Read chopi Dhewuteronome 26 Bible Online

Dhewuteronome 26 - chopi bible

Dhewuteronome 26

¹Se ku na maheka taku, mbimo yi u no wulela ka ditiko dile MKOMA, Txizimu txako, a no kuninga, di txi maha thomba yako, u txi di teka ni kuaka ka dona,

² sekoko u na teka mihando yo khata ka yotshe mihando yile u no elula ka dona ditiko dile MKOMA, Txizimu txako, a no kuninga, u na yi veka amu ka txirundu, u txi tsula nayo ka wukhalo wule MKOMA, Txizimu txako, a no wu sawula, kasi ku ditina dakwe di txi dhumiswa ka wona.

³Se u nata ka mphaxeli wule a no va a di ha mthumoni, ka masiku oneyo, u txi ya khawe kwakwe: “Nyamsi na ti bika ka MKOMA, Txizimu txathu, ti to ni bwakile ka ditiko diya MKOMA a nga xambanyela vatate vathu, ti to a na va ninga dona.”

⁴Se mphaxeli a na teka txirundu manzani kwako, e txi veka masoni ka txiluvelo txa MKOMA, Txizimu txako.

⁵Sekoko awe u na womba ka MKOMA, Txizimu txako, u txi khawe:[7] “Tate wangu, i ti Muaramu wa mpepeseki, ene a relete ditikoni ka Egipta, a txi ya aka kona, a di ni vathu vavadotho; ngu msana a mahile mfumo wa hombe, wa mtamo, wa vathu votala.

⁶Aniko Vaegipta, va hi xuphile ni ku hi xanisa, va txi hi thumisa mithumo ya wukhumbi yo nemela.

⁷Sekoko hi to peka huwa, ka MKOMA, Txizimu txa vatate vathu; se MKOMA a engisile dipswi dathu, e wona wukhumbi wathu, ni mithumo yathu ni kuxupheka kwathu.

⁸Se MKOMA a to hi humisa ditikoni ka Egipta ngu dianza da mtamo, ni diwoko do nawulutwa, hagari ka kudhuka ka hombe, kumweko ni sikombiso ni sidiwukiso;

⁹se a hi tisile ka wuwa wukhalo, a txi hi ninga ditiko diya, ditiko di di khulungako masi ni wulombe.

¹⁰Se wona taku, ni tisile mihando yo khata ya mafu awa u nga ni ninga, awe MKOMA.” Sekoko u na yi veka masoni ka MKOMA, Txizimu txako, kambe u na khizama masoni ka MKOMA Txizimu txako.

¹¹Se u na tsaka, u tsakela totshe tinene tile MKOMA, Txizimu txako, a nga ku mahela awe ni yotshe nyumba yako, kumweko ni Mlevhi ni mluveli wule a zumbako hagari kwanu.

¹² Ka dilemba da wuraru, dilembe da sa wugumi, ngako u di gwitile kuthavisa sa wugumi ka sotshe sile u nga elula, u na si ningela ka Mlevhi, ni ka mluveli, ni ka wo felwa ngu vatate, ni noni, kasi kuva txi dya, ve khura amu didhoropani kwako.

¹³Se awe u na ya womba masoni ka MKOMA, Txizimu txako, u txi khawe: Ni thavisile[8] amu nyumbani kwangu asi si nga sawuleka, ni txi si ningela ka Mlevhi, ni ka mluveli, ni ka wo felwa ngu vaveleki, ni ka noni, nga ti u nga ni leletisa tona. Kha na ndaka, kambe kha na divala sirumo sako.

¹⁴Kha na dya txilo kupandisekani kwangu, ni mbimo yile ni nga maneka ni sa basa, kha na thavisa txilo ka sona, hambi kumaha mningelo ngu sona ka vafi; ni engisile dipswi da MKOMA, Txizimu txangu, kambe ni mahile totshe nga ti u nga ni leletisa tona.

¹⁵Wonisisa u di ha wukhaloni kwako ko sawuleka ka nzumani, kambe katekisa ngamu yako ya ka Israyeli, kumweko ni mafu ale u nga hi ninga, nga ti u nga xambanya ka vatate vathu, ditiko di di khulungako masi ni wulombe.

¹⁶Ka ditshiku diya, MKOMA, Txizimu txako, a kuleleta ti u fanelako ku ti maha ngu milayo yiya ni sileleto siya, u na yi vekisa ni ku yi maha ngu yotshe mbilu yako ni wotshe moya wako.

¹⁷Nyamsi u tsanisile ti to MKOMA, ngene i ku Txizimu txako, ni ti to u na tsimbila ngu tinzila takwe, ni kuvekisa milayo yakwe, ni sileleto sakwe, ni sirumo sakwe, ni kuengisa dipswi dakwe.

¹⁸ Se MKOMA a tsanisile nyamsi tito, awe u ditiko da kulumba ene apune, nga ti a nga kuthembisa tona, ni ti to u fanete kuxayisa sotshe sirumo sakwe.

¹⁹Kasi ku a na kuguleta txitimwi ka otshe matiko awa a nga ma maha, u txi ma pala otshe ngu wudhumo ni nduma, ni kupfaliswa, u txi maha ditiko di di nga sawulekiselwa MKOMA, Txizimu txako, nga ti ene apune a nga wombisa tona.