Read chopi Dhewuteronome 3 Bible Online

Dhewuteronome 3 - chopi bible

Dhewuteronome 3

¹Msana ka toneto, hi to tshumela hi txi komba Bhasani. Oge, mfumeli wa Bhasani, kumweko ni vathu vakwe va yimbi, a to hi hingeta kona Edreyi, kasi ku yalwa ni nathu.

²Sekoko MKOMA a ni gete a txi khene: “U nga thave, nguko ani ni mningela manzani kwako, ene ni vathu vakwe votshe ni ditiko dakwe. U na maha kwakwe nga ti u nga maha ka Sehoni, mfumeli wa Vaamori, awule a nga ti akile Hesibhoni.”

³Se MKOMA, Txizimu txathu, a ningete Oge, mfumeli wa Bhasani manzani kwathu, ni votshe vathu vakwe; se athu hi mkhozisile aha ku nga mbi sala ni m'boti ni wumwewo.

⁴Se ka yona yile mbimo, hi tekile otshe madhoropa akwe; kha ka nga va ni didhoropa dimwedo hi nga mbi di teka: Mtxhanu wa magumi a madhoropa, dotshe ditiko da Argobha, adile di nga ti fumwa ngu Oge, mfumeli wa Bhasani.

⁵Otshe madhoropa ale ma ti bhiyilwe ngu mikhokhola ya hombe yo guleka, matimba a kona i ti ti o tsana a tikhorokhoro ta sikete; ku si balwi ni mamwani madhoropa o mbi bhiywa.

⁶Se hi ma hoxotile, nga ti hi nga maha ka Seyoni, mfumeli wa Hesibhoni, hi haxulete otshe madhoropa, vavamna, vavasikati ni vanana.

⁷Kambe hi tekile sotshe sifuyo, ni sotshe si hi nga handa amu madhoropani, si txi maha sathu.

⁸Ka yona yile mbimo, hi khozisile ditiko da vafumeli vale vavambidi va Vaamori, avale va nga ti fumile mtxhatuko ka Jordhani, kukhukhela ka mnambo wa Arnoni kala ka mmango wa ka Hermoni.

⁹(Vasidhoni va ti ti dhana Hermoni ngu ditina daku i Siriyoni; Vaamori vona va ti ti Seriyoni di dhana ku i Seniri),

¹⁰athu hi tekile madhoropa otshe a libalani, i ku ditiko dotshe da Gileyadhi, ni dotshe ditiko da Bhasani, kala Salika ni Edreyi, madhoropa a mfumo wa Oge, wa Bhasani.

¹¹(Oge, mfumeli wa Bhasani, i ti ene ekha wa liveleko la vanyasihakate va ka Refayime a nga ti sate. A ti ti ni m'bhedhu wa simbi, awule wu nga ti ni mpimo wa mtxhanu wa mikono ni mune kulapha ka wona, ni mune wa mikono kuanama ka wona, ngu mpimo wa mkono wa vathu, ina kha wu nga diho ni konkuwa kona Rabha, m'tini ka vanana va ka Amoni kani?)

¹²Sekoko, hi tekile ditiko donedo, kukhukhela Aroweri, i ku ditiko di di ku mabambe ka mnambo wa Arnoni. Ni ningile va ka Rubheni ni va ka Gadhi, hafu ya mmango wa Gileyadhi, ni madhoropa a kona.

¹³Ka hafu ya nyumba ya ka Manasi ni yi ningile didhawa di di nga sala Gileyadhi, ni dotshe da Bhasani, ditiko dile di nga ti fumwa ngu Oge. (Ditikwana dotshe da Argobha. Dotshe da Bhasani, dile di ziwako to ditiko da va ka Refayime.

¹⁴Jayiri, mwana Manasi, a tekile dotshe ditiko da Argobha, kala mihinganoni ka va ka Gesuri, ni va ka Mahakate, a txi di raya ditina dakwe, madhoropa a Bhasani, ni nyamsi ni kuwa, ma ngadi ma txi dhanwa ku i madhoropa a ka Jayiri).

¹⁵Ni ningete ditiko da Gileyadhi ka ngamu ya ka Makiri.

¹⁶Ka liveleko la ka Rubheni, ni la va ka Gadhi, ni va ningile ditiko di di khukhelako Gileyadhi, kala txinambwanani ka Arnoni hagari ka txinambwana txi i ku muhinganoni ka kona, kala ka txinambwana txa Jabhoke, i ku muhingano ni vanana va ka Amoni.

¹⁷Ni va ningile kambe Arabha ni Jordhani, i ku muhingano wa kukhukhela Kinereta, kala ka Linene la Arabha, i ku Linene la Mnyu, hafuhi ka mkova wa wutxani.

¹⁸ Ka txonetxo txikhati ani ni mi ningile txileleto txiya: “MKOMA, Txizimu txanu, a mi ningile ditiko diya, ti to di txi va i di thomba yanu. Anu tindena, vavamna va mtamo, mi na tsimbila mi di xomile masoni ka vananu, i ku vanana va ka Israyeli.

¹⁹Vasikati vanu dwe, ni vanana vanu, ni sifuyo sanu (nguko na tiziva ti to mi na ni sifuyo sasingi), si no sala ka madhoropa ale ni nga mi ninga.”

²⁰ Kala MKOMA a txi ninga kuhumula ka vananu, kufana ni nanu, kambe ni vona va na di fuma ditiko diya, MKOMA, Txizimu txanu, a nga va ninga, kona mtxhatuko ka Jordhani; sekoko mmwani ni mmwani, a na tshumelela ka thomba yakwe, ayile ani ni nga mninga.

²¹Ka txonetxo txikhati, ni leletete Joxuwa ni txi khani: “Maso ako ma ti woni totshe ti MKOMA, Txizimu txathu, a nga maha ka vona vafumelivo vavambidi. MKOMA a na mahisa toneto ka otshe matiko ale mi no pinda ngu ka ona.

²²Mi nga va thaveni, nguko MKOMA, Txizimu txanu, ngene a mi lwelako!”

²³Konako, ni to khongela ka MKOMA, ni txi khani:

²⁴“MKOMA Txizimu, se u khatile kukombisa ka txithumi txako, wuhombe wako ni dianza dako da mtamo; nguko njizimu muni txi kuho nzumani ni mafuni, txi nga sikotako kumaha mithumo yo nga yako, ngu mtamo wo fana ni wako kani?

²⁵Ni tumelele ni txi txhatuka ni txi ya wona ditiko edo da dinene, adi di ku mtxhatuko ka Jordhani, mmango wule wa wunene ni Libhanoni.”

²⁶Kambe MKOMA a to ni henyela, asi ni engisi, ngu mhaka yanu; aniko MKOMA a to khene: “Basi, u nga swe u txi ni wombawombisa kambe ngu mhakeyo!

²⁷Aniko kwela txitimwi ka mmango wa Pisiga, guleta maso ako u wona mswa-ditambo, wuphemba, wulambwe ni wutxani, u wonisisa ngu maso ako, nguko khu na mbi txhatuka mnambo wa Jordhani!

²⁸ Rumela koko ka Joxuwa, mithetho yako, u mtsanisa msana, ni ku mninga mtamo, nguko ngene a no thangela masoni ka vathu vava e va wuleta ka ditiko dile u di wonako, di va thomba yawe.”

²⁹“Sekoko, hi to zumba mkovani, masoni ka Bheti-Peyori.”