Read chopi Dhewuteronome 31 Bible Online

Dhewuteronome 31 - chopi bible

Dhewuteronome 31

¹Mosi a to womba mapswi awa ka votshe va ka Israyeli, a txi khene:

²Nyamsi ni ni 120 wa malembe; kha ni na mbiswa ni va mthangeli wanu kambe, ni MKOMA a ni gete a txi khene: “Khu na mbi txhatuka mnambo wa Jordhani.

³Awu a no tsimbila masoni kwako ngene MKOMA, Txizimu txako; a na hoxota mifumo yoneyo, kasi ku u yi teka. Joxuwa a na va mthangeli wako, nga ti MKOMA a nga kugela.

⁴MKOMA a na maha kwawe nga ti a nga mahisa tona ka Seyoni ni Oge, vafumeli va Vaamori, ni ditiko dawe, adi ene a ngadi maha txiwula.

⁵MKOMA a na va ningela kwanu, se anu mi na maha kwawe madingano ni ti ni nga mi leletisa tona.

⁶Tsanani miva ni mtamo; mi nga thaveni txilo, kambe mi nga dhudhumeleni masoni kwawe, nguko MKOMA, Txizimu txanu, ngene a thangelako masoni kwanu; kha na mbi mi tshotsha, kambe kha na mbi mi leka!”

⁷Sekoko Mosi a to dhana Joxuwa, masoni ka votshe va ka Israyeli, a txi m'gela a txi khene: “Tsana, uva ni mtamo, nguko ngawe u no wulela ni votshe vathu vava, ka ditiko di MKOMA a nga xambanya, ku di ningela ka vatate vako, ngawe u no va ninga, di txi maha thomba yawe.

⁸ MKOMA koko a na thangela masoni kwako ene a na va ni nawe; kha na mbi kuleka, kambe kha na mbi kutshotsha; u nga thave txilo, kambe u nga dhudhumele.”

⁹Se Mosi a to bhala mlayo wuwa, e wu ningela ka vaphaxeli, vanana va Levhi, avale va nga ti rwala dibhokiso da txitumelelano txa MKOMA, kumweko ni otshe madhota a va ka Israyeli,

¹⁰ se Mosi a to va leleta a txi khene: Ngu msana ka mtxhanu wa malembe ni mambidi, ngu txikhati txa dilembe da kudivalelana minandu, ngu mbimo ya m'buso wa matenda,

¹¹ngako va ka Israyeli votshe va di tile ve ta ti kombekisa ka MKOMA, Txizimu txako, ka wukhalo wule ene a nga wu sawula, awe u na gonda mlayo wuwa, masoni ka votshe va ka Israyeli.

¹²Tshanganisa vathu, vavamna ni vavasikati, vanana ni valuveli vale va ku madhoropani kwano kasi kuva txi engisa ni kugonda kuthava MKOMA, Txizimu txanu, ve khutala kuxayisa otshe mapswi a Mlayo wuwa.

¹³Kasiku vanana vawe, vale va sinziko ku wu ziva mlayo, va na gonda kuthava MKOMA, Txizimu txanu, ka otshe masiku ale mi no va mi txi hanya, ka ditiko di mi yako ka dona kasi kuya di teka, ngako mi di txhatukile mnambo wa Jordhani.

¹⁴Se MKOMA a to khene ka Mosi: “Masiku ako a kufa ma hafuhi; dhana Joxuwa, u txi ta nayo amu ditendani da msengeletano, kasi ku ani ni mi ninga sileleto sangu.” Sekoko Mosi ni Joxuwa, va to tsula ditendani ka msengeletano.

¹⁵Sekoko MKOMA a wonekile a di mu ka phande ya direfu amu ditendani; se phande ya direfu, yi to ta ema ha txikeni ka ditenda.

