Read chopi Dhewuteronome 5 Bible Online

Dhewuteronome 5 - chopi bible

Dhewuteronome 5

¹Se Mosi a to dhana votshe va ka Israyeli a txi ta va gela ku khene: “Engisa, awe Israyeli, milayo ni sileleto si nyamsi ni huwelelako tinzeveni kwanu. Si gondeni, mi si xayisa ni ku si vekisa.”

²MKOMA, Txizimu txathu, a mahile txitumelelano ni nathu mmangoni ka Horebhi.

³MKOMA kha maha txitumelelano txiya ni vatate vathu, aniko a txi mahile ni nathu, athu hi kuho hawa, hotshethu hi hanyako.

⁴MKOMA a wombawombile ni nanu khohe ni khohe, a di hagari ka mndilo, txitimwi ka mmango.

⁵Konako ani ni emile hagari ka MKOMA ni nanu, kasi ku ni mi gela dipswi da MKOMA, nguko mi ti ti ni dizowa ngu mndilo, ngu mhaka yeto kha ma kwela mmangoni. Ene a ti khene:

⁶“Ani ngani MKOMA, Txizimu txako, ni nga kuhumisa ditikoni ka Egipta, ka nyumba ya wukhumbi.

⁷Khu na mbi va ni simwani sizimu hahanze kwangu.

⁸Awe khu na mbi ti mahela txifananiso txo vatwa, hambi txo fana ni txokari txa si si ku txitimwi nzumani, mwendo hahatshi ha mafuni, mwendo matini hahatshi ka mafu;

⁹ khu na mbi si khozela, kambe khu na mbi si thumela, nguko ani, MKOMA, Txizimu txako, ni Txizimu txa txiluse, atxi txi tsayisako vanana ngu mhaka ya sionho sa vaveleki vawe, kala ka liveleko la wuraru ni la wumune ka vale va ni vengako.

¹⁰Kambe na maha wumbilu ka magumi a mazana a vale va ni randako, ni kuvekisa sirumo sangu.

¹¹Khu na mbi khumbuka walo ditina da MKOMA, Txizimu txako, nguko MKOMA kha na mbi leka, asi tsayisi, awule a sakanako ngu ditina dakwe, walo.

¹²U na vekisa ditshiku da Sabbata u txi di sawulekisa, nga ti a nga ku leletisa tona MKOMA, Txizimu txako.

¹³U na thuma amu ka mtxhanu wa masiku ni dimwedo, u txi maha yotshe mithumo yako.

¹⁴Ditshiku da wutxhanu ni mambidi, i Sabbata ya MKOMA, Txizimu txako; khu na mbi maha ni wawumwewo mthumo, awe ni mwanana wako, wa mfana mwendo wa dihorana, ni khumbi yako, ya wamwamna mwendo ya wamsikati, ni homu yako, ni mbongola yako, ni txihari txokari txako, ni mluveli wu a ku m'tini kwako. Ngu kumaha keto, khumbi yako ya wamwamna mwendo ya wamsikati, va na sikota kuhumula ni vona kufana ni nawe.

¹⁵Alakanya ti to nawe u ti ti khumbi ditikoni ka Egipta, ni ti to MKOMA, Txizimu txako, a ku humisile koneyo ngu dianza da mtamo ni diwoko do guleka. Ngu mhaka ya toneto, MKOMA, Txizimu txako, a ku leletete ti to u vekisa ditshiku da Sabbata.

¹⁶ Thava tate wako ni mame wako, nga ti MKOMA, Txizimu txako, a nga kuleleta, kasi masiku ako ma na anda ni nawe u na kateka, ka ditiko di MKOMA, Txizimu txako, a no kuninga.

¹⁷U nga daye.

¹⁸U nga mahe wugango.

²⁰U nga lumbete muakelani wako, ngu wufakazi wa makuhu.

²¹U nga navele msikati wa muakelani wako, kambe u nga navele nyumba ya muakelani wako, hambi thembwe yakwe, hambi khumbi yakwe ya wamwamna mwendo ya wamsikati, hambi homu yakwe, ni mbongola yakwe, hambi ni txihi tximaha txi lumbako muakelani wako.”

²²Aawa ngu ona mapswi a MKOMA a nga huwelela, ngu dipswi do guleka, ka wotshe msengeletano wanu, txitimwi ka mmango, a di hagari ka mndilo, ni direfu, ni txidema. A to womba-womba ngu dipswi da hombe, a si engeteli txilo; a to bhala timhaka tiya, aha ka sileti simbidi sa marigwi, a txi si ningela kwangu.

²³Ti di ngeto, mbimo yi mi nga engisa dipswi di txi huma ngu hagari ka txidema, na mmango wu txi tura ngu mndilo, anu motshenu, ni vathangeli vanu va tinyumba ni madhoropa, mi to tshuketa hafuhi kwangu,

²⁴se mi ti khanu: “MKOMA, Txizimu txathu, a hi kombile wudhumo wakwe ni wuhombe wakwe, athu hi engisile dipswi dakwe di txi huma ngu hagari ka mndilo. Nyamsi hi woni ti to Txizimu txa sikota kuwombawomba ka m'thu, se m'thu e tama a txi hanya.

²⁵Se konkuwa hi nga fa ngu mhaka muni kani? Mndilo wuwa wa hombe wu na hi hisa. Ngako hi txi tama hi engisa dipswi da MKOMA, Txizimu txathu, athu hi na fa.

²⁶Nguko i mani a nga engisa, kufana ni nathu, dipswi da Txizimu txi txi hanyako, txi txi womba-womba hagari ka mndilo, e tama a txi hanya kani?

²⁷Tshuketa awe, u txi ya engisa totshe ti MKOMA, Txizimu txathu, a no ya womba. Se awe u nata hi gela totshe ti MKOMA, Txizimu txathu, a no ya kugela, athu hi nata tiengisa, hi txi ti vekisa.”

²⁸MKOMA a engisile mapswi anu, aawa mi nga womba-womba ni nani, e ni gela a txi khene: “Ni engisile mapswi ale vathu vava va nga kugela, totshe ti va nga ti womba ndinene ngutu.

²⁹Sikwawe, idiku timbilu tawe yotshe mbimo to va ni mapimo o nga toneto, veva ni txithavo, va txi vekisa ngu kusimama sotshe sirumo sangu, va ndi na zumbiseka ta tinene, vona ni vanana vawe, kala kupinduka.

³⁰Tsula u ya va gela ve tshumelela matendani kwawe.

³¹Kambe awe, zumba kona hawa ni nani, ni txi ku geletela sotshe sirumo, ni milayo, ni sileleto si u no ya va gondisa, kasi kuva txi ya si maha ka ditiko dile ni no va ninga va txi di fuma.”

³²Ngu kumaha keto, khatalelani kumaha ati MKOMA, Txizimu txanu, a nga mi leleta tona. Mi nga ti hambukiseni, mi txi ya ka didhawa da txinene mwendo da txibhabha.

³³“Mi na tsimbila ngu yotshe nzila yi MKOMA, Txizimu txanu, a nga mi leleta, kasi ku mi txi hanya, mi di katekile, ni ti to masiku anu ma txi anda, ka ditiko di mi no ya di teka, di txi maha danu.”