Read chopi Dhewuteronome 29 Bible Online

Dhewuteronome 29 - chopi bible

Dhewuteronome 29

¹Aawa mapswi nga txitumelelano, aawa MKOMA a nga ruma Mosi ti to e ma womba ka vanana va ka Israyeli, ditikoni ka Mowabhi, hahanze ka txitumelelano txi a nga txi maha navo, mmangoni ka Horebhi.

²Mosi a to ramba votshe va ka Israyeli e va gela ku khene: Anu mi ti woni tiya totshe MKOMA a nga ti maha masoni kwanu, ditikoni ka Egipta, a txi mahela Faro, ni sotshe sithumi sakwe, ni dotshe ditiko dakwe.

³Sikarato sa hombe asi maso anu ma nga si wona, sidiwukiso ni sikombiso sa hombe.

⁴Aniko, kala ka ditshiku da nyamsi, MKOMA a ti sanzi ku mi ninga mbilu yo pimisa, ni maso o wona, ni tinzeve to engisa ati ta ku khene:

⁵“Ani ni mi tsimbitisile ngu txiwulani, mndani ka mune wa magumi a malembe, syambalo sanu kha sa sakala mimidini kwanu, hambi tikathula tanu kha ta sakala mikondoni kwanu.

⁶Mi ti si nga ni sakudya, hambi vhinya yo sela, hambi wusuke, kambe ni mi xayisile, mi tiziva ti to ani ngani MKOMA, Txizimu txanu.”

⁷Ngako mi di hokile ka wuwa wukhalo, Seyoni, mfumeli, Hesibhoni, ni Oge, mfumeli wa Bhasani, va humile va txi ta lwa ni nathu, aniko athu hi va xute,

⁸hi khozisile ditiko dawe hi di ningela di maha thomba ya va ka Rubheni, ni va ka Gadhi, ni ka hafu ya nyumba ya ka Manasi.

⁹Ngu toneto, xayisani mapswi a txitumelelano txiya, mi txi ma vekisa, kasi ku mi na humelela, ka totshe ti mi no ti maha.

¹⁰Anu motshe mi emile nyamsi ka MKOMA, Txizimu txanu, ni misungo ya tihunzu tanu, ni madhota anu, ni vathangeli vanu, ni votshe vathu va ka Israyeli,

¹¹ni vanana vanu, ni vasikati vanu, ni mluveli wu a ku mu wugoveloni kwanu, kukhukhela ka wule a gangako tikhuni tako kala ka wule a rekako mati ako.

¹²Mi tile hawa kasi ku ta amukela txitumelelano txiya MKOMA, Txizimu txanu, a nga txi maha ngu txixambanyo nyamsi kumweko ni nanu,

¹³kasi ku nyamsi a txi mi maha ngamu yakwe, ni ti to ene apune, a txi va i di Txizimu txanu, nga ti a nga womba a txi xambanya ka vatate vanu, Abrahamu, Isaake ni Jakobe.

¹⁴Kha ni txi mahi ni nanu mokha txitumelelano txiya ni txixambanyo txiya.

¹⁵Aniko ni txi maha kambe ni wule a kuho kona hawa nyamsi kumweko ni nathu, masoni ka MKOMA, Txizimu txathu, kufana ni vale va si nga ho nyamsi kumweko ni nathu.

¹⁶Nguko anu ma tiziva ti hi nga hanyisa tona ditikoni ka Egipta, ni ti hi nga tsibilisa tona ngu hagari ka matiko ale mi nga ma tshawunyeta.

¹⁷Mi ma woni manyala awe ni sithombe sawe sa mapulango ni sa marigwi, ni sa silivhela ni sa nzalama, asile vona va ku naso.

¹⁸Ku nga thuke ku txi vaho hagari kwanu wamwamna mwendo wamsikati, mwendo mwaya mwendo lihunzu, ahale mbilu ya vathu va kona yi ti hambukisako ka MKOMA, Txizimu txathu, ngu kuya khozela sizimu sa ona matiko ale; kasi ku hagari kwanu ku si maneki mkoloti wu wu velekako mndonga wa nyongwa, mwendo wo bava.

¹⁹Kambe ku nga thuke ku txi maneka m'thu waku, ngako a di engisile mapswi a txixambanyo txiya, a txi ti dhumisa mbiluni kwakwe, a txi khene: “Ni na va ni kudikha, hambi ni txi ti ningetetela ka ta walo, madingano ni kuranda ka mbilu yangu, nguko kutala ka mati ku na thavisa ditora.”

²⁰MKOMA kha na mbi m'divalela, nguko kuhenya kwakwe ni txiviti txakwe, si na tura txitimwi ka eneyo m'thu, a txi welwa ngu otshe makhombo, aawa ma nga bhalwa ka diya dibhuku, se MKOMA a na pfhita ditina dakwe hahatshi ka nzuma.

²¹MKOMA a na mthavisa, a txi m'veka phuho ka totshe tihunzu ta ka Israyeli, a na welwa ngu makhombo otshe ma nga bhalwa ka dibhuku da mlayo.

²²Liveleko li li no maneka, i ku situkulwana sanu si si nota ngu msana kwanu, ni valuveli vale va nota ngu matikoni ka kule, ngako va txi ta wona makhombo a dona ditiko diya, ni mitungu yi MKOMA a no xanisa ngu yona ditiko;

²³ se dotshe ditiko di hyite ngu txivavula ni mnyu, kha di na mbiswa di txi phawa txilo, kha di na mbiswa di txi mila txilo, hambi ni mwasi kha wu na mbiswa wu txi mila, ku nga kuloviswa ka Sodhoma ni Gomora, Adhimi ni Zebhoyimi, madhoropa ale MKOMA a nga ma lovisa ngu kuhenya kwakwe ni txiviti txakwe;”

²⁴ni otshe matiko ma na kha ona: “Ngu kutxani MKOMA a txi ti maha toneto ka ditiko diya kani? Ti txhamusa txani kutura ka hombe ka kuhenya kwakwe kani?”

²⁵Sekoko vathu va na xamula va txi kha vona: “Nguku va nga hambana ni txitumelelano txa MKOMA, Txizimu txa vatate vawe, atxi a nga ti mahile navo mbimo yile a nga va thavisa ditikoni ka Egipta;

²⁶se va tiya thumela simwani sizimu, va txi si khozela, sizimu si vona va nga si si zivi, asile MKOMA a nga ti va tsimbile ku si khozela.

²⁷Ngu toneto, MKOMA a henyile e wukela ditiko diya, e wisa txitimwi ka dona otshe makhombo awa ma nga bhalwa ka dibhuku diya.

²⁸MKOMA a va rurisile ditikoni kwawe ngu kuhenya, ni txiviti, ni kuhenya ka hombe, e va vinza ka dimwani ditiko, nga ti hi ti wonako nyamsi.”

²⁹Simaha so sisala si lumba MKOMA, Txizimu txathu; aniko simaha si si wonekako, si lumba athu ni vanana vathu, yotshe mbimo, kasi ku hi na xayisa mapswi a mlayo wuwa.