Read chopi Dhewuteronome 18 Bible Online

Dhewuteronome 18 - chopi bible

Dhewuteronome 18

¹“Vaphaxeli va ka Levhi, lotshe lihunzu la ka Levhi, kha va na mbi va ni txyavelo mwendo thomba kona Israyeli; va va na hanya ngu minigelo yile yi hiselwako MKOMA, ni sile si mlumbako.

² Ngu kumaha keto, kha va na mbi va ni thomba hagari ka vanawe; MKOMA ngene i kuthomba yawe, nga ti ene a nga va gela.

³Asiya koko si dingana kuamukelwa ngu vaphaxeli, ka vathu vale va mahako mhamba ngu homu, mwendo ngu txifuyo txatxidotho, ngu siya: Va na ningela ka mphaxeli, txiphanga, ni milaka ni divhi.

⁴U na va ninga mihando yo khata ya fulaho yako, ya vhinya yako ya yiphya ni mtona wako, kumweko ni matoya o khata kukaywa a tinvuta tako.

⁵Nguko MKOMA, Txizimu txako, a sawute, hagari ka totshe tihunzu tako, kasi ku e maneka masoni kwakwe, a txi maha mthumo wa wukhongeli ngu ditina da MKOMA, ene ni vanana vakwe, kala kupinduka.

⁶Se ngako a txita Mlevhi wokari ngu ka dimwedo da madhoropa ako, ahale ene a zumbako kona, ka dotshe ditiko da ka Israyeli, na a txi navela ngu yotshe mbilu yakwe, kuta ka wukhalo wu MKOMA a no wu sawula,

⁷a nata thumela ditina da MKOMA, Txizimu txakwe, kufana ni vanawe votshe va ka Levhi, vale va manekako koneyo masoni ka MKOMA,

⁸a na mana sakudya so dingana ni sa vamwani vaphaxeli, hahanze ka sile asi manako ngu kuxavisa thomba yakwe!”

⁹“Ngako u txi wulela ka ditiko di MKOMA, Txizimu txako, a no kuninga, u nga gonde mahanyelo o biha a vathu vonevo.

¹⁰Ku nga maneke hagari kwanu ni wammweyo wo hisa mwanana wakwe wa mfana mwendo wa dihorana ha mndiloni; hambi wa kuthumisa wuñanga, ni kuxaxuva, ni kuhuta, mwendo matiloti,

¹¹hambi wo thumisa wuloyi, ni wu a fembako, mwendo kuxaxuva, ni ku wotisa ka va kufa,

¹²ni wihi wule koko a mahetelako totshe tiya, njiyenyeko ka MKOMA; se ngu mhaka ya sinyenyeko siya, MKOMA Txizimu txako, a na va tshotsha kule ni nawe vathu vava.

¹³ U na va wo hetiseka, kufana ni MKOMA Txizimu txako.

¹⁴Nguko matiko awa u no ya ma khozisa, ma engisela vanyatixolo ni vauhuti; kambe MKOMA, Txizimu txako, kha ku tumeleli kumaha to nga eto.”

¹⁵ “MKOMA, Txizimu txako, a na ku humisela mprofeti wo fana ni nani, hagari ka va ka kwanu; awule mi no fanela ku mu engisa”;

¹⁶madinfano ni ti u nga kombelisa tona ka MKOMA, Txizimu txako, mmangoni ka Horebhi, ka ditshiku da msengeletano, u nga khawe: “Kha ni na mbi engeta ni txi engisa dipswi da MKOMA, Txizimu txangu, hambi kuwona mndilo wuwa wa hombe, nguko ni nga fa!”

¹⁷Sekoko MKOMA a to khene kwangu: “Vona va wombile ditshuri.

¹⁸Wona taku ni na va tumbulukisela mprofeti wo nga awe, hagari ka vanawe. Ni na veka mapswi angu txisofuni kwakwe, se ene a na va gela totshe ti ni no m'leleta tona.

¹⁹Se ngako ku txi maneka m'thu wo mbi engisa mapswi anu, aawa ma no huwelelwa ngu mprofeti ditinani kwangu, ani nipune ni na m'dhana e ta ti xamulela.

²⁰Kambe mprofeti wule a no tsana e womba-womba ngu ditina dangu, mhaka yi ani ni nga mbi mleleta, mwendo a txi womba-womba ngu ditina da simwani sizimu, eyo mprofeti a na fa.”

²¹Se ngako u txi ti wotisa mbiluni kwako, u txi khawe: “Se hi na ti zivisa kutxani ti to mhaka yiya, hi nga mhaka ya MKOMA kani?”

²²Ngako mprofeti a txi womba-womba ngu ditina da MKOMA, aniko mhakeyo yi si maheki mwendo yi si humeleli, tikomba ti to mhakeyo kha ya wombwa ngu MKOMA; mprofeti eneyo a wombawombile ngu kutiguleta, u nga mthave.