Read chopi Dhewuteronome 32 Bible Online

Dhewuteronome 32 - chopi bible

Dhewuteronome 32

¹Riya nzeve awe nzuma, nguko ni lava kuwombawomba; Awe mafu, engisa mapswi a txisofu txangu!

²Gondo yangu yi na date nga mati a nzuma, dipswi dangu di na txhike kufana ni mwando, kufana ni dipswhi di tshutshako txitimwi ka diphunde do nakana, kufana ni txyandela txitimwi ka mwasi wo nyuka.

³Nguko ni na huwelela ditina da MKOMA; Dhumisani Txizimu txathu!

⁴Txizimu Dirigwi, ni mthumo wa txona mbwo hetiseka. Nguko totshe tinzila ta Txizimu ti lulamile. Njizimu txa ditshuri, atxi txi ku si nga ni wubihi. Txi na ni wunene, txi lulamile.

⁵Akuwa va nga onhela Txizimu, hi nga ngadi vanana va txona, ngu vona va ku ni mnandu, liveleko lo gombonyeka ni la makuhu.

⁶Nguko tontiya mi tshumetelaka ngu tona ka MKOMA, anu vathu va wupumbu ni kwa mbi ziva, kani? Ina hi nga ene Tate wako, ni m'vangi wako kani? Ene apune a kumahile a txi ku emisa!

⁷Alakanya masiku a kale, u txi khumbula malembe a tiveleko ni tiveleko ti nga pinda. Wotisa tate wako a na kuxawutela, wotisa madhota ako ma na kugeletela.

⁸Mbimo yi Nyatxitimwi a nga txi abanisela tithomba ka matiko, mbimo yi a nga hangalasela vanana va Adhamu, ene a vekile mihingano hagari ka vathu vakwe, madingano ni mtengo wa vanana va Txizimu.

⁹Nguko txyavelo txa MKOMA ngu vathu vakwe; Jakobe njiavelo txa thomba yakwe.

¹⁰Ene a mmani ditikoni ka txiwula, ka txiwula txa mafu a kuoma, txo tala ngu tihuwa; a m'bhiyete a txi mxayisa, a txi m'vekisa kufana ni ndolowani ya diso dakwe.

¹¹Kufana ni ngungwa yi wonelelako txisaka txa yona, ayi yi purumako ngu txitimwi ka mavondo a yona, yi pakata mavhondo txitimwi ka mabhapi a yona,

¹²kufana ni toneto, MKOMA ngene ekha a nga mtsimbitisa, ku ti si nga ho tximwani Txizimu kumweko nayo.

¹³A va kwelisile mimango ya mafu, a txi va dyisa mihando ya txitinga. Ni ku va dyisa wulombe wa dirigwini, ni mtona a kuhuma ngu mu ka dirigwi do banga,

¹⁴bhotela ya tihomu ta mikati ni masi a mtxhambi, ni mafura a sinvutana ni sihambana, sa kuta ngu Bhasani, ni a vamabhongwe, ni mafura a mpupu wa wunene wa fulaho; kambe u sete mnoha wa mauvha, i ku vhinya ya yinene.

¹⁵Se Jesurumi a dyite e khura, a txi ena; u enile, u enile, u tala ngu mafura; se a lekile Txizimu txi txi nga mmaha; kambe a eyisile Dirigwi da kuhanyiswa kwakwe.

¹⁶Va wusile txiluse txa Txizimu ngu kukhozela simwani sizimu; va mu henyisile ngu wubihi wawe.

¹⁷Va mahile miphaxo ka madhimoni, na i si nga ka Txizimu; ni sizimu sile va nga mbi si ziva, sizimu sa siphya, si si nga mahwa kona kuwa, asile vatate vanu va nga mbi si thava.

¹⁸Awe Israyeli, u divate Dirigwi di di nga kuninga wutomi; u divate Txizimu txi txi nga kuvanga.

¹⁹MKOMA a ti woni toneto, e henya, a txi xamukiswa ngu vanana vakwe vavafana ni vamahorana;

²⁰se a txi womba a txi khene: Ni na va sisela khohe yangu, ni na nga wona ti va no gwitisa tona, nguko vona liveleko lo biha, mbanana vo mbi thembeka.

²¹ Va wusile txiviti txangu ngu mhaka ya kulondeta si i singako Txizimu, va ni henyisile, ngu mhaka ya sithombe sawe sa walo, aniko nani ni na wusa txiluse txawe; ngu kutisawulela vathu va i si nga va vanene, ni na wusa txiviti.

²²Nguko mndilo wa txiviti txangu wu turisilwe, kambe wu na tura kala kuhokomani ka wukhalo wa vafi, kambe wu na tura wu txi tshokomisa mafu ni mihando ya ona ni makhato a mimango.

²³Ni na rumela makhombo txitimwi kwawe; ni na heta tingove tangu ngu ku va fuletela!

²⁴Va na guma mtamo ngu nzala, ve guma ngu sindeyandeya ni mitungu yo karata ngutu, ni na rumela sihari sa txitinga si txi va kakatxulela ngu makwasa, ni wuxungu wa minyoka, yi tsimbilako lithuluni.

²⁵Hahanze va na dawa ngu ditxhari, nyumbani va na dawa ngu dizowa; votshe va na fuva: Mazambi ni mahorana, vanana vo mama, hambi ni vo kumba va tinvi.

²⁶Ni ti khani: “Ni na va hangalasa, va si swi va txi alakanywa hagari ka mafu!”

