Read chopi Dhewuteronome 4 Bible Online

Dhewuteronome 4 - chopi bible

Dhewuteronome 4

¹Konkuwa koko awe Israyeli, engisa milayo ni sileleto si ani nyamsi ni mi godisako, kasi ku mi si vekisa, mi mana kuhanya, mi txi wulela, mi fuma ditiko di MKOMA, Txizimu txa vatate vanu, a no mi ninga.

² Mi nga engeteleni txilo ka ti ani ni mi leletako tona, kambe mi nga hunguleni txilo ka tona. Vekisani sirumo sa MKOMA, Txizimu txanu, ku nga tonti ani ni mi leletisako tona.

³ Maso anu ma ti woni, tile MKOMA a nga maha ngu Bhahali-Peyori; MKOMA, Txizimu txako, a lovisile hagari kwanu, votshe vale va nga londetela milayo ya Bhahali-Peyori.

⁴Kambe anu mi nga tshuketa ka MKOMA, Txizimu txanu, nyamsi mi ngadi mi txi hanya motshe.

⁵Wonani ani ni mi gondisile milayo ni sileleto, madingano ni ti MKOMA, Txizimu txangu, a nga ni rumisa tona, ti to mi txi si londeta, amu ka ditiko di mi no wulela ka dona, mi txi di fuma.

⁶Yi xayiseni mi txi yi maha milayo yiya, nguko ewo wu na va i di wona wuzivi wanu ni mapimo anu, kuwonani ka vathu votshe. Ngako va txi engisa yotshe milayo yiya, vona va na womba va txi kha vona: “Adiya ditiko da hombe da vathu va kuziva ni kupima!”

⁷Nguko ngu wuhi mfumo wa hombe, awule sizimu sa kona si ku hafuhi kufana ni MKOMA, Txizimu txathu, ka sotshe sikhati sile hi mkhongelako kani?

⁸Se ngu vahi vahombe va va ku ni sileleto ni milayo, sa ditshuri, so fana ni wotshe mlayo wu ni mi ningako nyamsi kani?

⁹Kambe ti wonele, awe upune, u txi xayisa ngutu moya wako, kasi u si divali tosthe ti maso ako ma nga ti wona, ti si thuki ti huma mbiluni kwako, ni ka dihi ditshiku da kotshe kuhanya kwako. Ti gondise ka vanana vako ni ka vatukulu vako.

¹⁰Ka ditshiku dile mi nga ema masoni ka MKOMA, Txizimu txanu, mmangoni ka Horebhi, MKOMA a to khene kwangu: “Tshanganisa vathu ngu ditina dangu, kasi ku va txi engisa mapswi angu, ti to ve gonda ku ni thava yotshe mbimo ya kuhanya kwawe ha ditikoni, ni ti to ve ma gondisa ka vanana vawe.”

¹¹Anu mi to tshuketa, mi txi ta maneka hafuhi ka mmango; aniko mmango wu ti tura mndilo kala nzumani, hagari ka txidema ni marefu ni kuphuma.

¹² Sekoko MKOMA a to womba-womba kwanu, a di hagari ka mndilo. Mi engisile dipswi dakwe dwe, aniko kha ma wona kufana ni kakumweko .

¹³ Sekoko MKOMA a mi zivisile txitumelelano txi a nga mi ruma,[1] digumi da milayo, ayi yi nga bhalwa aha ka sileti simbidi sa marigwi.

¹⁴ Kambe yoneyo mbimo, MKOMA a ni rumile ti to ni txi mi gondisa milayo ni sileleto, kasi ku mi txi yi veketa, mi di ka ditiko dile mi yako ka dona, kasi kuya di fuma.

¹⁵“Ti woneleni ta tinene anu mipune, anu kha ma wona txifananiso ni txa tximwetxo, ka ditshiku dile MKOMA a nga womba-womba kwanu, kona mmangoni ka Horebhi, a di hagari ka mndilo;

¹⁶ mi nga ti bihiseni, ngu ku ti mahela txifananiso txo wumbwa, txo nga txithombe, txifananiso txa m'thu wa wamwamna mwendo txa wamsikati,

¹⁷txifananiso txa txihari txokari txa ha mafuni, txifananiso txokari txa txinyana txi txi purumako,

¹⁸txa txikalani txokari, atxile txi khwirindindako txitimwi ka mafu, mwendo txifananiso txa txihaka txokari, atxi txi ku mu matini, aale ma ku hahatshi ka mafu.

