Read chopi Johani 13 Bible Online

Johani 13 - chopi bible

Johani 13

¹Na kusanzi kuhoka M'buso wa Pasika, Jesu, ngu kuziva ti to txi hokile txikhati txakwe, txa kupinda ka ditiko diya e tsula ka Tate, Ene a nga ti ti va randa vathu vakwe, va ku ha mafuni, a va kombile lirando kala kuhoka magwito.

²Se hagari ka kulalela, ngako Sathani a nga ti wulete mapimoni ka Judha Iskariyoti, mwanana wa Simoni, kufela ku ene e ningela Jesu;

³Se, kota nga ti Ene Jesu a nga txi tiziva ti to Tate a mu ningile sotshe manzani kwakwe, ni kuziva ti to Ene a ta ngu ka Txizimu, kambe a na tshumela e tsula ka txona Txizimu,

⁴a to khukha e leka sakudya e thavisa nguwo, a txi teka dithawula e di sunga txiwununi.

⁵Msana keto, a to thela mati mu ka mkamba, e khata kusambisa mikondo ya vagondiswa e yi bahulela ngu dithawula di a nga ti di sungile txiwununi.

⁶Mbimo yi a nga hokela Simoni Pedro, ene Pedro a to angula, a txi khene: “Mkoma, u lava ku ni kuwula mikondo awe?”

⁷Jesu a to mu xamula, a txi khene: “Ati ni ti mahako khu na ku tiziva konkuwa. U na ti manisisa msana ka mbimo.”

⁸Kambe Pedro a to khene: “Ani txima khu na mbi ni sambisa mikondo.” Konaho Jesu a to khene: “Ngako ni si ku sambisi mikondo, khu sikoti kuva ni txyavelo ni nani.”

⁹Se Simoni Pedro a to khene: “Mkoma, u nga sambise mikondo dwe, aniko ni sambise ni ona manza ni msungo.”

¹⁰Se Jesu a to khene: “Awu a nga samba, kha nga ni fanelo ya kusambiswa kambe, hahanze ka mikondo dwe, nguko wotshe mmidi wakwe wu basile: Se na nanu mi basile, kambe hi nga anu motshe.”

¹¹Nguko ene a ti m'ziva awu a no mu ningela. Ngu mhaka yeto, a wombile a txi khene: “Hi nga anu motshe mi nga basa.”

¹² Msana ka kuva a di va sambisile mikondo, a to tshumela a txi ambala syambalo sakwe, a txi ya khalahatsha kambe ha sakudyani, a txi khene: “Ma ti mana ati ni nga ti maha kwanu kani?

¹³Anu mi ni dhana ngu ditina daku ni M'gondisi ni Mkoma; inna, mi womba tona, nguko ani, ngani.

¹⁴Se ngako ani ni ku M'gondisi ni Mkoma, ni nga mi sambisa mikondo, na nanu mi fanela kusambisana mikondo ngu txanu.

¹⁵Ani ni mi mahete txikombiso, kufela ku, ati ni nga mahisa tona kwanu, na nanu mi na mahisa toneto.

¹⁶ Ngu ditshuri, ngu ditshuri na mi gela ku khani: Txithumi hi nga txa hombe ka mkoma wa txona; ni txirumwa hi nga txa hombe ka wule a nga txi ruma.

¹⁷Ngako mi txi tiziva tiya ni ku ti thuma, mi katekile.”

¹⁸“Kha ni wombi ngu nganu motshe; na va ziva ava ni nga va sawula. Aniko ta laveka ti to Mibhalo yi tatiseka, ayi yi kha yona: ‘Awu a dyako mndiwo ni nani, a ni wukete a txi ni ganyata ngu txizenende txakwe.’

¹⁹Na mi gela mhaka yiya, yi sinzi kumaheka, kasiku, ditshiku di yi humelelako, mi na kholwa ti to ‘Ani Ngani.’

²⁰Ngu ditshuri, ngu ditshuri, na mi gela ku khani: Awule a amukelako wuhi ni wuhi ni no mruma, a amukela ani nipune; awule a ni amukelako, a amukela awu a nga ni ruma.”

²¹Ku ti ngako Jesu a di wombile timhaka tiya, a to pandiseka moyani, e tsanisa a txi khene: “Ngu ditshuri, ngu ditshuri, na mi gela ku khani: Mmweyo wanu a na ni ningela.”

²²Sekoko vagondiswa va to wonana ngu txawe, va si ti zivi ti to a womba-womba ngu mani.

²³Kambe mmwani wa vagondiswa vakwe, awuwa Jesu a mu randako, a ti khigetete hakhana ka Jesu.

²⁴Sekoko Simoni a to mkweseta, a txi khene: “Mu wotise ti to a womba mani.”

²⁵Ene, ku ti ngako a di wekelete hakhana ka Jesu, a to mu wotisa, a txi khene: “Mkoma, i mani kani?”

²⁶Jesu, a to mu xamula a txi khene: “Ngu wule ni no mninga txikhwemu txi ni no thanga ngu ku txi beta.” Ku ti ngako a di txi betile, a to txi ninga Judha Iskariyoti, mwana Simoni.

²⁷Ku ti ngako ene a di amukete txikhwemu, Sathani a to mu wulelela. Se Jesu a txi khene kwakwe: “Ati u ti mahako, kuluveta u txi ti maha.”

²⁸Kambe ku ti si nga ni wammweyo ka vale va nga ti ti ho koneho, a nga ti manisisa ti to a wombela txani mapswiyo.

²⁹Ngako Judha i nga ti ene mñoli wa msava wa male, vamwani va to alakanya ti to Jesu a mu gela ku a na xave asi si lavekako m'busoni, mwendo kuya ninga somaha ka sisiwana.

³⁰Ku ti ngako a di tekile txikhwemu txile, Judha a to huma kunukunuko. I ti wusiku.

³¹Msana ka kuva ene Judha a di humile, Jesu a to womba a txi khene: “Konkuwa se a pfalisilwe Mwanana wa M'thu. Txizimu ni txona txi pfalisilwe kwakwe.

³²Ngako Txizimu txi di pfalisilwe kwakwe Mwanana, ni txona Txizimu txi na mpfalisa kunukunuko.

³³Vanangu: Ani ni ngadi ni nanu txikhatianyana txidotho. Mi na ni lava, aniko, nga ti ni nga wombisa tona ka Vajudha, na nanu konkuwa na mi gela ku khani: ‘Ahawa ani ni yako kona, anu kha mi sikoti kuta kona.’

³⁴ Na mi ninga mlayo wa wuphya: Randanani! Nga ti ani ni nga mi randa, na nanu mi fanete kurandana.

³⁵Ngu toneto, va no mi zivisa tona ti taku mi vagondiswa vangu: Ngako mi txi randana.”

³⁶Simoni Pedro a txi khene kwakwe: “Mkoma, u ya hani kani?” Jesu a to mu xamula, a txi khene: “Ahawa ani ni yako kona, awe khu na ku ni londisa konkuwa. Aniko ngu msana, u na ni londisa.”

³⁷Pedro a to khene kwakwe: “Mkoma, ni nga tandekisa kutxani ku kulondisa konkuwa kani? Ni na ningela wutomi wangu ngu kota yako.”

³⁸Jesu a to mu xamula a txi khene: “U khawe u na ningela wutomi wako ngu kota yangu? Ngu ditshuri, ngu ditshuri, na kugela ku khani: Mkuku wu sinzi kuemba, awe u na va u di ni lambile kararu.”