Read chopi Dhewuteronome 6 Bible Online

Dhewuteronome 6 - chopi bible

Dhewuteronome 6

¹“Ayiya koko, ngu yona milayo ni sileleto ni mithetho, asi MKOMA, Txizimu txanu, a nga ruma ti to ni mi gondisa, kasi ku mi txi si maha, ka ditiko di mi yako ka dona, mi txi ya di fuma.

²Ngu toneto, thava MKOMA, Txizimu txako, kambe vekisa yotshe milayo yakwe, ni sirumo si nyamsi ni ku leletako, awe ni vanana vako, ni mtukulu wako, otshe masiku a kuhanya kwako, kasi ku masiku ako ma na anda.

³Ngu toneto, awe Israyeli, engisa u txi khutalela kuvekisa milayo yiya, u na mana kukateka, kambe u na anda ngutu, ka ditiko di di khulungako masi ni wulombe, nga ti a nga kugela MKOMA, Txizimu txa vatate vako.

⁴Engisa awe Israyeli, MKOMA, Txizimu txathu, MKOMA mmweyo dwe.

⁵ Ngu toneto, u na randa MKOMA, Txizimu txako, ngu yotshe mbilu yako, ngu wotshe moya wako, ni wotshe mtamo wako.

⁶Mapswi awa ni ku leletako nyamsi, ma nave mbiluni kwako.

⁷Awe u na ma gondisa ka vanana vako, kambe u na womba-womba ngu ona, u di khalahatshile m'tini kwako, ni kungako u txi tsimbila amu mapfhumbani kwako, ngako u txi otela, ni kungako u txi wuka.

⁸Kambe u na ma sunga diwokoni kwako kasi kumaha txialakanyiso, ni kuva txikombiso hagari ka maso ako.

⁹Awe u na ma bhala aha ka misasimo ya nyumba yako, ni mu ka matimba ako.”

¹⁰Ngako MKOMA Txizimu txako a txi ku wuletisa ka ditiko di ene a nga thembisa ngu kuxambanya ka vatate vako Abrahamu, Isaake ni Jakobe, ti to a na kuninga, i ku madhoropa a hombe o tshura, aawa u nga mbi ma aka,

¹¹ka tinyumba ti ti nga tala ni sotshe sa sinene, asi si nga mbi sengeletwa ngu ngawe; sisima si si nga mbi kelwa ngu ngawe; tithembwe ta mivhinya ni miolivha, ayi yi nga mbi phawa ngu ngawe; ngako u txi dya u txi khura.

¹²Ti wonele, u si divali MKOMA, a nga kuhumisa ditikoni ka Egipta, ka nyumba ya wukhumbi.

¹³U na thava MKOMA, Txizimu txako, u txi mkhozela, ni kuxambanya ngu ditina dakwe.

¹⁴Mi nga khozeleni simwani sizimu, asi si ku hagari ka sizimu sa vathu, vale va mi randelako.

¹⁵Nguko MKOMA, Njizimu txako, atxi txi nga aka hagari kwanu, Njizimu txa txiluse; ngako kuhenya ka MKOMA, Txizimu txako, ku txi vhiluka, ene a nga kufuvisa ha mafuni.

¹⁶ Mi nga dukeni MKOMA, Txizimu txanu, nga kule mi nga m'duka kona Masa.

¹⁷Mi na vekisa ta tinene sirumo sa MKOMA, Txizimu txanu, kumweko ni wufakazi ni mithetho, ayi ene a nga mi leleta.

¹⁸U na maha ati i ku to lulama, ni ti i ku ta tinene masoni ka MKOMA, kasi ku u na zumbiseka kala kuza u txi wulela ka ditiko da dinene, adi MKOMA a nga thembisa ngu kuxambanya ka vatate vako,

¹⁹ni kututumisa votshe valala vako, masoni kwako, nga ti MKOMA a nga womba.

²⁰Ka mbimo yi yi tako, ngako mwanana wako a txi ku wotisa, a txi khene: “Wufakazi, ni milayo ni sileleto, asi MKOMA, Txizimu txathu, a nga mi gela, si womba txani kani?”

²¹Konako u na mxamula u txi khawe: “Athu hi ti tikhumbi ta Faro ditikoni ka Egipta, aniko MKOMA a hi humisile kona Egipta ngu dianza da mtamo.

²²Se MKOMA a mahile sikombiso sa hombe ka Faro, ni ka yotshe nyumba yakwe, ni sixamaliso so thisa, hi txi si wona;

²³se a hi thavisile koneyo, a txi hi tisa muwa, kasi ku ta hi ninga ditiko diya, a nga thembisa ka vatate vathu, ngu txixambanyo.

²⁴Se MKOMA a hi leletete ti to hi vekisa sotshe sileleto siya, hi thava MKOMA, Txizimu txathu, kasi ku hi na mana kuzumbiseka yotshe mbimo, e hi ninga wutomi, kufana ni ditshiku da nyamsi.

²⁵Ti nava i di kululama kwathu, ngako hi txi khatala ngu kuvekisa sotshe sirumo siya, masoni ka MKOMA, Txizimu txathu, nga ti a nga hi leleta.”