¹⁹Se u nga gule maso ako, u txi wona nzumani, ni ku u txi wona ditambo, mtxima, tinyeleti, sotshe siphatiphati sa nzumani, u nga thuke u txi ti bihisa ngu kukhizama masoni ka sona, u txi si khozela ni ku si thumela nzimaha si MKOMA Txizimu txako, a nga si avela ka vathu votshe va ku hahatshi ka nzuma, kasi ku si maha thomba yawe.

²⁰ Aniko, MKOMA a mi tekile e mi humisa ditikoni ka Egipta, ka txikho txa tisimbi, kasi ku miva vathu va mi kuthomba yakwe, ku nga ti nyamsi mi ti wonako.

²¹ Ngu mhaka yanu, MKOMA a ni henyete, eza e xambanya tito, kha ni na mbi txhatuka mnambo wa Jordhani, ni kambe kha ni na mbi wulela ka ditiko da dinene, adile MKOMA, Txizimu txanu, a no mi ninga di txi maha thomba yanu.

²²Nguko ani ni na fa ka dona ditiko diya, kha ni na mbi txhatuka mnambo wa Jordhani; aniko anu mi na txhatuka mi txi ya di fuma, dona ditiko dile da dinene.

²³Ti woneleni mi si divali txitumelelano txi MKOMA, Txizimu txanu, a nga txi maha ni nanu, mi si thuki mi ti mahela txifananiso txo wumbwa, txa tximaha txihi ni txihi, a txi MKOMA, Txizimu txanu, a nga mi tsimba.

²⁴ Nguko MKOMA, Txizimu txako, mndilo wu wu tshokomisako, Njizimu txa txiluse.

²⁵Mbimo yile mi no maneka mi di velekile vanana ni vatukulu, ni kuva se mi di kumbile ha mafuni, mi ti bihisa ngu ku ti khandela sithombe sokari, mi txi maha ati i ku to biha masoni ka MKOMA, Txizimu txanu, miza mi txi mu henyisa,

²⁶nyamsi ni maha ti to nzuma ni mafu, si txi va i di tifakazi tanu to mi wukela; ngako toneto ti txi maheka, ngu txikuluveta mi na ya lova ka donedo ditiko, adile anu mi yako kuya di fuma, ngako mi di txhatukile mnambo wa Jordhani; ka toneto, kha mi na mbi ya hanya ngutu ka dona, nguko ngu ditshuri, mi na ya loviswa.

²⁷MKOMA a na mi hangalasa hagari ka vamatiko, se mi na sala mi di va mtengo wa wudotho, hagari ka mifumo yiya, MKOMA a no va a txi mi yisa ka yona.

²⁸ Koneyo mi na ya khozela sizimu so mahwa ngu manza a vathu, sa mapulango ni sa marigwi, si si woniko mwendo kuengisa, kudya mwendo kupfa kubhumula.

²⁹ Sekoko kukhukhela koneyo, u na lava MKOMA, Txizimu txako, se u na ya mmana, ngako u txi mlava, ngu yotshe mbilu yako ni wotshe moya wako.

³⁰Amu kukaratekani kwanu, ngako otshe makhombo awa ma txi mi humelela, ka sikhati so tala, mi na tshumelela ka MKOMA, Txizimu txako, kasi kuengisa dipswi dakwe.

³¹Nguko MKOMA, Txizimu txako, Njizimu txa wumbilu, kha na mbi mi leka, kambe kha na mbi mi lovisa, nguko kha na mbi divala txitumelelano txi ene a nga xambanyelana ni vatate vanu.

³²Wotisisa ta masiku a kale, aale ma nga kuthangela, kukhukhela ka ditshiku dile Txizimu txi nga vanga m'thu ha mafuni, kukhukhela makhatoni ka nzuma kala magwito ka yona, ina ku ta nga humelela mhaka ya hombe yo fana ni yona yiya kani?

