Read chopi Johani 1 Bible Online

Johani 1 - chopi bible

Johani 1

¹Kukhatani ku ti ni Dipswi; Dipswi di ti ni Txizimu, Dipswi i ti Txizimu.

²Dona Dipswi kukhatani di ti ka Txizimu.

³Sotshe si vangilwe ngu dona, kuwalo ni txa tximwetxo txi nga vangwa hahanze ka dona.

⁴Wutomi wu ti ti ka dona. Wutomi i ti ti liwoningo la vathu.

⁵Liwoningo liya li woningile txidemani, kambe txidema kha txa li xula.

⁶ Ku humelete m'thu wo rumelwa ngu Txizimu, ditina dakwe i ti Johani.

⁷Ene a tete ku ta fakazela liwoningo, ti to votshe ve tumela ngu ngene.

⁸Ene i ti si nga liwoningo, kambe a ti tete ku ta fakazela liwoningo.

⁹Dipswi i ti liwoningo la ditshuri, aliya li woningako votshe vathu, li txi ta ha mafuni.

¹⁰Dipswi di ti mu mafuni, ni mafu ma mahilwe ngu dona, kambe mafu kha ma di ziva.

¹¹Ene i ku Dipswi a tile ka va ka kwawe, kambe va ka kwawe kha va mu amukela.

¹²Aniko votshe va va nga mu amukela, ava va nga tumela ka ditina dakwe, a va ningile mtamo wa kumaha vanana va Txizimu.

¹³Vona mbanana va Txizimu, i si nga ngu nzila ya mtumbuluko, mwendo kunavela ka mmidi hambi kuranda ka m'thu, aniko va velekilwe ngu Txizimu.

¹⁴Dipswi di ti mahile m'thu, e aka hagari kwathu; hi wu woni wudhumo wakwe, wudhumo wu Tate a nga ninga Mwanana wakwe wa Mmweyo ekha, wo tala ngu makatekwa ni ditshuri.

¹⁵Johani wa fakaza ngu ngene, a txi khene: “Ngene wu ni nga ti mu womba ni txi khani: ‘Awu a tako msana kwangu, ngene i ku wo khata, nguko Ene a ti ti ho ni sanzi ku va ho ani.’ ”

¹⁶Kha ditshuri, ngu kutalelwani kwakwe, hotshethu hi amukete kateko ni kateko.

¹⁷Nguko hi ningilwe Mlayo manzani ka Mosi, aniko kateko ni ditshuri hi wuyisetwe ngu Jesu Kristu.

¹⁸Txizimu kha txi zivi kuwonwa ngu m'thu; Mwanana wa txona wa Mmweyo ekha, awu a ku kumweko ni Tate, ngene a nga hi zivisa ati Txizimu txi ku ngu tona.

¹⁹Ngu wona wuwa wufakazi a nga wu maha Johani ditshiku di Vajudha va nga rumela vaphaxeli ni Valevhi ngu Jerusalema, kuya mu wotisa, va txi kha vona: “Awe ngawe mani?”

²⁰Ene a wombile ditshuri, kha va langela, a wombile, a txi khene: “Ani kha ni nga Mesiya.”

²¹Se vona va to mu wotisa, va txi kha vona: “Ngawe mani kani? Ina ngawe Elija kani?” Ene a txi khene: “Kha ni nga ene.” “Mwendo u mprofeti kani?” Ene a txi angula, a so khene: “Ahim-him.”

²²Konaho, va to womba kwakwe, va txi kha vona: “Se ngawe mani, kasi ku hi na ya sikota kuxamula ka vale va nga hi ruma kani? Kasi awe u ti maha mani kani?”

²³Ene a xamute a txi khene: “Ani ni dipswi da wule a kwangulako txiwulani, a txi khene: ‘Lulamisani nzila ya Mkoma’, nga tiya a nga wombisa tona mprofeti Isaya.”

²⁴Avale va nga ti rumetwe i ti Vafarisi.

²⁵Vona va to mu wotisa va txi kha vona: “Se i mhaka muni u txi bhabhatisa na u si nga Mesiya, u si nga Elija, u si nga Mprofeti kani?”

²⁶Johani a va xamute a txi khene: “Ani ni bhabhatisa ngu mati, kambe hagari kwanu waho awu mi si mu ziviko.

²⁷Ene ngene a nota msana kwangu, awu hambi ani ni si sikotiko kuthukunyula tingoti ta tikathula takwe.”

²⁸Atiya ti mahekile Bhetaniya, mtxhatuko ka Jordhani, ahawa Johani a nga txi bhabhatisa kona.

²⁹Mangwanani ka kona, Johani a to wona Jesu, a nga txi ta kwakwe, se a txi khene: “Wonani Txinvutana txa Txizimu atxi txi kuwulako sionho sa ditiko.

