Read chopi Dhewuteronome 2 Bible Online

Dhewuteronome 2 - chopi bible

Dhewuteronome 2

¹Konako, hi to tshembereka, hi komba kuya txiwulani, ngu nzila ya Linene lo Bhilivila, nga ti MKOMA, a nga ni leletisa tona, se amu ka masiku o tala hi to tenderuka mmango wa Seyiri.

²Sekoko MKOMA a ni gete a txi kheme:

³Mi tsimbite ngutu mi txi tenderuka mmango wuwa. Tsimbilani, mi komba kuya wuphemba!

⁴ Leleta vathu u txi khawe: Anu mi na pinda ngu ka ditiko da vananu, i ku vanana va Esawu, avale va nga aka Seyiri; se vona va na mi thava, kambe mi fanate kutiwonela ngutu;

⁵mi nga va lwiseni, nguko kha ni na mbi mi ninga txilo txa ditikoni kwawe, hambi mpimo wa mkondo wumwewo wa ditiko dawe: Ngani ni nga ningela ka Esawu mmango wa Seyiri, wu maha thomba yakwe.

⁶Mi na xava ngu male sakudya si mi no dya, kambe mi na xava kwawe, ngu male, hambi ni mati o sela.

⁷Nguko MKOMA, Txizimu txako, a kukatekisile ka yotshe mithumo ya manza ako; kambe ene a ku pangalatile mu kutsimbilani kwako, ngu mu ka txiwula txa hombe. Mndani ka mune wa magumi a malembe, MKOMA, Txizimu txako, a ti ti ni nawe, ni txa tximwetxo tximaha kha txa pwateka kwako.

⁸Hi tshawunyetile ditikoni ka vanathu, i ku vanana va Esawu, avale va nga aka Seyiri, hi pindile ngu nzila ya Elate, ni ya Eziyoni-Gebhera. Ngu msana, hi to tshembereka, hi teka nzila ya txiwulani ka Mowabhi.

⁹ Sekoko MKOMA a ni gete a txi khene: “U nga m'vhuke Mowabhi, kambe u nga mlwise, nguko ani kha ni na mbi kuninga tximaha txa mu ditikoni kwawe. Nguko ni mningile ditiko da Are, di maha thomba ya vanana va Loti.”

¹⁰Kale ka kona, va Emime va ti akile kona; i ti vathu va hombe, vavangi, kambe i ti va txiemo txo lapha, ku nga va Anaki.

¹¹Vona va ti ti wombwa ku kha vona Mbarefayime, ku nga va ka Anaki; aniko va ka Mowabhi va ti ti va dhana ku mba ka Emime.

¹²Ditikoni ka Seyiri kale ka kona, ku ti akile Vahori, aniko vanana va Esawu, va to va xula, va txi va khozisa, ni ku va tekela ditiko, va txi aka makhaloni kwawe, nga ti va ka Israyeli va nga maha, va txi va tekela ditiko di MKOMA a nga va ninga, di txi maha dawe, va txi di fuma.

¹³“Konkuwa khukhani mi txi txhatuka mlonga wa Zeredhi!” Hi to txhatuka konako txinambwa txa Zeredhi.

¹⁴ Kukhukhela Kadhesi-Bharneya, kala hi txhatuka mlonga wa Zeredhi, dipfhumba dathu di tekile magumi mararu a malembe, ni mtxhanu wa malembe ni mararu, kala ku txi guma lotshe liveleko lile la masotxhwa, ale ma nga ti emisetwe yimbi, nga ti MKOMA a nga ti va xambanyete tona.

¹⁵Dianza da MKOMA di ti txitimwi kwawe, e va lovisa amu wugoveloni kwawe, kala va txi guma.

¹⁶Mbimo yi vathu votshe vale va ngadi emisetwe yimbi va nga maneka va di gumile hagari ka vathu, ngu kufa,

¹⁷MKOMA a ni gete a txi khene:

¹⁸Nyamsi u na tshawunyeta Are, ngu mihinganoni ni Mowabhi,

¹⁹ se u na hoka ka vanana va ka Amoni; u nga va lwise, kambe u nga va vhuke, nguko ani kha ni na mbi kuninga tximaha ni txa tximwetxo txa ditiko da vanana va ka Amoni; nguko ani ni di ningete ka vanana va Loti, di txi maha thomba yawe.

