Read chopi Dhewuteronome 30 Bible Online

Dhewuteronome 30 - chopi bible

Dhewuteronome 30

¹Se kumaheka taku, ngako ti txi ta txitimwi kwako totshe tiya, mathomo mwendo makhombo ale ni nga ma womba kasi ku u sawula, u txi pimisa mbiluni kwako, hagari ka yotshe mifumo yile MKOMA, Txizimu txako, a no kuyisa ka yona;

²ni kungako u txi hundulukela ka MKOMA, Txizimu txako, u engisa dipswi da txona, ka ti totshe nyamsi ni ku leletako tona, awe ni vanana vako, ngu yotshe mbilu yako, ni wotshe moya wako.

³Sekoko MKOMA, Txizimu txako, a na kuhumisa ka wukhumbi wako, a txi ku mahela wumbilu; a na ku engisa, a txi ku tsanisa, u huma ngu ka otshe matiko ale a nga ti ku hangalisete ka ona.

⁴Hambi ngako vathu vako va di tutumisilwe va txi ya manekela magwito ka nzuma, koneyo MKOMA, Txizimu txako, a na va buthanisa, a txi va wuyisa ngu kona.

⁵MKOMA, Txizimu txako, a na ku wuyisa ka ditiko diya vatate vako va nga ti di fumete, kasi ku u txi di teka; ene a na kukatekisa, a txi kuandisa ngutu kupinda vatate vako.

⁶MKOMA, Txizimu txako, a na kulisa mbilu yako ngu wukwera ni mbilu ya liveleko lako, kasi ku u txi sikota kuranda MKOMA, Txizimu txako, ngu yotshe mbilu yako, ni wotshe moya wako, kasi ku u na mana kuhanya.

⁷MKOMA, Txizimu txako, a na maha ti to otshe makhombo awa me wela txitimwi ka valala vako, txitimwi ka vale va nga txi ku bavela, avale va nga txi kuxupha.

⁸Se awe u na tshumela u engisa dipswi da MKOMA, u xayisa sotshe sirumo sakwe, asi nyamsi ni ku leletako.

⁹Se MKOMA, Txizimu txako, a na maha ti to u humelela ka yotshe mithumo ya manza ako, muhando wa mndani kwako, ka muhando wa sifuyo sako, ni ka muhando wa mafu ako; nguko MKOMA a na tshumela e nengela ngu kukateka kwako, kufana ni ti a nga nengelisa tona ngu vatate vako,

¹⁰ngako u txi engisa dipswi da MKOMA, Txizimu txako, ngu kuxayisa sirumo sakwe ni milayo yakwe, ayi yi nga bhalwa dibhukuni muwa ka mlayo, ngako u txi hunduluka ngu yotshe mbilu yako ni wotshe moya wako, u txi wuya ka MKOMA, Txizimu txako.

¹¹Nguko mlayo wuwa ni ku leletako nyamsi, kha wu karati kwako, kambe kha wu nga txitimwi ka mitamo yako.

¹² Wona kha wu nga nzumani, aha koza u txi womba ku khawe: “I mani a no hi tshunda kukwela a txi ya nzumani, kasi ku wu wuyisa kwathu, ti to hi sikota ku wu engisa ni ku wu xayisa, kani?”

¹³Kambe kha wu nga mtxhatuko ka linene, aha koza u txi womba ku khawe: “I mani a no hi tshunda kutxhatuka, kasi ku wu wuyisa kwathu, ti to hi txi sikota ku wu engisa, hi wu xayisa, kani?”

¹⁴Aniko dipswi di hafuhi ngutu ni nawe, di txisofuni kwako ni mbiluni kwako, kasi ku u txi di xayisa.

¹⁵Wona ti to ni veka masoni kwako wutomi ni tinene, kufa ni kubiha;

¹⁶ngako u txi vekisa sirumo sa MKOMA, Txizimu txako, asi nyamsi ni ku leletako, u txi randa MKOMA, Txizimu txako, u tsimbila ngu tinzila takwe, ni kuxayisa sirumo sakwe, ni milayo yakwe, ni sileleto sakwe, u na hanya, kambe u na anda. MKOMA, Txizimu txako, a na ku katekisa, ka ditiko di u wulelako ka dona, kasi kuya di teka.

¹⁷Kambe ngako mbilu yako yi txi hambuka, u si engisi, u tumela kundindwa, u khizama masoni ka simwani sizimu, u txi si khozela.

¹⁸Sekoko, na kugela nyamsi kukhani kha ditshuri u na lova; khu na mbi laphiselwa masiku a kuhanya ka ditiko diya, mbimo yi u no txhatuka mnambo wa Jordhani, uyako ka dona kasi kuya di teka.

¹⁹Nyamsi ni kombela nzuma ni mafu si txi maha tifakazi to ni emela kwanu, ti to ni vekile masoni kwako wutomi ni lifo, sikatekiso ni makhombo. Sawula wutomi, kasi ku u na hanya awe ni liveleko lako,

²⁰ngako u txi randa MKOMA, Txizimu txako, u engisa dipswi dakwe, u namarela kwakwe; nguko ene ngene i ku wutomi wako ni kuanda ka masiku ako, kasi ku u na sikota kuzumba ka ditiko di MKOMA a nga xambanya ka vatate vako, Abrahamu, Isaake, ni Jakobe, ti to a na va ninga.