Read chopi Dhewuteronome 20 Bible Online

Dhewuteronome 20 - chopi bible

Dhewuteronome 20

¹“Mbimo yi u no huma ku yalwa yimbi ni valala vako, ngako u txi wona mahantxhi ni sikotxikani ni vathu vavangi, vo pinda awe, u nga va thave, nguko MKOMA, Txizimu txako awu a nga kuhumisa ditikoni ka Egipta, ana ni nawe.

²Se ku na maheka taku, mi txi lava kukhata kulwa, mphaxeli a na ema masoni ka vathu e womba-womba,

³a txi khene kwawe: Engisani anu va ka Israyeli, Nyamsi tshuketani mi txi yalwa ni valala vanu; yi nga wike misana yanu; mi nga va thaveni, kambe mi nga dhudhumeleleni, hambi ku telwa ngu dizowa masoni kwawe,

⁴MKOMA, Txizimu txanu koko, a tsimbila kumweko ni nanu, kasi kulwa ni valala vanu, a txi mi ninga kuxula.”

⁵Sekoko madhota ma na womba ka vathu, ma txi kha ona: “I mani hagari kwanu a nga aka nyumba ya yiphya, ayi a sinziko kukhata kuotela ka yona kani? A na khukhe a txi tsula m'tini kwakwe, kasi asi fi yimbini, se nyumba yakwe yi txi sala yi txi khata kuotelelwa ngu vamwani.

⁶Se i mani a nga phaya thembwe ya mivhinya, ayi a sinziko kumana mihando ya yona kani? A na khukhe a txi tsula m'tini kwakwe, kasi ku asi fi yimbini, se thembwe ya mivhinya yi txi khata kuelulwa ngu mmwani m'thu.

⁷Niku i mani a nga tekana ni wamsikati wokari, a sanziko ku muamukela kani? A na khukhe a txi tsula m'tini kwakwe, kasi asi fi yimbini, se mmwani m'thu a txi sala e mteka.”

⁸Se va na simama vathangeli va mazana ve womba ka vathu, va txi kha vona: “I mani a ku ni dizowa, awu a nga wika msana kani? A na khukhe a txi tsula m'tini kwakwe, kasi wupwembwe wakwe wu si tshapeli ka vanawe.”

⁹Se ku na maheka taku, vathangeli va di gwitile kuwombawomba ka vathu, va na sawulwa vahombe va mabutho a tiyimbi, ava va no thangela masoni ka vathu.

¹⁰Mbimo yi u no hoka hafuhi ka didhoropa dokari, u txi lava kukhata kulwa navo, u na va gela ngu mhaka ya kudikha.

¹¹Se ngako va txi kuangula ngu kuthutha va txi kutulela matimba, vathu votshe vale va manekako, ka didhoropa donedo, va na va tikhumbi tako, va txi kuthumela txibhalo.

¹²Kambe va si tumeli kupfana ni nawe, va txi lava kulwa ni nawe, awe u na ranganyeta didhoropa dwe.

¹³Se MKOMA, Txizimu txako, a na di ningela manzani kwako; u na lovisa vavamna votshe ngu ditxhari,

¹⁴hahanze vavasikati ni vanana, ni sihari; ni sotshe sile si no maneka didhoropanimo, sotshe si u no handa, u na si teka si txi maha thomba yako; u na dya sile u no handa ka valala vako, avale MKOMA, Txizimu txako, a nga va ningela manzani kwako.

¹⁵U na mahisa toneto ka otshe madhoropa ale ma ku kule ni nawe, madhoropa ale ma si lumbiko mifumo yiya.

¹⁶Kambe ka madhoropa a matiko awa MKOMA, Txizimu txako, a no kuninga ma txi maha thomba yako, u nga leke ni txa tximwetxo txivangwa txi txi hanya.

¹⁷U na va lovisa va txi bhi, votshe Vaheti, ni Vaamori ni Vakanana, ni Vaferezi ni Vahevhi ni Vajebhusi, nga ti MKOMA, Txizimu txako, a nga ku leletisa tona,

¹⁸kasi ku va si mi gondisi kumahetela kotshe kubiha kwawe, akule vona va nga txi mahetela ka sizimu sawe; nguko mi nga va mi txi onhela MKOMA, Txizimu txanu.

¹⁹Ngako u txi randela didhoropa dokari ngu mbimo yo lapha, u txi lwa nado kasi ku di teka, u nga dikhetele mindonga ya mihando ngu ku yi gangela ngu nzanga nguko u na dya mihando ya kona (mihando ya mindonga u na dya). Ina mndonga wa thembweni i m'thu wu ulwako nayo kani?

²⁰Aniko ngako i di mindonga yile u ti zivako ti to kha yi veleki mihando yo dyiwa, wa sikota ku yi sengulela, u txi yi wilela, u txi yi maha tiphande to ti bhiyela ngu tona; kasi ku ti vhikela ka didhoropa dile ulwako nado, kala kuza u txi di khozisa.