²⁰Kambe ditiko diya di ti ziwa ti to ditiko da Varefayime; kale ka kona Varefayime va ti ti akile ka dona, ngu mhaka yeto, va ka Amoni, va ti ti va dhana ku kha vona Vazam'zumini;

²¹i ti ti vathu va hombe, kambe i ti ti votala, va di ni txiemo txo lapha nga va ka Anaki; kambe MKOMA a va lovisile masoni ka Vaamoni, vale va nga va xula ve va tekela ditiko, ni kuzumba makhaloni kwawe,

²²ku nga ti a nga mahela vanana va Esawu, va di akile Seyiri, ta kulovisa va ka Horeyi, masoni kwawe; vona va to va xula, va txi vatekela wukhalo wawe, kala ni nyamsi kuwa.

²³Ngu Vahevhi, vale va nga ti akile mikhokholani kala Gaza, Vakafitori va va londisile, na va txi khukhela Kafitori, va txi aka makhaloni kwawe.

²⁴Khukhani mi tsula, mi txi txhatuka txinambwana txa Arnoni. Wona, ni mningete manzani kwako, Seyoni, mfumeli wa Hesibhoni, Muamori, ni ditiko dakwe; khata ngu ngene u txi mkhozisa; u mtekela ditiko.

²⁵Kukhukhela ka nyamsi, ni na khata kuthela dizowa, ni txidhukisa, ngu ngawe, otshe matiko awa ma ku hahatshi ka nzuma. Vathu va kona va na engisa nduma yako, va txi dhudhumela ngu dizowa masoni kwako, ve guma mtamo.

²⁶Sekoko Mbimo yi hi nga ti txiwulani ka Kedhemoti ni to rumela mitumi ka Seyoni, mfumeli wa Hesibhoni, ni mapswi o womba ngu kuthutha, ni txi khani:

²⁷“Ni tumelele ni pinda ngu ditikoni kwako; ni na tsimbila ngu nzila; kha ni na mbi jikela txinene hambi txibhabha.

²⁸Ngu didhawa da sakudya, awe u na ni xavisela ngu male, kasi ku ni txi mana kudya; kambe u na ni xavisela ngu male mati awa ni no sela. Ni tumelele ti to ni tshawunyeta ngu mikondo, dwe.

²⁹Nga ti vanana va ka Esawu va nga ni tumelela, avale va nga aka Seyiri, ni va ka Mowabhi va nga aka Are, kala ani ni txhatuka Jordhani, ni wulela ka ditiko diya MKOMA, Txizimu txathu, a nga hi ninga.”

³⁰Aniko Seyoni, mfumeli wa Hesibhoni, kha hi tumelela ti to hi pinda ngu ditikoni kwakwe, nguko MKOMA, Txizimu txako, a hangalasile moya wakwe ni mbilu yakwe, kasi ku e mningela manzani kwako, nga ti ti nga maheka kala ni nyamsi.

³¹MKOMA a ni gete a txi khene: “Wona taku ni khatile ku kuninga Seyoni ni ditiko dakwe. Khata ku di khozisa kasi ku ditiko dakwe di txi va i di ditiko dako!”

³²Seyoni a to ti huma ni vathu vakwe votshe e hi hingeta, kasi kutalwa ni nathu kona Jahaza.

³³MKOMA, Txizimu txathu, a mningete kwathu, se athu hi mkhozisile, kumweko ni vanana vakwe, ni votshe vathu va ditikoni kwakwe.

³⁴Ka txonetxo txikhati, hi tekile otshe madhoropa awe hi txi ma khundumusela, hi fuvisa vavamna ni vavasikati ni vanana, ku si sali ni wammweyo.

³⁵Aniko hi to teka sifuyo, ni sotshe sile hi nga handa ka ona madhoropa ale hi nga ma khozisa.

³⁶Kukhukhela Aroweri, ku ku mabambe ka mlonga wa Arnoni, ni didhoropa di di ku hagari ka mkova kala Gileyadhi, kuwalo didhoropa di athu hi nga mbi wulela ka dona; MKOMA, Txizimu txathu, a hi ningile otshe madhoropa masoni kwathu.

³⁷Aniko kha ha wulela ka ditiko da Amoni, kufana ni ka dotshe di ku mabambe ka mnambo wa Jakobe, kumweko ni madhoropa ale ma ku mmangoni ni sotshe si MKOMA, Txizimu txathu, a nga hi tsimba.