Read chopi Johani 16 Bible Online

Johani 16 - chopi bible

Johani 16

¹“Ni mi gete timhaka tiya, kasiku mi si thuki mi txi khuveka.

²Va na mi tovela masinagogani. Kambe ya ta mbimo yi, awu a no mi daya, a no pimisa ti to a thumela Txizimu.

³Va na mi maha totshe tiya, nguko kha va m'ziva Tate ni nani.

⁴Se ni mi gete timhaka tiya kasiku mbimo yi txi no hoka txikhati txa txona, mi na khumbula ti to ni ti mi gete. ‘Kha na mi gela tiya kukhukhela kukhatani, nguko ni ti ngadi ni nanu.’

⁵Konkuwa na tsula ka wule a nga ni rumela, kambe awalo ni wammweyo kwanu, a ni wotisako ku: ‘U ya hani, kani?’

⁶Kambe akuwa ni nga mi gela tiya, timbilu tanu ta pandiseka ngutu.

⁷Aniko ani na mi gela ditshuri: Ndi nene kwanu ku ani ni tsula, nguko ku nga tiya ni si tsuli, Mthaveleli kha na mbi ta kwanu; ngako ni txi tsula, ni na ya m'rumela kwanu.

⁸Sekoko, ene, ngu kuta kwakwe, a nata tumelisa ditiko ngu ka txionho, ni kululama ni kuabanisa.

⁹Ngu ka txionho, nguko vona kha va kholwi kwangu;

¹⁰ngu ka kululama, nguko na tsula ka Tata, se kha mi na mbiswa mi txi ni wona kambe;

¹¹ngu ka kuabanisa, nguko mfumeli wa mafu awa se a abanisilwe.

¹²Ni ngadi ni to tala, ta ku mi gela, aniko konkuwa ti nga mi nemela.

¹³Kambe mbimo yi a nota ene wule, i ku Moya wa ditshuri, ngene a nota mi gondisa dotshe ditshuri, nguko kha na mbi ta womba-womba ngu kwakwe, aniko a na womba totshe tiya a no tiengisa; se a na mi gela totshe tiya ti no maheka.

¹⁴Ene a na ni dhumisa, nguko a na amukela ti i ku tangu, a txi mi gela tona.

¹⁵Sotshe si Tate a ku naso, nzangu. Ngu toneto, ni wombako ti taku: Moya wu na amukela ti i ku tangu, wu txi mi gela tona.”

¹⁶“Ngu mbimoanyana kha mi na mbi ni wona, kambe ngu mbimoanyana mi na ni wona.”

¹⁷Sekoko vamwani ka vagondiswa vakwe va to kha vona: “Nda txani tonti a wombako a txi khene: ‘Ngu mbimoanyana kha mi na mbi ni wona, kambe ngu mbimoanyana mi na ni wona;’ ni ti taku: ‘Ni ya ka Tata kani?’ ”

¹⁸Va txi engeta kambe, va txi kha vona: “Tiwomba txani tonti taku: ‘Mbimoanyana kani?’ Athu kha hi ti pfisisi eto a wombako.”

¹⁹Se Jesu a ti zivile ti to va lava ku mu wotisa, se a nje khene: “Anu ma wotisana ngu kuwa ni nga khani: ‘Ngu mbimoanyana kha mi na mbi ni wona, kambe ngu mbimoanyana mi na ni wona.’

²⁰Ngu ditshuri, ngu ditshuri na mi gela: Mi na dila ni kupandiseka mbilu, kambe vathu va ditiko va na tsaka; se anu mi na xaniseka timbiluni kwanu, kambe kuxaniseka kwanu ku na hinduka ku txi maha litsako.

²¹Wamsikati, txikhati txi a lavako kuhefemula, wa xaniseka, nguko yi hokile mbimo yakwe; aniko msana ka kuhefemula mwanana, kha ku alakanyi kambe kuxaniseka, ngu litsako li a li pfako la kuvelekwa ka m'thu ha mafuni.

²²Ngu toneto, nanu konkuwa ma pfa kupanda timbiluni kwanu, kambe na tshumela ni txi mi wona, se timbilu tanu ti na tala ngu litsako, kambe awalo wu a no mi honyola litsako lanu.

²³Ka donedo ditshiku kha mi na mbi ni wotisa txilo. Ngu ditshuri, ngu ditshuri na mi gela ku khani: Sotshe si mi no si kombela ka Tata ngu ditina dangu, ene a na mi ha.

²⁴Kala konkuwa, kha mi nzi kukombela txilo ngu ditina dangu. Kombelani, mi na hiwa, kasiku litsako lanu li tatiseka.

²⁵Ni mi gete timhaka tiya ngu sidinganiso. Kambe ya ta mbimo yi ni no mbiswa ni txi mi wombawombela ngu sidinganiso, aniko ni na mi zivisa ta Tata, ni txi ti womba ha kubasani.”

²⁶“Ka donedo ditshiku mi na kombela ngu ditina dangu, kambe kha ni mi geli ti to ni na mi khongelela ka Tata.

²⁷Nguko ene Tate apune wa mi randa, nguko nanu mi ni randile ni kukholwa ti to ni tile ngu ka Txizimu.

²⁸Ni humile ngu ka Tata, ni tile ha mafuni. Konkuwa na khukha ha mafuni ni tsula ka Tata.”

²⁹Vagondiswa vakwe va to kha vona kwakwe: “Wona taku konkuwa, u womba-womba u txi txhamusa, khu nga ngadi u txi womba-womba ngu sidinganiso.

³⁰Konkuwa ha tiziva ti to awe wa ziva totshe; khu faneli kuwotiswa txilo ngu m'thu; ngu konaho ha kholwa ti to u ta ngu ka Txizimu.”

³¹Jesu a to xamula a txi khene: “Konkuwa ma kholwa kani?

³²Wonani, ya ta mbimo, ni konkuwa yi hokile, ayi mi no hangalaka, mmwani ni mmwani e teka nzila yakwe, mi txi ni siya ni di nokha; kambe kha ni nga nokha, nguko Tate a ni nani.

³³Ni mi gete timhaka tiya kasiku, kwangu, mi va ni kudikha. Mi nava ni sixaniso mu ditikoni, kambe tsanani msana, ni di xute ditiko.”