Read chopi Johani 17 Bible Online

Johani 17 - chopi bible

Johani 17

¹Jesu ngako a di wombile timhaka tiya, a to gula maso a txi wona nzumani, a txi khene: “Tata, txi hokile txikhati. Dhumisa Mwanana wako, kufela kunene Mwanana wako e kudhumisa,

²nguko u mu ningile mtamo txitimwi ka votshe vathu, kasiku e ninga wutomi wo mbi guma ka votshe vale u nga mninga.

³Se wutomi wo mbi guma ngu kuva va txi kuziva, awe, u ku Txizimu txa tximwetxo txa ditshuri, ni Jesu Kristu, awu u nga mruma.”

⁴“Ani ni ku dhumisile ha ditikoni, ngu kuhetisa mthumo wu u nga ni sikela wona ti to ni wu maha.

⁵Se konkuwa, ni dhumise, awe Tata, masoni kwako, ngu wudhumo wule ni nga ti nawo, kumweko ni nawe, na ditiko di sanzi kumahwa.”

⁶“Ni wonekisile ditina dako ka vathu va ditiko, avale u nga ni ninga. Vona i ti vako, aniko awe u ni ningile, vona va veketile dipswi dako.

⁷Akuwa, va tiziva ti to sotshe si u nga ni ninga si ta ngu kwako;

⁸Nguko ni va ningile mapswi awa awe u nga ni ninga, se vona va ma amukete; va tiziva ngu ditshuri ti to ni ta ngu kwako, kambe va tumela ti to ngawe u nga ni ruma.

⁹Ani na va khongelela, kha ni khongeleli ditiko, aniko ni khongelela va u nga ni ninga, nguko mbako.

¹⁰Sotshe si i ku sangu nzako, ni sotshe si i ku sako nzangu; ngu toneto na dhumiswa ngu vona.

¹¹Ani kha ni nga ngadi ha ditikoni, kambe vona va ngadi sate ha ditikoni, se ani ni ta kwako. Tate wa kusawuleka, va xayise ditinani kwako, ava u nga ni ninga, kasiku va na maha mmweyo, nga athu hi ku mmweyo.

¹² Ni di ngadi navo ha mafuni, ni ti va xayisa ditinani kwako. Ni va xayisile ava u nga ni ninga; se kha ku nga ho ni wammweyo a nga lova, i si nga ene mwanana wa kulova, kufela ku Mibhalo yi tatiseka.

¹³Se konkuwa ni ta kwako, aniko ni womba timhaka tiya ni di ngadi ha mafuni, kasiku, kutsaka kwangu ku va kwawe ngu kutatiseka.

¹⁴Ni va ningile dipswi dako, se ditiko da va vengela, nguko hi nga va dona ditiko, nga ani ni ku si nga wa ditiko.

¹⁵Kha ni ku kombeli ti to u va thavisa ha ditikoni, aniko ngu ti to u txi va vhikela ka M'bihi.

¹⁶Hi nga va ditiko nga ani ni ku si nga wa ditiko.

¹⁷Va sawulekise ngu ditshuri. Dipswi dako ngu dona ditshuri.

¹⁸Ngako u nga ni ruma ha ditikoni, nanani ni va rumile ha ditikoni.

¹⁹Se ni sawulekisele vona, ti to ni vona ve sawulekiswa ditshurini.”

²⁰“Kha ni khongeleli vona dwe, kambe ni khongelela ni vona va va no kholwa kwangu ngu dipswi dawe.

²¹Votshe va nave mmweyo, nga ku awe, Tata, u ku kwangu, ni nani ni ku kwako, ni vona va nave kwathu, kasiku ditiko di txi kholwa ti to u ni rumile.

²²Ni va ningile kuphatima kuwa awe u nga ni ninga, kasiku va txi va i di mmweyo, nga athu hi ku mmweyo:

²³Ani kwako ni nawe kwangu, kasiku va txi va i di va kutatiseka amu ka wumwewo, ni ti to ditiko di txi tiziva taku awe u ni rumile, ni ti kambe taku awe u va randile, nga ti u nga ni randisa tona ani.

²⁴Tata, ni dhunda ti taku avale u nga ni ninga, ve va ni nani, ahawa ani ni ku kona, kasiku ve wona kuphatima kwangu, kuphatima kuwa u nga ni ninga awe; nguko awe u ni randile u sanzi kuvanga ditiko.

²⁵Tate wa kululama, hambi ditiko di sa kuziva, ani ni ku zivile, ni vona va ti zivile ti taku u ni rumile.

²⁶Ni va ningile kuziva ditina dako, kambe ni ngadi ni txi na va ninga ku di ziva, kasiku lirando li u nga ni randa ngu lona, li va li di kwawe, ni nani ni va ni di kwawe.”