Read chopi Dhewuteronome 27 Bible Online

Dhewuteronome 27 - chopi bible

Dhewuteronome 27

¹Se Mosi ni madhota a va ka Israyeli, va to laya vathu, va txi kha vona: “Vekisani sotshe sirumo si nyamsi ni mi ningako.

²Ku na maheka taku, ka ditshiku di mi no txhatuka mnambo wa Jordhani, mi txi ya wulela ka ditiko dile MKOMA, Txizimu txako, a no kuninga, u na ya emisa marigwi a hombe, u txi ma penda.

³Se ngu txitimwi ka ona, u na bhala otshe mapswi a mlayo wuwa, ngako u txi thuka u txi ya wulela ka ditiko dile, MKOMA, Txizimu txako, a no kuninga, ditiko dile di khulungako masi ni wulombe, nga ti a nga ku gelisa tona MKOMA, Txizimu txa vatate vako.

⁴Se ku na maheka koko taku, msana ka kuva u di txhatukile mnambo wa Jordhani, u na ya emisa ona marigwiyo, nga ti nyamsi ni mi leletisako tona, txitimwi ka mmango wa Ebhali, u na ya ma penda ngu dibumba.

⁵Se koneyo u na ya aka txiluvelo txo lumba MKOMA, Txizimu txako, ngu txiluvelo txa marigwi txo mbi khwekhwetwa, ngu simbi.

⁶Ngu marigwi o mbi khwekhwetwa u na ya aka txiluvelo txa MKOMA, Txizimu txako; se txitimwi ka txona u na ningela mphaxo wo hiswa ka MKOMA, Txizimu txako.

⁷Koneyo u na ya maha mningelo wa mpatano, kambe u na ya dya u txi tsaka, masoni ka MKOMA, Txizimu txako.

⁸Se txitimwi ka ona marigwiyo, u na bhala otshe mapswi a mlayo wuwa, u txi ma txhamusa ta tinene.”

⁹Mosi a to womba-womba kkambe ka vaphaxeli va Valevhi, ni ka votshe va ka Israyeli, a txi khene: “Zumba u di malate, kambe engisa, awe Israyeli: Nguko nyamsi u ditiko ka MKOMA, Txizimu txako.

¹⁰Ngu mhaka yeto, u na engisa dipswi da MKOMA, Txizimu txako, u txi xayisa sirumo sakwe ni milayo yakwe, ayile ni nga kuleleta nyamsi.”

¹¹Se ka donedo ditshiku, Mosi a to laya vathu, a txi khene:

¹²Mbimo yi mi no txhatuka mnambo wa Jordhani, ava va no ema mmangoni ka Garizime, kasi kukatekisa vathu, gu vava: Simiyoni, ni Levhi, ni Judha, ni Isakari ni Josefa, ni Bhenjamini.

¹³Se ava va no ema mmangoni ka Ebhali, kasi kuva txi womba mapswi a kuruketela, ngu vava: Rubheni, ni Gadhi, ni Aseri, ni Zebhuloni, ni Dhani, ni Naftali.

¹⁴Se va ka Levhi va na womba ngu dipswi da hombe ka vathu votshe va ka Israyeli, va txi kha vona:

¹⁵ “Dikhombo di nave ka m'thu wule a mahako txithombe txo vatwa, mwendo txo bhakwa, nguko manyala ka MKOMA, tximaha txa mthumo wa manza a vathu, a txi txi khozela kusisalani!” Se vathu votshe va na womba va txi kha vona: “Amen!”

¹⁶“Dikhombo di nave ka wule a vengako tate wakwe ni mame wakwe!” Vathu votshe va na womba va txi kha vona: “Amen!”

¹⁷“Dikhombo di nave ka wule a txitxako muhingano wa muakelani wakwe!” Vathu votshe va na womba va txi kha vona: “Amen!”

¹⁸“Dikhombo di nave ka wule a timetako dibhofu ha nzila!” Vathu votshe va na womba va txi kona: “Amen!”

¹⁹“Dikhombo di nave ka wule a hambukisako fanelo ya mluveli, ni ya wo felwa ngu vaveleki, ni noni!” Vathu votshe va na womba va txi kha vona: “Amen!”

²⁰“Dikhombo di nave ka wule a otelako ni msikati wa tate wakwe, nguko wa vhunungula didhamba da tate wakwe!” Vathu votshe va na womba va txi kha vona: “Amen!”

²¹“Dikhombo di nave ka wule a otelako ni txihari!” Vathu votshe va na womba va txi kha vona: “Amen!”

²²“Dikhombo di nave ka wule a otelako ni ndiyakwe, i ku mwanana wa tate wakwe, mwendo mwanana wa mame wakwe!” Vathu votshe va na womba va txi kha vona: “Amen!”

²³“Dikhombo di nave ka wule a otelako ni mkokati wakwe!” Vathu votshe va na womba va txi kha vona: “Amen!”

²⁴“Dikhombo di nave ka wule a dayako muakelani wakwe kusisalani!” Vathu votshe va na womba va txi kha vona: “Amen!”

²⁵“Dikhombo di nave ka wule a tumelako kufidhwa kasi kudaya m'thu wo mbi na mnandu!” Vathu votshe va na womba va txi kha vona: “Amen!”

²⁶ “Dikhombo di nave ka wule a si ñolisisiko mapswi a mlayo, asi ma vekisi!” Vathu votshe va na womba va txi kha vona: “Amen!”