Read chopi Dhewuteronome 24 Bible Online

Dhewuteronome 24 - chopi bible

Dhewuteronome 24

¹ Ngako wamwamna a txi teka msikati wokari, a txi maha totshe tifaneko ta kutekana nayo, aniko ngu msana asi mtsakisi, ngu kuva a di tumbute mhaka yo mbi mtsakisa kwakwe, ene a fanete ku m'bhalela dipapilo do hambana nayo a txi mninga, kasi e mu humisa m'tini kwakwe.

²Se ngako a di humile m'tini kwakwe, eya maneka a txi tekana ni mmwani wamwamna,

³se nene a txi mleka, ngu kuva a txi m'bhalela dipapilo do hambana nayo, e mninga manzani kwakwe, a txi mtutumisa m'tini kwakwe; mwendo ngako a txi fa awu wamwamna a nga gwitisa ku mteka,

⁴wamwamna wo khata a nga ti mtekile, kha ti koteki ku e mteka kambe a txi maha msikati wakwe, msana ka kuva a di nyeyezisilwe; nguko eto i mhaka yo biha masoni ka MKOMA, kha kulaveki ti to e onhisa ditiko dile MKOMA, Txizimu txako, a no kuninga, di txi maha thomba yako.

⁵Ngako wamwamna i di ngadi kuteka msikati, kha nga ni fanelo yo tsula yimbini, hambi kurumelwa a txi ya ka wumwani mthumo; a na zumba m'tini kwakwe dilembe dotshe, kasi ku e tsakisa msikati wakwe a nga tekana nayo.

⁶U nga teke marigwi a mambidi a txigayo u txi zima mseve ngu ona, hambi dirigwi da txigayo da txitimwi, nguko eto ngu zima mseve ngu wutomi wa m'thu.

⁷Ngako m'thu a txi kuretwa a di ruruvisile Muisrayeli kulowe, kasi ku mmaha khumbi yakwe, mwendo kuve a txi mxavisa, edo dikhamba di fanete kudawa. Ngu toneto, u na fuvisa wubihi hagari kwanu.

⁸ Ti wonele ka mtungu wa tshekela, u txi engisa kwati, ni kumaha totshe tifanelo ti va no mi leleta tona.

⁹ Alakanya ati MKOMA Txizimu txako, a nga maha ka Miriyamu, ha nzila, kuhumani kwanu ngu Egipta.

¹⁰Ngako u txi lombisa tximaha txokari ka muakelani wako, u nga wulele nyumbani kwakwe, ngu kulava tximaha txo zima mseve ngu txona.

¹¹U na ema hahanze, se m'thu wu u nga mtxeneka, a nata hahanze, a txi kutisela mseve wakwe.

¹²Kambe ngako i di txisiwana, u nga otele u di ni tximaha txakwe, txile a nga zima mseve ngu txona.

¹³ Kuswani ka ditambo, u fanete ku mtshumetela tximaha txile a nga zima mseve ngu txona, kasi ku e otela a di ni tinguwo takwe, se a na kukatekisa. Se u na va u di lulamile masoni ka MKOMA, Txizimu txanu.

¹⁴U nga kalavele txithumi txile i ku txisiwana mwendo txikulungu, hagari ka va ka kwanu, mwendo mluveli wu a ku ditikoni kwanu, ni didhoropani kwanu.

¹⁵ U na mninga hakhelo yakwe ka ditshiku donedo, di sanzi kuswa ditambo, nguko ene njisiwana, a themba yona hakeloyo: A nga dila ka MKOMA ngu mhaka yako, se awe u txi mana mnandu.

¹⁶ Vaveleki kha va na kudawa ngu mhaka ya vanana, ni vanana kha va na kudawa ngu mhaka ya vaveleki. M'thu ni m'thu a na dawa ngu mhaka ya txionho txakwe ene nyamne.

¹⁷U nga jikise mhaka ya mluveli ni ya wo felwa ngu vaveleki, kambe u nga amukele syambalo sa noni, si txi maha so zima mseve ngu sona.

¹⁸ Alakanya ti to na nawe u ti ti khumbi ditikoni ka Egipta, ni ti to MKOMA, a kuthavisile koneyo. Ngu toneto, ni kuleleta ti to u hanyisa toneto.

¹⁹Ngako u txi elula mafaka thembweni kwako, u txi thuka u divala mlumbi, u nga tshumele u txi ya rolela, nguko mafakeyo ma siyele mluveli, ni wo felwa ngu vaveleki, ni wule i ku noni, kasi ku MKOMA, Txizimu txako, a na kukatekisa, ka yotshe mithumo ya manza ako.

²⁰Ngako u txi zuza mihando ya miolivha yako, u nga engete u txi zuza ni madhavi a kona, nguko misalela yi na lumba mluveli, ni wo felwa ngu vaveleki, ni noni.

²¹Ngako u txi elula m'vhinya wako, u nga tshumelete u txi ya lavetela mkumba, wo lumba mluveli, ni wo felwa ngu vaveleki, ni noni.

²² Alakanya ti to na nawe u ti ti khumbi ditikoni ka Egipta. Ngu toneto, ani ni ku leletako ti to u hanyisa tona.