Read chopi Dhewuteronome 23 Bible Online

Dhewuteronome 23 - chopi bible

Dhewuteronome 23

¹Wamwamna wule a nga thenwa ngu kufaywa mwendo ngu kuwilwa, kha na mbi wulela msengeletanoni ka MKOMA.

²Ni wammweyo wo velekwa wugangoni, kha na mbi wulela msengeletanoni ka MKOMA; hambi liveleko lakwe la wugumi, kha li na mbi wulela msengeletanoni ka MKOMA.

³Ni wammweyo wa ka Amoni mwendo wa ka Mowabhi kha na mbi wulela msengeletanoni ka MKOMA; hambi lihunzu lakwe la wugumi, kha li na mbi wulela msengeletanoni ka MKOMA, ngu ha ku si gwitiko.

⁴ Nguko kha va mi hingeta hanzila ni sakudya ni mati, kuhumani kwanu ngu Egipta; kambe va xavile Bhalahamu, mwana Bheyori, wa kuta ngu Petori, ka Mesopotamiya, kasi ku e mi ruketela.

⁵ Aniko MKOMA, Txizimu txako, kha ti lava kuengisa Bhalahamu; kambe MKOMA, Txizimu txako, a to phemberusa txiruko txi maha txikatekiso, nguko MKOMA, Txizimu txako, a txi kuranda.

⁶U nga va lavele hambi kudikha mwendo wunene, ka otshe masiku ako, kala kupinduka.

⁷U nga nyenye muedhomi, nguko i mwananu; hambi kunyenye Muegipta, nguko u ti ti mluveli ditikoni kwawe.

⁸Vanana va mi no va veleka ka liveleko la wuraru, mmweyo ni mmweyo wawe, a na wulela msengeletanoni ka MKOMA.

⁹Ngako dibutho da yimbi di txi ya wukela valala vako, sekoko awe u na ema kule nato to biha.

¹⁰Ngako hagari kwako ku di ni wu a nga mbi sawuleka, a fanete kuhuma hahanze ka dibutho da yimbi; kha na mbi wulela hagari ka dibutho da yimbi.

¹¹Kambe ni minova, a na samba ngu mati; se ngu kuswa ka ditambo, e wulela wugoveloni.

¹²Kambe u na va ni wukhalo hahanze ka wugovelo; se koneyo u na huma hahanze.

¹³Se hagari ka matxhari ako u fanete kuva ni difoxola, kasi ku ngako u txi huma kuya ti ruma, u na ya kela diphala ngu dona, se u txi ti rumela kona, u kuletela mihambuko ya kona.

¹⁴Nguko MKOMA, Txizimu txako, a tsimbilela hagari ka wugovelo wako, kasi ku kutxhatxhisa ni kuningela valala vako manzani kwako; ngu kumaha keto, wugovelo wako wu na va wo sawuleka, kasi ku asi ku tshuraleli, ngako a txi wona to biha kwako.

¹⁵U nga ningele khumbi ka nyamne wa yona, ayile yi nga thava ka nyamne wa yona yi txi tutumela kwako.

¹⁶Khumbiyo yi na zumba ni nawe, hagari ka vathu vako, amu ditikoni kwako, ka wukhalo wu yona yi no wu sawula, amu ka dimwedo da madhoropa ako, adi yi no di lava; u nga yi xuphe!

¹⁷Kha ku na mbi va ni wugango hagari ka mahorana a ka Israyeli; hambi ku va ni Vasidhoni, hagari ka vanana va ka Israyeli.

¹⁸ U nga tise hakhelo ya wugango, mwendo mtengo wo dihelwa yimbwa, Nyumbani ka MKOMA, Txizimu txako, ngu kuxambanya kokari; nguko ngu wumbidi wa sona, nzinyenyeko ka MKOMA, Txizimu txako.

¹⁹U nga lombise somaha ka mwananu ngu kulava dibihindu; hambi dibhindu da male, ni dibhindu da sakudya, hambi dibhindu da ni txihi txo maha, txi lombiswako ngu kubhinduliswa.

²⁰ Ka vamatiko u na lombisa ngu kubhindulisa; aniko ka mwananu u nga lombise ngu kubhindulisa, kasi ku MKOMA, Txizimu txako, a na katekisa wotshe mthumo wa manza ako, ka ditiko dile di no kulumba.

²¹ Ngako u txi xambanya txixambanyo txokari ka MKOMA, Txizimu txako, u nga swele kuhumisa txi u nga xambanya, ngu ditshuri MKOMA, Txizimu txako, a na vilela kwako, se u na maneka u di ni txionho.

²²Kambe ngako u sa xambanya kumaha txilo, khu na mbi va ni txionho.

²³Aniko ti karate u tsanisa ni kumaha dipswi di u ngadi womba ngu txisofu txako, u txi maha mningelo ngu kuranda kwako upune ka MKOMA, Txizimu txako, nga ti ti humako ngu txisofuni kwako.

²⁴Ngako u txi wulela thembweni ka mivhinya ya muakelani wako, u na dya mauvha nga ti u ti lavisako tona, kala u txi khura, aniko u nga teke o veka thavanguni.

²⁵Ngako u txi wulela thembweni ka mwakelani wako, u na funya mafaka ngu dianza dako, aniko u nga wulete sikela thembweni ka mwakelani wako.