Read chopi Dhewuteronome 33 Bible Online

Dhewuteronome 33 - chopi bible

Dhewuteronome 33

¹Kambe atxiya, njikatekiso a txi Mosi, m'thu wa Txizimu, a nga katekisa ngu txona vanana va ka Israyeli, na a sinzi kufa.

²“A to khene koko: MKOMA a tile ngu Sinayi, a kwelete na a txi ta ngu Seyiri; a woningile a di mmangoni ka Parani, a txi ta ni 10.000 wa vasawuleki; txinene kwakwe ku ti ti ni mndilo wa mlayo.

³Ene wa randa vathu vakwe, votshe vasawuleki vakwe va manzani kwakwe; vona va khizama mikondoni kwako, va txi engisela mapswi ako.

⁴Mosi a hi ningile mlayo, awu i kuthomba ya msengeletano wa Jakobe.

⁵Se MKOMA a to maha mfumeli kona Jesurumi, mbimo yi ku nga sengeletana vathangeli va vathu, ni tihunzu ta ka Israyeli.

⁶A na hanye Rubheni, a nga fe; ni vathu vakwe va nave i di votala!”

⁷Se ati a nga womba ngu Judha a ti khene: Judha a wombile dipswi da kateko a txi khene: “MKOMA, engisa dipswi da Judha u txi mu wuletisa ka vathu vakwe; manza akwe ma nave ni mtamo, u txi m'lwela ka valala vakwe!”

⁸Ngu didhawa da Levhi, ene a ti khene: Simaha sako so sawuleka sa Tumime ni Urime, si ningetwe ka msawuleki walo, awule a nga m'duka kona Masa, awule u nga kanetisana nayo matini ka Meribha;

⁹ngu tate wakwe ni mame wake ene a khene: “Kha ni zivi ku va wona.” Nene kha va ziva vanawe, kambe wa timelelwa ngu vanana vakwe. Ina vona va xayisile dipswi dako, kambe va vekisile txitumelelano txako.

¹⁰Va gondisile sileleto sako ka Jakobe, ni mlayo wako ka Israyeli; vona va wuyisile kubhumula ka dibaselo tithonvuni kwako, ni mningelo wo hiswa txitimwi ka txiluvelo txako.

¹¹MKOMA katekisa mtamo wawe, u amukela mthumo wa manza awe! Phwarasa titsho ta vale va va wukelako va txi va xanisa, kasi ku va si sikoti kukhukha va txi ema.

¹²Ngu didhawa da Bhenjamini, a ti khene: “Ene njirandwa txa MKOMA, a na humula ngu kuthutha hafuhi kwakwe, Nyatxitimwi a na mfenengeta kala kupinduka, e zumba makatani kwakwe.”

¹³Ngu didhawa da Josefa, a ti khene: “Ditiko dako di na katekiswe ngu MKOMA, di ningwa sihiwa so tshura sa nzumani, i ku mwando ni mati awa ma ku kuhokomani ka hahatshi,

¹⁴mihando ayi yi vitiswako ngu ditambo, ni mihando yi yi manekako ngu mtxima;

¹⁵Ni sa sinene sa mimangoni ka kale, ni sa mikovani ko mbi gwita;

¹⁶mihando ya mafu ni kutala ka yona, ni kateko ya wule a nga aka mu txipoponi. Makatekwa ma nave ha msungo ka Josefa, txitimwi ka msungo wa wule a nga sawulwa hagari ka vanawe!

¹⁷Ene ana ni wudhumo wa didhuna da matiwula, titxheho takwe ti fana ni titxheho ta nyari; ngu tona a na lovisa votshe vathu ngu txikhati tximwetxo, kala magwito ka mafu; ngu vona i ku 10.000 wa va ka Efrayime, ni vava i ku magumi a mazana a va ka Manasi.”

¹⁸Ka Zebhuloni, a ti khene: “Tsaka Zebhuloni amu mapfhumbani kwako, ni nawe, Isakari, amu matendani kwako.

¹⁹Vona va na ramba vathu va txi ya mmangoni, ahale va no ya maha miningelo ya kululama, nguko va na mana tithomba ta lineneni, ni suma si si nga siswa hahatshi ka mtxhefa.”

²⁰Ngu didhawa da Gadhi, a ti khene; A katekile wule a endelekisako Gadhi! Ene wa humula nga ngonyamo ya makati, ayi yi phatulelako mawoko ni misungo.

²¹Ene a ti sawulete didhawa do khata, awu i nga ti txyavelo txa vasungi va milayo. Ngene a tsimbilako ni vathangeli va vathu, awu a mahako kululama masoni ka MKOMA, ni sileleto sakwe ka va ka Israyeli!

²²Se madingano ni Dhani, a ti khene: Dhani njingonyamwana, atxi txi ndakako ngu niya Bhasani.

²³Ngu va ka Naftali, a ti khene: Awe Naftali khura ngu mathomo, kambe tala ngu makatekwa a MKOMA, teka mswa-ditambo ni wulambwe,

²⁴Ngu didhawa da Aseri, a ti khene: “A katekile Aseri hagari ka vanana-kulowe, a katekile hagari ka vanawe, a na nakanise ngu mtona mikondo yakwe.

²⁵Sikhoto sako si na va sa simbi ni koporo; mtamo wako wu na simama nga masiku a kuhanya kwako.”

²⁶Awe Jesurumi kha nga ho wa kufana ni Txizimu, a tako a di gadhile tinzuma kasi ku ta ku vhuna, a tako ni wuhombe wakwe txitimwi ka marefu!

²⁷Txizimu txa yotshe mbimo, mbuthavelo wako. Mawoko a txona nzivhuno sako kala kupinduka; txona txo tovela valala masoni kwako, txi txi kha txona: Va lovise!

²⁸Israyeli a akile kuxayisekani, txisima txa Jakobe txi zumbisekile, ka mafu a kupfuna fulaho ni vhinya, hahatshi ka nzuma, ayi yi wisako mwando.

²⁹Awe Israyeli u katekile! I mani a fanako ni nawe, ditiko di di nga hanyiswa ngu MKOMA, kani? Ene ngene i ku txitxhangu txi txi ku vhikelako, ditxhari di di ku ningako wundena! Valala vako va na khoziswa masoni kwako, awe u na kandetela kutiguleta kwawe.