Read chopi Dhewuteronome 16 Bible Online

Dhewuteronome 16 - chopi bible

Dhewuteronome 16

¹Xayisa mtxima wa Abhibha, u mahela MKOMA, Txizimu txako, Pasika, nguko mtxima wa Abhibha ngu wona mtxima wule MKOMA, Txizimu txako, a nga kuhumisa ngu ka wona, ni wusiku, ditikoni ka Egipta.

²Sekoko u nga mahele MKOMA, Txizimu txako, Pasika, u txi daya tinvuta ni tihomu, ka wukhalo wule MKOMA, Txizimu txako, a no wu sawula, kasi ku di zumba kona ditina dakwe.

³U nga dye dipawu do tshumbelwa; amu ka mtxhanu wa masiku ni mambidi u na dya dipawu da kuxaniseka, (nguko u humile ngu txikuluveta ditikoni ka Egipta) u na maha toneto ka otshe masiku a kuhanya kwako, kasi kukhumbula ditshiku da kuhuma kwako ngu Egipta.

⁴Amu ka mtxhanu wa masiku ni mambidi, ku nga thuke ku txi maneka mtshumbelo ka dotshe ditiko dako; ni nyama yi u nga daya ni minova ya ditshiku do khata, ku nga sale txilo kala mangwanani ka kona.

⁵U nga mahe mphaxo wa Pasika, amu ka madhoropa ale MKOMA, Txizimu txako, a no kuninga,

⁶aniko, u na phaxa dwe ka wukhalo wu MKOMA, Txizimu txako, a no wu sawula, kasi ku ditina dakwe di txi dhumiswa kona, u na maha mphaxo wa Pasika, ni minova, kuswani ka ditambo, ka mbimo yile u nga huma ngu ka yona ditikoni ka Egipta.

⁷Sekoko u na bhika nyama, u yi dyela ka wukhalo wule MKOMA, Txizimu txako a no wu sawula; ni mixo u na tshumela u txi tsula ditendani kwako.

⁸ Mndani ka mtxhanu wa masiku ni dimwedo, u na dya mapawu o mbi tshumbelwa, se ka ditshiku da wutxhanu ni mambidi, ku nava ni msengeletano wa m'buso wo dhumisa MKOMA, Txizimu txako; u nga mahe mthumo ni wawumwewo.”

⁹“U na bala mtxhanu wa mavhiki ni mambidi; kukhukhela ka mbimo yile u no teka sikela u txi elula fulaho, u na khata kubala mtxhanu wa mavhiki ni mambidi.

¹⁰Ngu msana, u na maha m'buso wa mavhiki, u txi dhumisa MKOMA, Txizimu txako; u na maha mningelo wa manza ako ngu kuxuva ka mbilu yako, madingano ni ti MKOMA Txizimu txako a nga ku katekisisa tona.

¹¹Se u na tsaka masoni ka MKOMA, Txizimu txako, awe ni mwanana wako wa mfana ni wa dihorana, ni khumbi yako ya wamwamna ni ya wamsikati, ni Mulevhi wule a hanyako didhoropani kwako, ni mluveli, ni wo felwa ngu vaveleki, ni noni, avale va hanyako kumweko ni nawe, mi na ya tsakela ka wukhalo wu wu nga sawulwa ngu MKOMA, Txizimu txako, kasi ku ditina dakwe di txi zumba kona.

¹² Alakanya ti to u ti ti khumbi ditikoni ka Egipta, ngu mhaka ya toneto, khutala u txi xayisa milayo yiya ni ku yi maha.”

¹³“U na maha M'buso wa Matenda amu ka mtxhanu wa masiku ni mambidi, msana ka kuva u di sengeletile mihando ya ha didhandoni kwako ni ya mu mkawuni kwako,

¹⁴kambe u na ti tsakela ka m'buso wako, awe, ni mwanana wako wa mfana ni wa dihorana, ni khumbi yako ya wamwamna ni ya wamsikati, ni Mulevhi, ni mluveli, ni wo felwa ngu vaveleki, ni noni, votshe vale va hanyako m'tini kwako.

¹⁵Amu ka mtxhanu wa masiku ni mambidi u na busa, u txi dhumisa MKOMA, Txizimu txako, ka wukhalo wule MKOMA a nga wu sawula, nguko MKOMA, Txizimu txako, a na kukatekisa ka wotshe mthumo wa kuelula kwako ni ka yotshe mithumo ya manza ako, ngu toneto u na zumba u di katekile ta tinene.

¹⁶Sikhati siraru ngu dilembe votshe vavamna va fanete kuya ti kombekisa masoni ka MKOMA, Txizimu txako, ka wukhalo wule ene a nga wu sawula: Ka M'buso wa Mapawu o mbi Tshumbelwa, ni ka M'buso wa Mavhiki ni ka M'buso wa Matenda; kambe a nga ti kombekise masoni ka MKOMA a sa ñola txilo;

¹⁷mmwani ni mmwani, a di ni mningelo wakwe, madingano ni ti MKOMA, Txizimu txako, a nga ku ningisa tona.”

¹⁸“U na veka valamuli ni vabhali, ka otshe madhoropa ale MKOMA, Txizimu txako, a no kuninga ka lihunzu ni lihunzu, vona va na thethisa vathu ngu kululama.

¹⁹U nga bihise mhaka, u nga ve ni txisawulela hagari ka vathu, kambe u nga tumele kuxavelelwa, nguko kuxavelela ka vhala maso a m'thu wo ziva, kambe ka jikisa mhaka ya vale i ku vo lulama.

²⁰ Tsimbilisa kululama dwe, kasi ku u na hanya, u txi mana thomba ya ditiko di MKOMA, Txizimu txako, a no kuninga.

²¹U nga phaye mindonga yo phaxela ka yona, hafuhi ni txiluvelo txi u no akela MKOMA, Txizimu txako.

²² Kambe u nga ti emisele[6] sithombe sa wukhongeli, nguko MKOMA, Txizimu txako, wa si venga.”