Read chopi Dhewuteronome 34 Bible Online

Dhewuteronome 34 - chopi bible

Dhewuteronome 34

¹Sekoko Mosi a to khukha ngu libalani ka Mowabhi, a txi ya kwela mmangoni ka Nebho, txitimwi ka Pisiga, ku ku masoni ka Jeriko. Se MKOMA a to mkomba dotshe ditiko, kukhukhela Gileyadhi kala Dhani;

²dotshe da Naftali, da Efrayime ni da Manasi, dotshe da ka Judha, kala lineneni ka mswa-ditambo;

³ni Wuphemba, ni ka thembwe ya mkovani ka Jeriko, didhoropa da mitxhese.

⁴ Se MKOMA a to m'gela a txi khene: Adiya, ditiko di ni nga thembisa ngu txixambanyo ka Abrahamu, ka Isaake, ni ka Jakobe, ni txi khani: “Ani ni na di ningela ka liveleko lako! Ani ni di kombisile kwako, kasi ku u na di wona ngu maso ako, kambe awe khu na mbi wulela ka dona.”

⁵Se Mosi, txithumi txa MKOMA, a to fa koneyo, ditikoni ka Mowabhi, nga kuwomba ka MKOMA.

⁶Se ene a to tshotshwa mkovani, ditikoni ka Mowabhi, ngu masoni ka Bheti-Peyori; aniko ni wammweyo kha kuzivi ahale a nga kelelwa kona, kala ka disthiku da nyamsi.

⁷Mosi a ti ti ni 120 wa malembe, mbimo yi a nga fa; maso akwe ma sa nga karala, ni mtamo wu sanga pwateka kwakwe.

⁸Vanana va ka Israyeli va msalukile Mosi, libalani ka Mowabhi, amu ka magumi mararu a masiku, kala ku txi guma masiku a masaluko, o dila Mosi.

⁹Joxuwa, mwana Nune, a to tala ngu moya wa wutxhari, nguko Mosi a ti msanzekile manza akwe. Ni vanana va ka Israyeli va to mu engisa, va txi maha totshe madingano ni ti MKOMA a nga leleta Mosi.

¹⁰Ka va ka Israyeli, kha nga humelela kambe mmwani mprofeti wo fana ni Mosi, awu MKOMA a nga m'ziva, khohe ni khohe.

¹¹Kha nga ho mmwani a fanako nayo amu ka sotshe sikombiso ni sidiwukiso, si MKOMA a nga mruma ku si maha ditikoni ka Egipta, sa kutsayisa Faro, ni votshe vathu vakwe ni dotshe ditiko dakwe.

¹²Hambi amu ka sotshe si a nga si maha ngu dianza dakwe da mtamo, hambi mu ka sotshe sidiwukiso sa hombe, asiya Mosi a nga si maha masoni ka vanana va ka Israyeli.