³⁰Ngene wu ni nga txi womba ngu ngene, ni txi khani: ‘Ngu msana kwangu, wata m'thu, awu a ni thangelako masoni, nguko a ti ti ho, na ni sanzi ku va ho ani.’

³¹Nani ni ti si mu zivi, kambe ni tete ku ta bhabhatisa ngu mati, kasiku Ene e wonekiswa ka Israyeli.”

³²Johani a fakazile kambe a txi khene: “Ni woni Moya wo Sawuleka wu txi txhika ngu nzumani, nga txituvani, wuta zumba txitimwi kwakwe.

³³Nani ni ti si mu zivi, aniko awule a nga ni ruma kubhabhatisa ngu mati, ngene a nga ni gela a txi khene: ‘Awule u no wona Moya wo Sawuleka wu txi txhikela ku ta zumba txitimwi kwakwe, ngeneyo a bhabhatisako ngu Moya wo Sawuleka.’

³⁴Ni ti woni ngu maso angu, se na fakaza ti to Ene i Mwanana wa Txizimu.”

³⁵Ka ditshiku di di londetako, Johani a ti maneka a di konaho kambe ni vambidi ka vagondiswa vakwe.

³⁶Ku ti ngako a txi wona Jesu na a txi pinda, a to khene: “Wonani Txinvutana txa Txizimu.”

³⁷Vagondiswa vale va vambidi, ngako va txi engisa mapswi ale a nga ma womba, va to londisa Jesu.

³⁸Mbimo yi a nga tshembereka a txi va wona, va txi mu londetela, Jesu a to khene kwawe: “Mi lava txani kani?” Vona va xamute va txi kha vona: “Rabbi (ati ti wombako ku M'gondisi), u zumba hani kani?”

³⁹Ene a to va xamula a txi khene: “Ngonani mi ta kuwona.” Vona va nje kutsula veya wona ahawa a zumbako kona, se ve zumba nayo ditshikudo. I ti mbimo yo lava kuhoka ka txikhati txa wugumi.

⁴⁰Andreya, mwanawe Simoni Pedro, i ti mmweyo wa vale vavambidi, va nga londisa Jesu ngu kuengisa ti a nga womba Johani.

⁴¹Ene a thangile ngu mwanawe Simoni, a txi mu mana, se a txi mu gela ku khene: “Hi mmani Mesiya!” Ati ti wombako ku Kristu.

⁴²Se a txi mu heleketa ka Jesu. Jesu a to mu wonisisa, se a txi khene: “Awe ngawe Simoni, mwana Johani; u na dhanwa ku u Khefasi” (ati ti wombako ku Pedro, Dirigwi.)

⁴³Ka ditshiku di di londetako, Jesu a ti xuva kuya Galileya, se e mana Filipi, a txi khene kwakwe: “Ni londise.”

⁴⁴Filipi i ti wa Bhetsayidha, didhoropa da va Andreya ni Pedro.

⁴⁵Filipi a to mana Nathaniyele, a txi khene kwakwe: “Hi mmani wule Mosi a nga bhala timhaka takwe Mlayoni, ni Vaprofeti ni vona va bhate: I Jesu wa Nazareta, Mwana Josefa.”

⁴⁶Nathaniyele a txi khene kwakwe: “Ina txilo txa txinene txi nga huma ngu Nazareta kani?” Filipi a txi khene kwakwe: “Ngono u ta ti wona.”

⁴⁷Jesu a to wona Nathaniyele a txi mu tela, se e womba ngu ngene, a txi khene: “Ndiyo Muisrayeli wa ditshuri, awu kwakwe, ku kuwalo kukanganyisa.”

⁴⁸Nathaniyele a txi khene kwakwe: “U ni zivela hani kani?” Jesu a to mu xamula a txi khene: “Na Filipi a sanzi ku kudhana, ani ni ku woni u di hahatshi ka mkuwu.”

⁴⁹Nathaniyele a to xamula a txi khene kwakwe: “M'gondisi, awe u Mwanana wa Txizimu, u Mkoma wa Israyeli.”

⁵⁰Jesu a to xamula a txi khene kwakwe: “U tumela ngu kuwa ni nga kugela ku khani: Ni ku woni hahatshi ka mkuwu. U na wona ta hombe kupala tiya.”

⁵¹ A to engeta a txi khene: “Ngu ditshuri, ngu ditshuri, na mi gela ku khani: Kukhukhela konkuwa, mi na wona nzuma yi di tulekile, ni tingelozi ta Txizimu na ti txi kwela, ti va ti txhika txitimwi ka Mwanana wa M'thu.”