Read chopi Dhewuteronome 28 Bible Online

Dhewuteronome 28 - chopi bible

Dhewuteronome 28

¹“Se ku na maheka taku, ngako u txi pfa dipswi da MKOMA, Txizimu txako, u vekisa sotshe sirumo sakwe, asi ni ku leletako nyamsi, MKOMA, Txizimu txako, a na kuguleta txitimwi ka yotshe mifumo ya ha mafuni.

²Se otshe makatekwa ma nata txitimwi kwako, me ta kufenengeta, ngako u txi engisa dipswi da MKOMA, Txizimu txako:

³U na katekiswa amuwa didhoropani, u katekiswa kambe ni thembweni.

⁴Wu na katekiswa muhando wa mndani kwako, ni muhando wa thembweni kwako, ni muhando wa sifuyo sako, i ku marole a tihomu tako, ni sinvutana sa tinvuta tako.

⁵Ku na katekiswa thavangu yako, ni ditxhelo dako.

⁶U na katekiswa mbimo yi u wulelako, u katekiswa ni mbimo yile u humako.

⁷MKOMA a na ningela valala vako, vale va no kuwukela, ve dawa masoni kwako; va nata ngu nzila yimweyo kutalwa ni nawe, aniko va nata hangalaka ve thava ngu mtxhanu wa tinzila ni timbidi.

⁸MKOMA a na ruma ti to makatekwa ma txi simama kwako, amu sizendani kwako ni ka yotshe mithumo ya manza ako; kambe a na kukatekisa ka ditiko dile a no kuninga.

⁹MKOMA a na kumaha ditiko dakwe do sawuleka, nga ti ene a nga ku xambanyela, ngako u txi vekisa sirumo sa MKOMA, Txizimu txako, ni kungako u txi tsimbila ngu tinzila takwe.

¹⁰Se vathu va mafu otshe, va na ti wona ti to u dhanwa ngu ditina da MKOMA, va na kuthava.

¹¹MKOMA a na andisa sihiwa sa mihando ya mndani kwako, ni sa mihando ya thembweni kwako, ka ditiko di MKOMA a nga xambanya ka vatate vako ti to va na kuthava.

¹²MKOMA a na kutulela thomba yakwe ya yinene, i ku nzuma, kasi ku e nisa mati ngu mbimo ya kona amu ditikoni kwako, ni kukatekisa wotshe mthumo wa manza ako; awe u na txenekisa ka mifumo yotshe, aniko awe khu na mbi txeneka, txilo ka yona.

¹³Se MKOMA a na kuveka kuva msungo, i si nga ka mkila, mbimo yotshe u na va u di txitimwi, i si nga kuva u di hahatshi, ngako u txi engisa ni kuvekisa sirumo sa MKOMA, Txizimu txako, asiya nyamsi ni ku leletako ti to u txi si vekisa, ni ku si londisa.

¹⁴Ngako u si hambuki uya txinene mwendo txibhabha, ka otshe mapswi ale ni ku leletako ona, kasi u si londisi simwani sizimu, u txi si thumela.”

¹⁵Kambe ku na maheka taku, ngako u si engisi dipswi da MKOMA, Txizimu txako, u si khatali ngu kuvekisa sotshe sirumo sakwe ni sotshe sileleto sakwe, asi nyamsi ni kugelako, ni txi kuninga, makhombo otshe ma na wa txitimwi kwako, ma txi kupfinya.

¹⁶U na ruketelwa amu didhoropani, u ruketelwa kambe thembweni kwako.

¹⁷Txi na ruketelwe txirundu txako ni ditxhelo dako.

¹⁸Yi na ruketelwa mihando ya mbeleko yako, ni mihando ya thembweni kwako, marole a tihomu tako ni sinvutana sa tinvuta tako.

¹⁹U na va ni dikhombo kuwulelani kwako, kambe u na va ni dikhombo kuhumani kwako.

