Read chopi Dhewuteronome 15 Bible Online

Dhewuteronome 15 - chopi bible

Dhewuteronome 15

¹ Kugumani ka mtxhanu wa malembe ni mambi, u na divalela minandu.

²Mamahelo a kona ngu awa: Mmwani ni mmwani a nga txenekisa tximaha txokari ka mkwawe, a na m'divalela; kha na mbi m'vila mwakelani wakwe, hambi mwanawe, nguko kuhuweletwe mthetho wa kudivalela, ngu ditina da MKOMA.

³Wa sikota kuvila ka mluveli, aniko asile u nga txenekisa ka wa ka kwanu, si leke.

⁴Kunene, hagari kwanu, kha ku na mbi va ni txisiwana, nguko MKOMA a na mi katekisa, ka ditiko dile MKOMA, Txizimu txanu a no mi ninga, kasi ku mi txi di teka, di txi maha danu.

⁵Eto ti na maheka, ngako u txi engisa dipswi da MKOMA, Txizimu txako, u txi khatala ngu kuxayisa sotshe sirumo si nyamsi ni ku leletako sona.

⁶MKOMA, Txizimu txako, a na kukatekisa, nga ti a nga kuthembisa. Awe u na txenekisa ka mifumo yayingi, aniko awe khu na mbi txeneka, kambe u na fumela mifumo yo tala, aniko yona kha yi na mbi kufumela.

⁷ Ngako ku txi maneka txisiwana txokari hagari ka vananu, ka sike sokari sako, ka ditiko dako, adile MKOMA, Txizimu txanu, a ku ningako, u nga bangise mbilu yako, kambe u nga fumbarete dianza dako ka mwananu, wule i ku txisiwana;

⁸aniko, nawuluta dianza dako, u txi mlomba ngu kutxhatxheka sile a si pwatako, madingano ni kuvilela kwakwe.

⁹Ti wonele ti to ku si maneki[5] mipimiso yo biha mbiluni kwako, u txi khata kuwomba u txi khawe: Da hoka dilembe da wutxhanu ni mambidi, dilembe da kudivalela sikweneti, se u txi wona mwanana wa txisiwana ngu maso o biha, u si mningi txilo; ene a na dila ka MKOMA ngu ngawe, se awe u na va ni txionho.

¹⁰M'ninge ngu kutxhatxheka, ni mbilu yako yi nga kanakane, nguko ngu mhaka ya toneto, MKOMA, Txizimu txako, a na kukatekisa, ka yotshe mithumo yako, ni yotshe mithumo ya manza ako.

¹¹ Kha ku na mbi pwateka txisiwana ha ditikoni; ngu toneto, na kuruma ni khani: Nawuluta dianza dako ngu kutxhatxheka u vhuna mwananu, ni txikulungu txi txi ku ditikoni kwako.

¹²Ngako mwanangu wa Muhebheru mwendo ndiyako ya Muhebheru a txi ti xavisa kwako, ene a na kuthumela mtxhanu wa malembe ni dimwedo, aniko amu ka dilembe da wutxhanu ni mambidi, u na mleka e tsula.

¹³Aniko, ngako u txi mleka e tsula, u nga mleke e tsula asi nga ni txilo manzani kwakwe.

¹⁴Mninge sifuyo sokari sa mtxhambi wako, ni silo sa ha dithalani kwako, ni sa mu dipipani kwako, u txi m'vhuna ngu sile, MKOMA, Txizimu txako, a nga kukatekisa ngu sona.

¹⁵Alakanya ti to na nawe u ti ti khumbi ditikoni ka Egipta, ni ti to MKOMA, Txizimu txako, a ku tirute; ngu mhaka ya toneto, ani na kuninga mlayo wuwa nyamsi.

¹⁶Kambe, ngako ene a txi kugela ku khene: “Kha ni tumeli ku kuleka, ngako a txi kudhunda awe ni nyumba yako, ni kuva a txi pfa kutshamba mbiluni kwakwe ngu ngawe,”

¹⁷sekoko, u na teka linyunzi u txi m'thola nzeve ha txikeni, se ene a na va i di khumbi yako yotshe mbimo; u na maha toneto kambe ngu khumbi yako ya wamsikati.

¹⁸ Ti nga ku mahe u txi karateka ngu mhaka ya ku mleka e tsula, nguko ene a kuthumete mtxhanu wa malembe ni dimwedo, a ku mahete dibhindu da sithumi simbidi, se MKOMA, Txizimu txako, a na kukatekisa ka totshe ati u no ti maha.

¹⁹ “U na ningela ka MKOMA, Txizimu txako, otshe matiwula a vamatune va tihomu tako ni a tinvuta tako, u nga thuke u txi thumisa matiwula a vamatune a tihomu tako, kambe u nga kaye matiwula a vamatune va tinvuta tako.

²⁰U na ya ma dya, dilembe ni dilembe, masoni ka MKOMA, Txizimu txako, awe ni wotshe mwaya wako, ka wukhalo wule MKOMA a no va a di wu sawute.

²¹Ngako txifuyo txako txi di ni wulima wokari, txi txi nzoda mwendo txi di fite maso, hambi kuva ni wumwani wulima wa hombe, u nga txi ningele ka MKOMA, Txizimu txako ha txiluveloni.

²²Wa sikota ku txi dyela m'tini kwako; awule a nga basa ni wule a nga mbi basa, votshe va na dya, nga ti va dyisako tona mhoti ni xangu.

²³ Mnoha wa kona dwe u nga dye; wu thekete ha mafuni nga mati.