Read chopi Johani 14 Bible Online

Johani 14 - chopi bible

Johani 14

¹“Timbilu tanu ti nga karateke: Kholwani ka Txizimu, mi txi kholwa ni kwangu.

²Mtini ka Tata ku ni makhalo amangi. Idiku i si nga toneto, nga ni di mi gete. Na tsula kuya mi lulamisela wukhalo.

³Se ni di tsute, ni txi ya mi lulamisela wukhalo, ni na wuya kambe, ni ta mi teka, mi ya zumba kumweko ni nani, kasiku, ahawa ni ku kona ani, mi txi va mi di konaho nanu.

⁴Se anu ma yi ziva nzila ya kuya hawa ni yako kona.”

⁵Tomasi a to womba kwakwe, a txi khene: “Mkoma, athu kha hi kuzivi emo uyako kona; hi nga yi zivisa kutxani nzila kani?”

⁶Jesu a to mu gela a txi khene: “Ani ngani Nzila, Ditshuri ni Wutomi. Kha nga ho awule a tako ka Tata, i si nga ngu ngani.

⁷Idiku anu mo ni ziva, nga mi ndi na m'ziva ni Tate wangu; kukhukhela ka konkuwa, ma m'ziva, kambe mi mu woni.”

⁸Filipi a to khene kwakwe: “Mkoma, hi kombe Tate, ta hi dingana!”

⁹Jesu a to khene kwakwe: “I kale ni di zumbile ni nanu, se khu se ni ziva kani Filipi?” Awule a ni wonako, a woni Tate. Se nji txani u txi khawe: “Hi kombe Tate kani?”

¹⁰Khu kholwi ti to ani ni ka Tata, ni ti to Tate a kwangu, kani? Mapswi awa ni mi gelako, kha ni ma wombi ngu txangu dwe, aniko Tate a ku ni nani ngene a mahako mithumo yotshe.

¹¹“Kholwani ti to ani ni ka Tata, ni Tate a kwangu. Ngako mi si kholwi ka dipswi dangu, kholwani ngu mhaka ya yona mithumo.”

¹²“Ngu ditshuri, ngu ditshuri na mi gela ku khani: Awule a kholwako kwangu, a na maha nene mithumo yi ani ni yi mahako, kambe a na maha mithumo ya hombe yo pinda yiya, nguko ani se na tsula ka Tata.

¹³Se sotshe si mi no kombela ngu ditina dangu, ni na si maha, kasiku Tate e dhumiswa ka Mwanana.

¹⁴Kungako mi txi kombela txo maha ngu ditina dangu, ni na txi maha.”

¹⁵“Ngako mi txi ni randa, mi na veketa milayo yangu.

¹⁶Se ani ni na kombela ka Tata, ti to ene e mi rumela mmwani Mthaveleli, kasi e ta zumba ni nanu yotshe mbimo,

¹⁷i ku Moya wa ditshuri, awu ditiko di si sikotiko ku wu amukela, nguko kha di wu woni, kambe kha di wu zivi. Anu ma wu ziva, nguko wu zumba ni nanu, kambe wu mndani kwanu.”

¹⁸“Kha ni na mbi mi siya wusiwanani, ni na wuya ni ta zumba ni nanu.

¹⁹Msana ka txikhatianyana, ditiko kha di na mbi ni wona kambe, aniko anu mi na ni wona, nguko ani na hanya, ni nanu mi na hanya.

²⁰Ka donedo ditshiku mi nata tiziva ti to ni ka Tate wangu, ni ti to anu mi kwangu, ani nani ni kwanu.

²¹Awule a nga amukela milayo yangu a txi yi veketa, eyo ngene a ni randako; se awule a ni randako, a na randwa ngu Tate wangu. Se nani ni na mu randa, kambe ni na ti wonekisa kwakwe.”

²²Judha (i si nga ene Iskariyoti), a to khene: “Mkoma, ti na mahisa kutxani kutiwonekisa kwathu, u si ti wonekisi ka ditiko, kani?”

²³Jesu a to mu xamula, a txi khene: “Ngako m'thu a txi ni randa, a na vekisa dipswi dangu. Tate wangu a na mu randa, se hi nata kwakwe, hi ta maha wugovelo wathu.

²⁴Awule asi ni randiko, kha vekisi mapswi angu; kambe mapswi awa mi nga ma engisa, hi nga angu, nga Tate wu a nga ni ruma.”

²⁵“Ni mi gete timhaka tiya, ni di ngadi kumweko ni nanu.

²⁶Kambe Mthaveleli, i ku Moya wo Sawuleka, awu Tate a no mi rumela ngu ditina dangu, ene a nata mi gondisa sotshe simaha ni ku mi alakanyisa totshe ti ni khalako ku mi gela.”

²⁷“Kudikha na kusiya kwanu, na mi ninga kudikha kwangu. Kha ni mi ningi kufana ni ti ditiko di ningisako tona. Mbilu yanu yi nga karateke, hambi ni kuthava.

²⁸Mi ti engisile ati ni nga mi gela, ni txi khani: ‘Na tsula, aniko ni na wuya kwanu.’ Idiku ma ni randa, mi ndi na tsaka ngu kuwa ani ni tsulako ka Tata, nguko Tate mbwa hombe kupinda ani.

²⁹Ni mi gete konkuwa, ti sanzi kumaheka, kasiku mi nata kholwa mbimo yi ti no maheka.

³⁰Kha ni na mbi womba-womba to tala ni nanu, nguko awu a fumako, wa mafu awa wata. Kambe kha nga ni mtamo wa txilo txitimwi kwangu.

³¹Aniko ti maheka tiya, kasiku ditiko di txi tiziva ti to na mranda Tate, ni ti to ni mahisa ti ene Tate a nga ni leletisa tona. Wukani, he khukheni hawa!”