²⁷Aniko ni thavile kurukwa ngu valala vawe, nguko va na ti kulisa, va txi kha vona: “Manza athu ngu ona ma nga humelela, hi nga MKOMA a nga maha toshe tiya!”

²⁸Nguko vona i vathu vo mbi na mapimo, kha ku nga ho mialakanyo kwawe,

²⁹Idiku va txharihile, nga va txi ti pfisisa, nga va txi ziva kupimisa ta mangwana ni ta magwito awe!

³⁰Ti nga kotekisa kutxani ti to m'thu wammweyo e tutumisa 1.000 wa vathu, ni vathu vambidi va nga sikotisa kutxani kuhinga 10.000 wa vathu, i si nga MKOMA, Dirigwi dawe, a nga va xavisa, kambe i si nga MKOMA a nga va ningela kani?

³¹Nguko dirigwi dawe kha di fani ni Dirigwi dathu, ni valala vathu ndifakazi ta mhakeyo.

³²Nguko vhinya yawe, i vhinya ya Sodhoma, ni ya tithembweni ka Gomora; mauvha a kona, mauvha a nyongwa, ni sizangwe sa kona nzizangwe so bava.

³³Vhinya ya kona mbuxungu wa minyoka, mbuxungu wo daya wa timamba.

³⁴Ina totshe tiya kha ta veketwa ngu ngani, kha ta siswa amu ni sisako kona suma sangu kani?

³⁵Kulumba ani kuphota ni kutshumetela, txa tshuketela txikhati txi mikondo yawe yi no rithimuka, ditshiku da kulova kwawe di hafuhi, ati ti nga longiselwa vona ta tshuketela hafuhi ngu txikuluveta.

³⁶MKOMA a na emela vathu vakwe, kambe a na va ni wumbilu ngu sithumi sakwe. Ngako a txi wona ti to mtamo wawe wu ngumile ni ti to kha ka sala m'thu wo sungwa mwendo wo thuseka,

³⁷ene a na womba a txi khene: “Si hani sizimu sawe, ni dirigwi di va nga txi themba kuvhikelwa ngu dona, kani?

³⁸Si hani si si nga ti ti dya mafura a tihamba tawe, asi si nga txi sela vhinya yawe ya miningelo kani? Si na khukhe si txi ta mi emela, si txi ta mi vhikela.

³⁹Se konkuwa, wonisisani tito: Ani, ani ngani, kha txi nga ho tximwani txizimu kwangu; ani na daya, kambe na hanyisa. Ani na dayisa, kambe na holisa; kha nga ho a kuhulukako, manzani kwangu.

⁴⁰Ani na guleta dianza dangu di komba nzumani, ni xambanya ni txi khani: Ngani wu ni hanyako kala kupinduka!

⁴¹Ngako ni txi lota txingwalangwanda txa ditxhari dangu ngako ni txi lamula ngu dianza dangu, ni na phota ka valala vangu, ni txi pharela ka vale va ni nyenyako.

⁴²Ni na levisa tingove tangu ngu mnoha, ni ditxhari dangu di na khura ngu nyama; ngu mnoha wa vale va nga dawa, ni wa vo ñolwa, kukhukhela ha msungo, ku nava ni kuphota, ka valala.

⁴³Anu matiko tsakani ngutu, kumweko ni vathu va Txizimu, nguko Txizimu txa pharela mnoha wa sithumi sa txona; txa tsayisa valala va txona, txi pfela wusiwana mafu a txona ni vathu va txona!”

⁴⁴Mosi a to ta ni Joxuwa, mwana Nune, e ta xawutela otshe mapswi a ndando yiya, tinzeveni ka vathu.

⁴⁵Mbimo yi Mosi a nga heta kuxawutela otshe mapswi awa, ka votshe va ka Israyeli,

⁴⁶a wombile kwawe a txi khene: “Engisani ta tinene otshe mapswi awa nyamsi, ni ma fakazelako masoni kwanu, kasi ku anu mi na ma leleta ka vanana vanu, ti to va txi ma xayisa, va txi ma vekisa, otshe mapswi a mlayo wuwa.

⁴⁷Nguko aawa, hi nga mapswi o mbi vhuna kwanu; aniko ona mbutomi wanu, kambe ngu ona mapswi awa mi na andisa masiku anu, ka ditiko di mi yako ka dona, kasi kuya di teka, ngako mi txi txhatuka Jordhani.”

⁴⁸Ka donedo ditshiku, MKOMA a wombile ka Mosi a txi khene:

⁴⁹“Kwela ka mmango wuwa wa Abharimu, txitimwi ka mmango wa Nebho, ditikoni ka Mowabhi, masoni ka Jeriko, kambe wonisisa ditiko da Kanana, adi ani ni di ningelako di txi lumba vanana va ka Israyeli.

⁵⁰U na ya fela ka wona mmango wule, u no kwela ka wona, kasi ku u txi ya tshangana ni va ka kwanu, kufana ni mwananu Aroni, a nga fela mmangoni ka Hori, a txi amukelwa ngu va ka kwawe.

⁵¹Nguko mi ni onhete hagari ka vanana va ka Israyeli, matini ka Meribha-Kadhesi, txiwulani ka Zimi, nguko kha ma ni sawulekisa, hagari ka vanana va ka Israyeli.

⁵²Ngu mhaka yeto, u na di wona ditiko di di ku masoni kwako, aniko khu na mbi wulela ka dona ditiko di, ni di ningako vanana va ka Israyeli.”