Read chopi Dhewuteronome 9 Bible Online

Dhewuteronome 9 - chopi bible

Dhewuteronome 9

¹Awe Israyeli, engisa: Nyamsi u na txhatuka mnambo wa Jordhani, kasi kuya khozisa mifumo ya hombe ngutu, ni mtamo wa hombe kupinda awe, ni madhoropa a hombe o bhiywa ngu diguma do lapha kala nzumani.

²Vathu va kona mba hombe, kambe va laphile, mbanana va Anaki, ava u va zivako, avava u nga engisa nduma yawe, va txi kha vona: “I mani a ndi no ema, masoni ka vanana va Anaki kani?”

³Ngu toneto, ti zive nyamsi ti to MKOMA, Txizimu txako, ngene a no thangela masoni kwako, kufana ni mndilo wo hisa; ngene a no lovisa ni ku va fuvisa masoni kwako. Sekoko awe u na va hinga, u txi va fuvisa, nga ti MKOMA, a nga womba.

⁴Ngako koko MKOMA, Txizimu txako, a di va tutumisile masoni kwako, u nga wombe mbiluni kwako u txi khawe: “MKOMA a ni fumisile ka ditiko diya, ngu mhaka ya kululama kwangu,” nguko MKOMA a tutumisa matiko awa ngu mhaka ya kubiha ka ona.

⁵Hi nga ngu mhaka ya kululama kwako, kambe hi nga ngu mhaka ya wunene wa mbilu yako, aku u ngaza u wulela, u teka ditiko dawe, aniko MKOMA a tutumisa matiko awa masoni kwako, ngu mhaka ya kubiha ka ona; ni ti to a maha tiya, kasi kutsanisa dipswi di ene a nga xambanya ka vatate vako, Abrahamu, Isaake, ni Jakobe.

⁶Ti zive koko tito, MKOMA, Txizimu txako, kha ku ningi walo ditiko diya da dinene, di maha dako, nguko anu va ka Israyeli, mi vathu va misungo yo banga.

⁷Alakanya, u nga divale ti to u henyisile MKOMA, Txizimu txako, kona txiwulani. Kukhukhela ka ditshiku di u nga huma ditikoni ka Egipta, kala u hoka ka wuwa wukhalo, mi vathu va kanu masoni ka MKOMA;

⁸hambi ni mmangoni ka Horebhi, mi henyisile MKOMA; MKOMA eza e henya ngu nganu, aha koza e lava ku mi lovisa.

⁹ Mbimo yi ani ni nga kwela kasi kuya amukela sileti simbidi sa marigwi, sileti sa txitumelelano, atxi MKOMA a nga maha kumweko ni nanu, sekoko ni ti ya zumba mmangoni, mune wa magumi a masiku, ni mune wa magumi a wusiku, ni sidyi dipawu, hambi kusela mati.

¹⁰MKOMA a ni ningile sileti simbidi sa marigwi, so bhalwa ngu litiho la Txizimu; txitimwi ka sona ku ti ti bhatwe otshe mapswi awa MKOMA a nga ma womba kwanu mmangoni, adi hagari ka ndilo, ngu ditshiku da msengeletano.

¹¹Ku to maheka taku, msana ka mune wa magumi a masiku, ni mune wa magumi a wusiku, MKOMA e ni ninga sileti simbidi sa marigwi, sileti sa txitumelelano.

¹²Konako MKOMA a ni gete a txi khene: “Khukha, relela konkuwa, nguko vathu vako, avale u nga va humisa ditikoni ka Egipta, se va mahile kubiha; va kuluvetile kuleka nzila yi ani ni nga va leleta; va ti mahete txithombe txo tshulwa!”

¹³MKOMA a to engeta a txi khene: “Ni woni to vathu vava, mbathu va dihanyo do biha.

¹⁴Ni leke ni va lovisa, ni fuvisa ditina dawe hahatshi ka nzuma; ni na maha ngu ngawe mfumo wa mtamo ngutu, ni kutala kupinda vona.”

¹⁵Ni to tshumela ni relela ngu mmangoni, mmango wu ti ti tura ngu mndilo; se sileti simbidi sa txitumelano si ti ti manzani kwangu.

¹⁶Ni woni ti to kha ditshuri, mi onhile ka MKOMA, Txizimu txanu, ngu ku ti mahela dirole da simbi yo tshulwa, mi kuluveta ku ti hambukisa ka nzila yi MKOMA a nga mi leleta.

¹⁷Konako, ni to teka sileti sile sa simbidi, ni si rinza ngu manza angu a mambidi, ni si faya masoni kwanu.

¹⁸Ni to ti wisa kambe masoni ka MKOMA, nga txikhati txo khata, ni heta mune wa magumi a masiku, ni mune wa magumi a wusiku, ni sidyi dipawu, ni si seli mati, ngu mhaka ya txionho txiya txa hombe, txi mi nga txi maha, ngu kumaha ati i ku to biha masoni ka MKOMA, mi txi mu henyisa.

¹⁹ Nguko ani ni ti ni dizowa ngutu ngu mhaka ya kuhenya ni txiviti txa MKOMA, a nga ti mi henyela, aha koza e lava ku mi lovisa. Hambi keto, MKOMA a ni engisile kambe ka txiya txikhati.

²⁰MKOMA a ti henyile kambe ngu mhaka ya Aroni, a txi lava ku mlovisa; aniko ka txonetxo txikhati, ni kombete kambe ngu Aroni.

²¹Kambe ni tekile txionho txanu, i ku dirole di mi nga ti di wumbile, ni txi di hisa ngu mndilo, kambe ni txi di rukuta, ni txi di kuya khakwati, kala kuza di txi maha mpupu; se mpupu wa kona ni wu xwayile ka txinambwana, txile txi nga ti relela ngu mmangoni.

²² Kambe mi henyisile MKOMA, kona Tabhera, ni Masa, ni Kibroti-Hatahava.

²³ Mbimo yile MKOMA a nga mi ruma kukhukhela Kadhesi-Bharneya, a txi khene: Kwelani mi ya teka ditiko di ni nga mi ninga, mi kanetile. Mbimo yile MKOMA, Txizimu txanu, a nga mi ruma, mi si kholwi, mi si engisi dipswi dakwe.

²⁴Anu mi vaeyisi ka MKOMA, kukhukhela ka ditshiku di ni nga khata ku mi ziva.

²⁵Ngu mhaka yeto, ani ni to khizama masoni ka MKOMA, ni ti veka hahatshi, ni heta mune wa magumi a masiku, ni mune wa magumi a wusiku, ni txi mi khongelela, nguko MKOMA a ti ti khene a na mi fuvisa.

²⁶Ni to khongela ka MKOMA ni txi khani: MKOMA Txizimu, u nga lovise vathu vako, ni thomba yako, ngawe u nga va tirula ngu wuhombe wako, u txi va humisa ditikoni ka Egipta, ngu dianza dako da mtamo.

²⁷Alakanya sithumi sako, Abrahamu, Isaake ni Jakobe; u nga wone kubanga ka timbilu ta vathu vava, hambi wubihi wawe, ni txionho txawe.

²⁸Kasi ku vathu va ditiko dile u nga hi humisa ka dona, va si wombi va txi kha vona: “MKOMA a tandekile ku va hokisa ka ditiko dile a nga va thembisa”; ene, “ngu mhaka ya livengo navo, a va humisile kasi kuya va daya txiwulani.”

²⁹Aniko, vona mbathu vako ni thomba yako; awe ngawe u nga va humisa wukhumbini, ngu mtamo wako wa hombe, ni diwoko dako da wundena.