²⁰MKOMA a na kurumela makhombo, ni kuxaniseka, ni kumwalalelwa ka yotshe mithumo ya manza ako, kala u txi loviswa, u fuviswa ngu txikuluveta, ngu mhaka ya kubiha ka mithumo yako, yile u nga ni leka ngu yona.

²¹MKOMA a na maha ti to mtungu wu txi namarela kwako, kala wu txi kufuvisa ka ditiko di u wulelako ka dona, kasi ku u txi di teka.

²²MKOMA a na kupeka ngu malwati a ndere ni txindeyandeyane, ni kusimba, ni kuhisa, ni lisani, ni kusina ka timbewu, ni kubhirela, asi si no kunamarela kala u txi fuva.

²³Nzuma yi ku txitimwi ka msungo wako, yi na banga nga koporo, ni mafu hahatshi ka mikondo yako, ma na nga simbi.

²⁴MKOMA a na leka kunisa mati, ditikoni kwako, a txi nisa dikhuma ni lithulu, asi si no kuwela, si txi ta ngu nzumani, kala kuza u txi lova.

²⁵MKOMA a na maha ti to u txi xulwa ngu valala vako, u na huma u txi yalwa ni valala vako ngu nzila yimweyo, kambe u na ya tutuma u txi thava ngu mtxhanu wa tinzila ni timbidi, masoni kwawe! U na va txixamaliso ka mifumo yotshe ya ha mafuni

²⁶txirumbi txako txi na va i di sakudya ka sinyana sa nzuma, ni sa sihari sa mafu; eho kha ku na mbi va ni wammweyo wa ku si dinda.

²⁷MKOMA a na kuxupha ngu silonda sa mazuku a Egipta, ni sithunye, ni txigwere, ni mathanzi, kha ku na mbi maneka wa ku kuhanyisa ka sona.

²⁸MKOMA a na kutsayisa ngu lizungu, ni wubhofu, ni wuhundwa;

²⁹ni mitshikari, u na tsimbila ngu kumbumbutela nga dibhofu, adi di mbumbutelako mtemani, mithumo yako kha yi na mbi humelela kotshe tinzilani kwako. U na xuphwa u txi handwa otshe masiku, ku si maneki ni wammweyo wo kuvhikela.

³⁰U na wuta msikati aniko mmwani wamwamna a na otela nayo, u na aka nyumba kambe khu na mbi zumba ka yona; u na dima u txi phaya mivhinya, aniko khu na mbi dya mihando ya kona.

³¹Homu yako yi na dawa u txi yi wona, kambe khu na mbi dya nyama ya kona; mbongola yako yi na tekwa masoni kwako, aniko kha yi na mbi tshumela yi txi wuya kwako; tinvuta tako ti na ningwa valala vako, ku si maneki ni wammweyo wo kulwela.

³²Vanana vako va mazambi ni vamahorana va na ningelwa ka yimwani mifumo; ni maso ako ma na ti wona toneto, ma txi dokovela ngu kuxuva wusiku ni mitshikari, aniko dianza dako di na pwata mtamo, di si sikoti kumaha txilo.

³³Mihando ya thembweni kwako ni ya mithumo yako yotshe, yi na dyiwa ngu vathu vale u si va ziviko, kambe awe u na xaniswa u txi xuphwa otshe masiku.

³⁴U na maneka u txi hundeka ngu totshe ti u no ti wona ngu maso ako.

³⁵MKOMA a na kupeka ngu silonda sa mazuku o thisa, amu mazoloni kwako, ni mu minengeni kwako, asi u no mbi va ni kuhanya ka sona, kukhukhela sizenendeni ka mikondo yako, kala ha msungo.

³⁶MKOMA a na ku rurisa awe, kumweko ni mfumeli wule u no va u di m'vekile txitimwi kwako, a txi kuyisa ka ditiko di u si di ziviko awe ni vatate vako, se koneyo u na ya khozela simwani sizimu, so mahwa ngu mapulango ni marigwi.

