 14

¹ “Anu mi vanana va MKOMA, Txizimu txanu; mi nga loweni mimidini kwanu, hambi kuyolwa titshi tanu, ngu mhaka ya kufa ka m'thu.”

² Nguko anu mi vathu vo sawuleka ka MKOMA, Txizimu txanu, kambe MKOMA a mi sawute hagari ka vamwani vathu, votshe vale va kuho txitimwi ka mafu, kasi ku mi va vathu vakwe mipune.

³“Mi nga dyeni ni txa tximwetxo txo nyenyeza.

⁴Sihari si mi fanelako kudya ngu siya: Homu, ni nvuta ni phongo,

⁵xangu, ni mhoti, ni mangulwe, ni mbalapala, ni xengani, ni mbavala, ni txipene.

⁶Mi na dya sotshe sihari, sile si ku ni sitsendo so bhandwa, si txi maha sitsendo simbidi, i ku sihari si si nyengako.[3]

⁷Hagari ka sihari sile si nyengako mwendo sile si ku ni sitsendo so bhandwa, mi nga dyeni siya: Dikamelu, ni mnvunza, ni xoxwe, nguko sa nyenga, aniko kha si nga ni sitsendo so bhandwa; eso sa yila kwanu.

⁸Hambi khumba, hambiko yi ku ni sitsendo so bhandwa, aniko kha yi nyengi; yona ya yila kwanu; mi nga dyeni nyama ya sona, hambi kugwesa sirumbi sa sona.

⁹Ka sotshe si si kuho matini, mi na dya siya: Sotshe sile si ku ni timbaluvalu ni mara.[4]

¹⁰Aniko mi nga dyeni sotshe si si kuwalo timbaluvalu ni mara; sona sa yila kwanu.

¹¹Dyanani nyama ya sotshe sinyana sa kwa mbi yila.

¹²Aniko hagari ka sona, mi nga dyeni siya: Digama, ni ditshova, ni tximhungu,

¹³ni nyamatate, ni likhozi, ni totshe tixaka ta sona;

¹⁴ni magwana, ngu tixaka ta ona;

¹⁵ni mbuwu, ni ditshukulu, ni nyawungondwani, ni txivaka, ngu tixaka ta sona;

¹⁶ni txikhovha, ni mkhoromati, ni tshamani,

¹⁷ni digumba, ni mnguvi, ni disekwa,

¹⁸ni nyawukolwe, ngu tixaka ta kona, ngakamela, ni didema.

¹⁹Ni sotshe sitoto si si purumako, sa yila kwanu; mi nga si dyeni.

²⁰Mi na dya sotshe sinyana so mbi yila.

²¹ Mi nga dyeni ni txa tximwetxo txihari txa ku ti fela; u na txi ningela ka mluveli wu a hanyako ha txikeni kwako a txi dya, mwendo ku txi xavisa ka wa matiko, nguko anu mi vathu vo sawuleka ka MKOMA, Txizimu txako. Mi nga bhikeni txihongwana ngu masi a mame wa txona.”

²²Ngu ditshuri u na ninga sa wugumi ngu ka mihando yako ya yiphya, ayi u no elula dilembe ni dilembe thembweni kwako.

²³Se masoni ka MKOMA, Txizimu txako, ka wukhalo wule a no wu sawula kasi ku ditina dakwe di txi zumba kona, u na dyela kona sa wugumi sa timbewu tako, sa vhinya yako ya yiphya, sa mtona wako, ni matiwula a tihomu tako ta vamakati, ni sa tinvuta tako; kasi ku u gonda kuthava MKOMA, Txizimu txako, otshe masiku.

²⁴Se ngako nzila yi di laphile, ahawa ko u si sikoti ni ku si rwala, ngu kumaneka kule wukhalo wu wu no sawulwa ngu MKOMA, Txizimu txako, kasi ku a txi veka kona eho ditina dakwe, mbimo yile MKOMA, Txizimu txako, a no va a di kukatekisile,

²⁵sekoko si xavise, u fumbareta male manzani, se tsula ka wukhalo wule a nga wu sawula MKOMA, Txizimu txako.

²⁶Se male yile u na yi ningela ngu sotshe si wu no si lava moya wako, ngu tihomu ta vamakati, ni tinvuta, ni vhinya, ni sopa, ni sotshe si wu no kukombela moya wako; dyela kona hale, masoni ka MKOMA, Txizimu txako, se u txi tsaka, awe ni yotshe nyumba yako.

²⁷Aniko u nga leke Mlevhi wule a ku mndani ka sike sako; nguko kha nga ni txyavelo, hambi thomba, kufana ni nawe.

²⁸Msana ka malembe mararu, u na thavisa sotshe sa wugumi sa mihando ya yiphya ka dilembe donedo, u txi ta si veka mndani ka sike sako.

²⁹ Sekoko a nata Mlevhi (nguko kha nga ni txyavelo hambi thomba kufana ni nawe), ni wa matiko, ni wo felwa ngu vaveleki, ni noni, va kuho mndani ka sike sako, se va na dya, va txi khura, kasi ku MKOMA, Txizimu txako, a na kukatekisa, ka yotshe mithumo ya manza ako, ayile u no yi maha.