¹⁶Se MKOMA a wombile ka Mosi a txi khene: Wona, u hafuhi ni kutsula u txi ya humula kumweko ni vatate vako; se vathu vava, va na khukha va txi ya maha wugango ni simwani sizimu sa ditiko dile u lavako kuwulela ka dona. Vona va na ni leka va txi ndaka mlayo wa txitumelelano, txi ni nga txi sunga navo.

¹⁷Ka ditshiku donedo, ni na henya ngutu, ni txi va tsukula, ni txi va sisela khohe yangu. Se vona va na loviswa, makhombo amangi ni masingita ma na va thapela. Se ka donedo ditshiku, va na womba va txi kha vona: “Akuwa makhombo awa ma welako txitimwi kwathu, ina hi nga ti to Txizimu txathu kha txi swi txi diho hagari kwathu, kani?”

¹⁸Kunene ka ditshiku donedo, ani ni na va sisela khohe yangu do gwita ngu mhaka ya totshe to biha, tile vona va no ti maha ngu kutshumelela ka simwani sizimu.

¹⁹Se konkuwa, ti bhaleleni ndando yiya, mi yi gondisa ka vanana va ka Israyeli, mi yi veka sisofuni kwawe, kasi ku ndando yiya yi na ni fakazela hagari ka vanana va ka Israyeli.

²⁰Nguko mbimo yi ni no va hokisa ka ditiko dile di khulungako masi ni wulombe, adile ni nga thembisa ngu txixambanyo, ka vatate vawe, vona va na dya va txi khura, va na ena, kambe va na tshumelela ka simwani sizimu, va txi si khozela, va txi ni nyenya va txi hambunyeta txitumelelano txangu.

²¹Ngu mhaka yeto, ngako makhombo amangi ni sikarato, si txi va tela txitimwi kwawe, ndando yiya yi na maha fakazi, nguko kha yi na mbi divalwa sisofuni ka liveleko lawe; nguko ani na yi ziva mialakanyo yawe, ayile va ku nayo nyamsi.

²²Ka dona ditshiku dile, Mosi a to bhala yona ndando yiya, a txi yi gondisa ka vanana va ka Israyeli.

²³Se MKOMA a to gela Joxuwa, mwana Nune, a txi khene: “Tsana, uva ni mtamo; nguko ngawe u no hokisa vanana va ka Israyeli, ka ditiko dile ni nga va xambanyela, ani ni na va ni nawe!”

²⁴Se ku to maheka taku, ngako Mosi a di hetile kubhala otshe mapswi a Mlayo dibhukuni, a txi ma heta otshe,

²⁵a to leleta Valevhi, vale va nga txi rwala dibhokiso da txitumelelano txa MKOMA, a txi khene:

²⁶“Amukelani dibhuku diya da Mlayo, mi txi di veka hafuhi ni dibhokiso da txitumelelano txa MKOMA, Txizimu txanu, di na maha fakazi masoni kwanu.

²⁷Nguko ani na di ziva dihanyo dako da wuhurupha ni kukanyisa kwako; hambi nyamsi, ni ku ngadi ni txi hanya kumweko ni nanu, mi ku siphukuphuku ka MKOMA; se mi na txani, ngako ni di fite kani?

²⁸Tshanganisani masoni kwangu otshe madhota a tihunzu tanu ni vathangeli vanu, kasi ku ani ni na xawutela mapswi awa tinzeveni kwanu, ni kombela nzuma ni mafu ti to si maha tifakazi tangu hagari kwawe.

²⁹Nguko ani na tiziva tito, msana ka kuva ni di fite, mi na ti bihisa ngutu, ngu kuhambuka ka nzila yi ani ni nga mi leleta yona; sekoko makhombo awa ma na mi welela ngu mbimo yile yi tako, nguko anu mi na maha ti i ku ta walo masoni ka MKOMA, mi na mu henyisa ngu mithumo yo biha ya manza anu.”

³⁰Sekoko Mosi a to xawutela ka wotshe msengeletano wa ka Israyeli mapswi a yona ndando yiya, kala magwito ka yona!