³⁷U na va u di txidiwukiso, ni txisekiso, ni txiruko, hagari ka vathu votshe vava, MKOMA a no va a di ku yisile kwawe.

³⁸U na dima u txi phaya mbewu yayingi thembweni kwako, aniko u na elula sa sidotho, nguko humbi yi na si heta.

³⁹U na dima u txi phaya mivhinya, u txi yi sakulela, aniko khu na mbi sela vhinya ya kona, hambi kuhapha mauvha a kona, nguko mpungu wu na ma pukutela.

⁴⁰U na va ni miolivha kotshe ditikoni kwako, aniko khu na mbi tola mafura a kona, nguko mihando ya kona yi na mora.

⁴¹U na veleka vanana va mazambi ni vamahorana, avale va no mbi kulumba, nguko va na tsula wukhumbini.

⁴²Yotshe mindonga yako ni mihando ya mafu ako, si na dyiwa ngu sikalani.

⁴³Awule i ku mluveli a zumbako hagari kwanu, a na humelela ngutu txitimwi kwako, se awe u na wa ngutu hahatshi.

⁴⁴Ene a na ku txenekisa awe, kambe awe khu na mbi mtxenekisa txilo; ene ngene a no va a di masoni kwako, kambe awe u na va u di mkila kwakwe.

⁴⁵Otshe makhombo awa ma na wa txitimwi kwako, ma txi kulondetela, ma txi kukhubhunyeta, meza me kulovisa, kala u fuva, nguko awe khwa engisa dipswi da MKOMA, Txizimu txako, kambe khwa vekisa sirumo sakwe ni milayo yakwe, ayile a nga kuleleta yona.

⁴⁶Makhombo awa ma nava i di txikombiso ni txidiwukiso masoni kwako, ni ka liveleko lako, kala kupinduka,

⁴⁷nguko khwa thumela MKOMA, Txizimu txako, ngu kutsaka ni kubasa ka mbilu, ngu mhaka ya kutalelwa ngu silo sotshe.

⁴⁸Na nawe u na khozela valala vako, avava MKOMA a no va rumela, kasi ku ta kuwukela u di ni nzala, ni ditora, ni wusakato, ni kupwata sotshe; a na va ruma va txi sanzeka dikange da simbi thamoni kwako, kala u txi loviswa.

⁴⁹MKOMA a na ku tisela mfumo wa kuta ngu kule, mfumo wa magwito ka mafu, awule wu nota ngu kupuruma nga ngungwa, mfumo wu wu wombawombako ngu lidimi li awe u si li ziviko.

⁵⁰Awule mfumo wu ku ni khohe yo banga, awule wu si tsetsiko vale i ku vo kumba, mfumo wu wu si tsetsiko vanana.

⁵¹Wona wu na dya marole a sifuyo sako, ni mihando ya mafu ako, hambi mtona, hambi marole a tihomu tako, ni sinvutana sa tinvuta tako, kala kuza u txi lova.

⁵²Wona wu na kurandela amu ka madhoropa ako otshe, kala kuza ma txi khundumuka maguma o demba a madhoropa ako otshe o tsana, aawa u nga ti ma themba amu ka dotshe ditiko dako, wu na kurandela ka otshe madhoropa ako, amu ka dotshe ditiko dile MKOMA, Txizimu txako, a ku ningako.

⁵³Se ngu mhaka ya kuxaniswa, ni kurandelwa ngutu ngu valala vako, u na dya mihando ya mndani kwako; i ku nyama ya vanana vako va mazambi ni vamahorana, avale MKOMA, Txizimu txako, a nga kuninga.

⁵⁴Hambi m'thu wo ti themba, awu i ku txivelekwa, hagari kwanu, a na wona ngu maso a kubonzolota mwanawe, ni msikati wule i ku txirandwa txakwe, ni vanana vakwe vale va nga sala va txi hanya;

⁵⁵kha ti lavi kuha ni wammweyo, nyama ya vanana vakwe, ayi a no dya, ngu kuva asi nga ni txilo, ngu mhaka ya kurandelwa ni kuxaniswa ngu valala vako, avale va no kupfinya, amu madhoropani kwako kotshe.

