Read chopi Dhewuteronome 21 Bible Online

Dhewuteronome 21 - chopi bible

Dhewuteronome 21

¹Ngako ku txi tumbulwa txirumbi txa m'thu wa kufa txitingani ka ditiko dile MKOMA, Txizimu txako, a no kuninga, na asi ziwi awule a nga m'daya,

²sekoko madhoropa ako ni valamuli vako, va na huma va txi ya pima mnava, wa kukhukhela aha ka wu a nga dawa, kala ka madhoropa ale ma manekako hafuhi ni txirumbi.

³Se madhota a didhoropa dile di ku hafuhi ngutu ni txirumbi, ma na teka dirole da makati, adile di sinziko kuthuma, kambe di sinziko kurwala dikange.

⁴Madhota a didhoropa donedo ma na relela ni dirole, kala ka mkova wu ku ni txinambwana txa mati awa ma khulungako yotshe mbimo, ku nga mbi dimwa ni phaywa txilo ngu m'thu; se koneho, va na ganga thamo ya dirole ngu ha magondo.

⁵Sekoko vaphaxeli, i ku vanana va Levhi, va na tshuketa hafuhi, nguko ngu vona va nga sawulwa ngu MKOMA, Txizimu txako, kasi kuve maha mthumo wakwe, ni kukatekisa ngu ditina da MKOMA, kambe sisofu sawe ngu sona si fanelako kulamula ni kurulisa otshe maguwa a kuhenyisana ni a kupekana.

⁶Se otshe madhota ale ma ku hafuhi ka didhoropa di di ku ni txirumbi, ma na samba manza txitimwi ka dirole dile di nga gangwa thamo ha mlongani,

⁷kambe ma na huwelela ma txi kha ona: “Manza athu hi nga ona ma nga theketa mnoha wuwa, ni maso athu kha ma wona txilo.

⁸Divalela, MKOMA, vathu vako va ka Israyeli, avale awe MKOMA u nga va tirula; u nga tumele ti to mnoha wo mbi na txionho, wu txi thekela txitimwi kwathu, athu vanana vako va ka Israyeli.” Sekoko mnohewo wu na divalelwa.

⁹Ngu kumaha keto, u na thavisa mnoha wo mbi na mnandu hagari kwanu, nguko u na maha ti i ku to lulama masoni ka MKOMA.

¹⁰“Mbimo yile u no huma u txi ya yimbini kasi ku yalwa ni valala vako, ni kuva MKOMA, Txizimu txako, a txi va ningela manzani kwako, na u di va ñote nga tikhumbi,

¹¹se ngako u txi thuka u wona wamsikati wo tshura hagari ka tikhumbi, u mnavela, u txi lava ku mteka e maha msikati wako,

¹²sekoko, mteke u txi wuya nayo m'tini kwako, a na kuyulwa misisi ya ha msungo kwakwe, a txi sehelela syala sakwe,

¹³se a na thavisa syambalo sakwe sa wukhumbi, a txi zumba nyumbani kwako mndani ka mtxima, a txi saluka tate wakwe ni mame wakwe; msana ka toneto, u na tekana nayo, u va mwamna wakwe, a txi maha msikati wako.

¹⁴Se ku txi maheka ti to u si tsakiswi ngu ngene, awe u na mleka a txi ti tsulela a di txhatxhekile, aniko u nga mxavise ngu kulava male, u nga mahe dibhindu ngu mtamo wakwe, msana ka kuva u di m'wisile tingana.”

¹⁵Ngako wamwamna wokari a di ni vasikati vambidi, e maneka a txi randa ngutu mmweyo, se mmwani asi mrandi; ngako votshe ngu wumbidi wawe, va di m'velekete vanana vavafana, se matiwula a kona i di awule asi mrandiko,

¹⁶ku na maheka taku, ka ditshiku dile a no abanisela thomba ka vanana vakwe, a nga thangetise mwanana wa wule a mrandako, masoni ka mwanana wa matiwula a wule asi mrandiko.

¹⁷A na ninge wukhalo mwanana wa matiwula wa wule asi mrandiko, ngu kuva a txi mninga syavelo simbidi sa thomba, ya sotshe sile a ku naso, nguko eyo ngene i ku makhato a mtamo wakwe, ngene a ku ni fanelo ya wutiwula, wu wu mlumbako.

¹⁸Ngako m'thu wokari a di ni mwanana wa txihwiri, a di ni kanu, asi engisiko tate wakwe ni mame wakwe, awu waku, hambi va txi mlaya, kha khatali;

¹⁹sekoko, tate wakwe ni mame wakwe, va na mteka, ve tsula nayo ka madhota a didhoropa, ha txikeni ka didhoropa dawe,

²⁰se veya womba ka madhota a didhoropa va txi kha vona: “Mwanana wuwa wathu ana ni kanu, kambe kha nga ni txithavo, kha hi engisi, ana ni makolo, kambe didevi.”

²¹Sekoko vavamna votshe va didhoropa va na m'balisela ngu marigwi kala a txi fa. Ngu kumaha keto, u na heta wubihi hagari kwako, se votshe va ka Israyeli, ngako va txi tiengisa va na thava.

²²Ngako m'thu wokari a di mahile txionho txi a fanelako kudawa ngu txona, e dawa a txi hayekwa mndongani kokari,

²³ txirumbi txa kona txi nga zumbe ha mndongani wusiku wotshe; aniko u na txi kelela ka donedo ditshiku, nguko awule a nga txikitwa mbwo ruketelwa ngu Txizimu; ngu kumaha keto, u nga nyenyezise ditiko dako, adiya MKOMA, Txizimu txako, a no kuninga di maha thomba yako.