³³Ina vaho vathu va nga engisa dipswi da Txizimu, txi txi womba-womba ngu hagari ka mndilo, kufana ni ku awe u ngadi engisa, va txi tama va txi hanya kani?

³⁴Mwendo njizimu txokari txi nga duketa kuya teka vathu hagari ka vamwani vathu, ngu mithumo ni sikombiso, ni sixamaliso, ni kulwa ngu dianza do tsana, di nga guleka ni mithumo ya hombe yo thisa ku nga totshe tile MKOMA, Txizimu txako, a nga ti maha ditikoni ka Egipta, na anu mi txi ti wona kani?

³⁵ U ningilwe kuwona totsheto, kasi ku u txi tiziva ti to MKOMA ngene ekha i ku Txizimu; kha txi ngaho tximwani hahanze ka txona.

³⁶Ene MKOMA a mahile ti to u txi engisa dipswi dakwe a di nzumani, kasi ku a txi kugondisa. Ene a mahile ti to u txi wona mndilo wakwe wa hombe kona ha mafuni, ni kuengisa mapswi akwe ma txi huma ngu hagari ka mndilo.

³⁷Nga ti a nga txi va randa vatate vako, e sawula liveleko lawe, msana kwawe, ene apune, a ku humisile Egipta ngu wutumbu wakwe ni mtamo wakwe wa hombe.

³⁸A tutumisile masoni kwako, vathu va va ku palako ngu wuhombe ni mtamo, kasi ku ku wuleta awe ditikoni kwawe, adi a nga kuninga awe, di txi maha thomba yako, nga ti kala ni nyamsi i ku toneto.

³⁹Ngu toneto, ti zive nyamsi u txi ti pimisa mbiluni kwako tito, MKOMA ngene ekha i ku Txizimu, txitimwi nzumani, ni hahatshi ha mafuni; kha ku nga ho tximwani.

⁴⁰Xayisa sirumo sakwe ni milayo yakwe, ayi nyamsi ni ku leletako, kasi ku totshe ti txi tsimbila kwati kwako ni ka vanana vako, msana kwako, masiku ako ma txi anda ha ditikoni, adi MKOMA, Txizimu txako, a no kuninga, di txi maha dako, kala kupinduka.”

⁴¹Sekoko Mosi a to sawula madhoropa mararu, mtxhatuko ka Jordhani, ngu didhawa da wutxani;

⁴²kasi kumaha wuthavelo, wule a dayako mwakelani wakwe ngu phango, na a sa thanga ngu ku mvenga; a na thavela ka dimwedo da madhoropa awa, kasi ku e hanya.

⁴³ I ku Bhezeri, libalani ka txiwula, i ti da va ka Rubheni; Romoti wa Gileyadhi, i ti da va ka Gadhi; ni Golani wa Bhasani, i nga ti da va ka Manasi.

⁴⁴“Ngu wuwa mlayo wule Mosi a nga wu huwelela ka vanana va ka Israyeli.

⁴⁵Asiya nzirumo ni milayo ni sileleto si Mosi a nga gela vanana va ka Israyeli, ngako va di humile Egipta.

⁴⁶Na va di mtxhatuko ka Jordhani, mkovani ka hafuhi ni Bheti-Peyori, ditikoni ka Seyoni, mfumeli wa Vaamori, a nga ti akile Hesibhoni, awule Mosi ni vanana va ka Israyeli, va nga mxula, kuhumani kwawe ngu ditikoni ka Egipta.

⁴⁷Ve teka ditiko dakwe ni ditiko da Oge, mfumeli wa Bhasani, matiko a vafumeli vava va vambidi va Vaamori, va nga ti akile ngu mtxhatuko ka Jordhani.

⁴⁸Kukhukhela Aroweri, ku ku ngu mabambe ka txinambwana txa Arnoni, kala mmangoni ka Siyoni, kudhanwako kambe ti to i Hermoni,

⁴⁹ni lotshe libala li li ku wutxani, mtxhatuko ka Jordhani, kala ka Linene la Arabha, ngu didhawa da wutxani, kala ka Linene la mkovani, hahatshi ka Asidhote-Pisiga.”