Read chopi Dhewuteronome 19 Bible Online

Dhewuteronome 19 - chopi bible

Dhewuteronome 19

¹Ngako MKOMA, Txizimu txako, a di fuvisile mifumo yile matiko a kona a no kuninga, ni kungako u di yi khozisile, u maneka u di akile madhoropani ka yona, ni ku va u txi zumba tinyumbani ka ona,

² u na sawula madhoropa mararu hagari ka ditiko di MKOMA, Txizimu txako, a no kuninga.

³U na lulamisa tinzila ta kona, u bhanda mihingano, u abanisa ditiko ngu madhawa mararu, ditiko di MKOMA, Txizimu txako, a no kuninga, di txi maha thomba yako; kasi ku ni wuhi a dayako m'thu e thavela kona.

⁴Se mhaka yi yi ningako m'dayi fanelo ya kulava wuthavelo kasi ku e hulukisa wutomi wakwe, ngu yiya. Awu a dayako muakelani wakwe ngu phango, na a sa thanga ngu ku m'venga.

⁵Kufana ni kungako mmwani m'thu a txi tsula ni muakelani wakwe txitingani, kuya ganga tikhuni; se mbimo yi a ndiwitako dianza dakwe, a di ni nzanga manzani, kasi kunganga mndonga, se nzanga yi gwandeka ha ka muhini, yi txi ya ganga muakelani wakwe, yi txi m'daya; konako ene a nga sikota kuthavela ka dimwedo da madhoropa oneyo, e hulukisa wutomi wakwe;

⁶i si nga toneto, mphoteli wa mnoha, ngu kuva a di henyile mbiluni kwakwe, a nga sikota ku mlondeta, kala a txi mmana e m'daya, ngako mpfhuka wa nzila i di wa hombe, na kasi m'thu eneyo a ti si nga ni fanelo yo m'daya, nguko a ti si m'vengi ka masiku ale ma nga pinda.

⁷Ngu toneto, ni ku layako ngu tona, ni txi khani: “Sawula madhoropa mararu.”

⁸Ngako MKOMA, Txizimu txako, a txi maha ti to ditiko dako di txi anda, nga ti a nga xambanya ka vatate vako, se e kuninga dotshe ditiko di a nga thembisa ti to a na di ninga vatate vako,

⁹(nguko ngako u txi xayisa ni kuvekisa sotshe sirumo siya nyamsi ni ku leletako, ngu kuva u txi randa MKOMA Txizimu txako ni kuva u txi tsimbila ngu tinzila takwe otshe masiku), sekoko u na va u txi engetela kambe mamwani madhoropa a mararu, ka ale a mararu o khata;

¹⁰kasi ku si thekeli mnoha wo mbi na mnandu ka ditiko di MKOMA, Txizimu txako, a no kuninga, di txi maha thomba yako, ni kuva ku si maneki mnandu wo thekela mnoha, txitimwi kwako.

¹¹Ti di ngeto, ngako m'thu wokari a txi maneka a txi phika muakelani wakwe, aha koza a txi m'baramela, a txi mu wukela, e m'daya, se ngu msana a txi thava e tutumela ka dimwedo da madhoropa ale,

¹²madhota a didhoropani mule, va na rumela vathu va txi ya mteka, e mningela manzani ka mphoteli wa mnoha, kasi ku e dawa nene.

¹³Kha kulaveki u txi mtsetsa; kambe u na fuvisa mhaka ya kutheketa mnoha wo mbi na mnandu ka va ka Israyeli se u na kateka.

¹⁴ U nga txitxe muhingano wa muakelani wako, awu vahombe vanu va nga wu bhanda amu ka thomba yi u no yi mana ka ditiko di MKOMA, Txizimu txako, a no kuninga di txi maha dako.

¹⁵ “Fakazi yimweyo yokha kha yi dingani ka mhaka ya m'thu, ni ka yihi mhaka yo biha mwendo txionho txokari, txi nga mahwa. Mhaka yi na tsaniswa ngu wufakazi wa vathu vambidi mwendo vararu.

¹⁶Ngako fakazi ya makuhu yi txi lumbeta m'thu mhaka yo biha, kasi kufakaza yi txi mu wukela

¹⁷sekoko vathu vale ngu wuhambunyeti wokari vavambidi valwako, va na ya ema masoni ka MKOMA, ni masoni ka vaphaxeli, ni masoni ka valamuli vale va no maneka va txi thuma ka masiku oneyo.

¹⁸Se valamuli va na xolisisa kha kwati mhaka; ngako fakazi i di ya makuhu, yi txi maneka yi di lumbetile muakelani wa yona,

¹⁹mi na yi mahela ati yona yi nga ti lava ku ti txi mahwa ka muakelani wa yona; se mi na thavisa kubiha hagari kwanu.

²⁰Kasi ku vamwani ngako va txi tiengisa, va na thava, va si swi va txi maha kubiha ko nga koneko hagari kwanu.

²¹ Diso dako di nga mtsetse. Wutomi wu na dihwa ngu wutomi, diso ngu diso, dikwasa ngu dikwasa, dianza ngu dianza, mkondo ngu mkondo.”