Read chopi Dhewuteronome 25 Bible Online

Dhewuteronome 25 - chopi bible

Dhewuteronome 25

¹Ngako vathu vambidi va txi henyisana, se ve yisa mhaka banzani kasi kuya lamulwa, valamuli va na thusa awu a nga lulama, va txi sunga awu a ku ni mnandu

²Ngako awule a ku ni mnandu a di ni fanelo yo pekwa, mlamuli a na ruma ti to a txi bubuma, se e ruma ti to e pekwa masoni kwakwe, ngu mtengo wa mapeko awa ma fanelako mnandu wakwe.

³A na ningwa amu ka mune wa magumi a mapeko, ku si pindiswi, kasi ku mwananu asi thelwi tingana masoni kwako, ngako a txi pekwa kupinda ewo mtengo.

⁴ U nga sunge txisofu txa homu mbimo yile yi hulako.

⁵Ngako mkoma ni mnanda va txi zumba wukhalo wumwewo, se mmweyo wawe a txi fa, a sa nga siya mwanana, msikati wule wa mfi, kha na mbi khukha ha m'tini, a txi ya tekana ni mmwani wamwamna, i si nga dixaka da ha mwayani ka wule a nga fa, a na va a txi tekwa ngu mwanawe mfi, kasi kutatisa fanelo yakwe, nga ha i ku ndombe.

⁶ Se ku na maheka taku, mwanana wa matiwula a no va a txi velekwa, a na raywa ditina da mfi, kasi ku ditina dakwe di si pfhiteki amu ka Israyeli.

⁷Aniko, ngako ndombe yakwe yi txi lamba ku msambela awule wa mfelakazi, a txi va msikati wakwe, awuwa wamsikati a na tsula ka madhota ha banza, a txi ya khene: “Ndombe yangu ya lamba kuwusa ditina da mwanawe amuwa ka Israyeli; kha ti lavi ku ni sambela thaka, i ku fanelo ya ndombe, kwangu!”

⁸Konako, madhota a m'tini kwawe, ma na m'dhana ma txi bhula nayo. Ngako a txi simama e lamba, a txi khene: “Kha ni lavi ku mteka, a txi va i di msikati wangu;”

⁹ sekoko awule wa noni a na tshuketa hafuhi kwakwe, na a txi wonwa ngu madhota, a txi mthavisa tikathula, e mthurela khoheni, e nama a txi khene: “Ngu tona tiya ti no mahwa ka wamwamna wule a lambako kuwusa nyumba ya mwanawe”;

¹⁰se amuwa ka Israyeli, ku na dhanwa taku mwaya wa Nyakuthaviswe-kathula.

¹¹Ngako vavamna vambidi va txi lwa ngu txawe, se msikati wammweyo wawe a txi tshuketa kasi ku e lwela mwamna wakwe ka wule a mfutelako, se a txi nawuluta dianza dakwe, a txi mñola mpele wakwe,

¹²sekoko awe u fanete ku m'wila dianza dakwe, u nga mpfele wusiwana!

¹³U nga ve ni mipimo yimbidi yo hambana, amu mkwamani kwako, wumwewo wo nemela ni wumwani wo hehuka.

¹⁴Amu nyumbani kwako u nga ve ni mipimo yimbidi yo hambana ya efa; wumwani wa hombe ni wumwani wa wudotho.

¹⁵U fanete ku va ni mpimo wumwewo wo nemela wa kuhetiseka ni kululama, ni mpimo wumwewo wa efa, wa kuhetiseka ni kululama, kasi ku masiku ako ma txi anda amuwa ka ditiko di MKOMA, Txizimu txako, a no ku ninga.

¹⁶ Nguko MKOMA, Txizimu txako, wa nyenya votshe vale va mahetelako toneto, votshe vale va kanganyisako.

¹⁷ Alakanya ati Vaamaleki va nga ku mahela hanzila, mbimo yile u nga huma ngu Egipta:

¹⁸Vona va mi hingelete hanzila, mbimo yile mi nga ti karate, mi txi maneka mi di gumile mtamo, vona va mi wukete, va txi mi tela ngu msana, ve ta dayela votshe avale va nga ti karate, va nga si sikoti kumaha txilo, evo vathu kha va thavi Txizimu.

¹⁹ Ngu toneto, mbimo yi MKOMA, Txizimu txako, a no kuninga kuhumula, a txi kuhulukisa, ka votshe valala vako, avale va ku randelako, ka ditiko dile MKOMA, Txizimu txako, a no kuninga kasi ku u txi di teka di txi maha thomba yako, u fanete kufuvisa ditina da Vaamaleki, hahatshi ka nzuma. U nga divale, ati ni mi gelako.