⁵⁶Wamsikati wa kutithemba, awu i ku txivelekwa, kwanu, awu asi laviko ni kukanda hahatshi ngu mhaka ya wuvelekwa wakwe, a na wona ngu maso a kubonzolota wamwamna wu i ku txirandwa txakwe, kumweko ni mwanana wakwe wa dizambi ni wa dihorana.

⁵⁷ Hambi ni mwanana wakwe wo ngadi kuvelekwa, ni digulo di di humako hagari ka minenge yakwe, nguko ngako ku txi guma sotshe, ene a na dya a di mu kusisalani, ngu mhaka ya kurandelwa ni kuxaniswa ngu valala vako, amu madhoropani kwako kotshe.

⁵⁸Ngako u si khatali ngu kuvekisa otshe mapswi a mlayo wuwa, aawa ma nga bhalwa ka dibhuku diya, ni kuthava ditina diya da wudhumo ni kuthisa, da MKOMA, Txizimu txako,

⁵⁹MKOMA a na kupeka awe ni liveleko lako, ngu mitungu yo xamalisa, mitungu ya hombe ya kusimasima yi si pindi, mipando yo biha, yo mbi kalamuka.

⁶⁰MKOMA a na wuyisa kwako mitungu yotshe ya Egipta, ayile yi nga kudhukisa, ayile yi no thapela kwako.

⁶¹Kambe MKOMA a na rumela kwako yotshe mipando ni mitungu, ayi yi nga mbi bhalwa ka dibhuku diya da mlayo, kala kuza u txi fuviswa.

⁶²Ku na sala vathu vavadotho kwanu, anu mi nga ti vavangi nga tinyeleti ta nzumani. Ngu mhaka ya kwa mbi engisa kwanu dipswi da MKOMA, Txizimu txanu.

⁶³Ngu toneto, kufana ni kuwa MKOMA a nga txi tsaka ngu ku mi mahela ta tinene, ni ku mi andisa, kufana ni toneto, a na tsaka kambe ngu kuva mi txi loviswa, mi txi fuva; nanu mi na dulwa mi txi humiswa ka ditiko di mi yelako kuya di teka.

⁶⁴Se MKOMA a na mi hangalasa hagari ka matiko otshe, kukhukhela magwito ka mafu kala kumwani magwito ka mafu, se koneyo u na ya khozela simwani sizimu, asile awe ni vatate vako mi nga mbi si ziva, so mahwa ngu mapulango ni marigwi.

⁶⁵Hagari ka onawo matiko, khu na mbiswa u txi mana kuthutha, ni mkondo wako kha wu na mbi mana wukhalo wo humula ka wona. Koneyo, MKOMA a na kuninga mbilu yo dhudhumela, a na kuninga maso o zengela, ni kuhefemula ka madidikhana.

⁶⁶Wutomi wako wu na juwela nga wu to sungwa ngu ngoti masoni kwako; u na va ni madhukano, wusiku ni mitshikari, khu na mbi va ni themba kuhanyani kwako.

⁶⁷Ni mixo u na womba u txi khawe: “O! I ti ku do swa ditambo!” Ni minova u na womba u txi khawe: “O! I ti ku ko maha mixo!” Ngu mhaka ya sidiwukiso si u no si wona ngu maso ako.

⁶⁸MKOMA a na mi tshumeta mi tsula Egipta ngu ngalava, ngu nzila yile ni nga mi gela ni txi khani: “Khu na mbiswa u txi yi wona kambe!” Koneyo, mi na ya ti xayisa, vavamna ni vavasikati ka valala vanu, kasi ku mi maha tikhumbi, aniko kha ku na mbi maneka wo mi xava.