Read chopi Johani 19 Bible Online

Johani 19 - chopi bible

Johani 19

¹Sekoko Pilato a to rumela ti to Jesu a na kwapelwe ngu sisepu.

²Msana keto, masotxhwa ma to luka m'bhoti wa mipa, va txi msanzeka ha msungo kwakwe, se ve mu kapeka nguwo ya disilika do bhilivila.

³Va txi mtshuketela hafuhi, va txi kha vona: “Xeweni, mfumeli wa Vajudha!” Ngu msana va txi mu peka tipama.

⁴Sekoko Pilato a to huma kambe, e va gela tiya: “Wonani, na mu humisa hahanze kufela ku mi ti wona ti to kha ni mani mnandu ni wawumwewo kwakwe.”

⁵Sekoko, a to huma Jesu, a di ni m'bhoti wa mipa ni nguwo ya disilika. Pilato a to va gela a txi khene: “Ndiyo m'thu!”

⁶Mbimo yi vaphaxeli va hombe ni sithumi va nga mu wona, va to kwangula, va txi kha vona: “M'bethele! M'bethele! Ha txihambanoni, mu bethele ha txihambanoni!” Pilato a to va gela, a txi khene: “Mtekeni anu mi txi ya mu bethela, nguko ani kha ni woni mnandu kwakwe.”

⁷Vajudha va to xamula va txi kha vona: “Athu hi na ni mthetho, se ka wona mthetho wuwa, ene a fanela kufa, nguko a ti mahile Mwanana wa Txizimu.”

⁸Pilato, mbimo yi a nga engisa mapswi awa, a to talelwa ngu kuthava;

⁹Se e tshumela a txi wulela kambe nyumbani ka wukoma, a txi wotisa Jesu, a txi khene: “Kasi awe u ta ngu hani, kani?” Kambe Jesu kha nga xamula txilo.

¹⁰Pilato a to khene: “Khu ni anguli kani? Khu ti zivi ti to nina ni mtamo wa ku kubethela ha txihambanoni mwendo ku kuthukunyula, kani?”

¹¹Jesu a to xamula a txi khene: “Nga u si nga ni mtamo txitimwi kwangu, idiku u sa wu ningwa ngu ni txitimwi. Ngu toneto, awu a nga ni ningela kwako ana ni txionho txo pindisa.”

¹²Kukhukhela ka yona yile mbimo, Pilato a ti zama ku mu thukunyula, kambe Vajudha va so kwangula, va txi kha vona: “Ngako u txi mu thukunyula, khu engisani ni Khezari, nguko wuhi ni wuhi a ti mahako mfumeli, a kanyisa Khezari.”

¹³Pilato, a di engisile mapswi awa, a to humisa Jesu hahanze, se e khalahatsha ha txikhaloni ka kuthethisela kona, ahawa va nga ti kudhana ku Marigwini, se ngu Txihebheru va txi i Gabbatha.

¹⁴Se i ti ditshiku da kulongisela Pasika ngu mbimo ya kulava kuhoka ka txikhati txa wutxhanu ni tximwetxo. Se a to gela Vajudha, a txi khene: “Mfumeli wanu ndiyo!”

¹⁵Kambe vona va to khata kukwangula, va txi kha vona: “A na fe! A na fe! Mu bethele ha txihambanoni!” Konaho Pilato a to khene: “Ni na bethela ha txihambanoni mfumeli wanu kani?” Aniko vaphaxeli va hombe va to xamula, va txi kha vona: “Athu kha hi nga ni mmwani mfumeli, hahanze ka Khezari.”

¹⁶Sekoko Pilato a to ningela Jesu kwawe, kasiku va txi ya mu bethela ha txihambanoni.

¹⁷Se vona va to teka Jesu a di pakatile txihambano txakwe, a to huma e tsula ka wukhalo wu wu nga dhanwa ku i Txikwakwa, ngu Txihebheru va txi i “Golgota,”

¹⁸ahawa va nga ya mu bethela ha txihambanoni kumweko ni makhamba mambidi, ngu khe ni khe, seni ene Jesu ve mu veka hagari.

¹⁹Pilato a to bhala m'bhalo, veya wu nameketa txitimwi ka txihambano. Ku ti bhatwe tito: “Jesu wa Nazareta, mfumeli wa Vajudha.”

²⁰Vajudha vavangi va gondile m'bhalo wuwa, nguko i ti hafuhi ni dhoropani wukhalo wu Jesu a nga ti bethetwe kona, ni ku ku nga ti bhatwe ngu Txihebheru, Txigriki ni Txilatina.

²¹Vaphaxeli va hombe va Vajudha va to gela Pilato, va txi kha vona: “U nga bhale ku khawe: ‘Mfumeli wa Vajudha’, aniko bhala ti to ‘Awu ngene a nga khene: Ni mfumeli wa Vajudha.’ ”

²²Pilato a to va xamula, a txi khene: “Ati ni nga bhala, ni bhate.”

²³Masotxhwa ma di gwitile kubethela Jesu ha txihambanoni ma to teka syambalo sakwe, me si bhanda ngu mune wa madhawa; disotxhwa ni disotxhwa di txi mana txyavelo txa dona. Ma thavisile kumweko ni dibhaji. Se dibhaji diya i ti si nga do rungwa, i ti do lukelwa kukhukhela txitimwi kala hahatshi.

²⁴ Se va to langana, va txi kha vona: “Hi ngadi vharuleni, aniko he xaxuveni tixolo, kasi kuwona ti to di na lumba mani.” Ngu koneho ku nga tatiseka dipswi da Mibhalo, adiya di ku kha dona: “Va abanete syambalo sangu, ve xaxuva tixolo ngu dibhaji dangu.” Ngu toneto, ma nga mahisa tona masotxhwa.

²⁵Hafuhi ni txihambano txa Jesu, a ti ti ho Mame wakwe ni mwanawe Mame wakwe, ene Mariya, msikati wa Kleyopasi, ni Mariya wa Magdhala.

²⁶Jesu a to wona Mame wakwe a di emile kumweko ni mgondiswa wu Ene a mu dhundako, se a txi gela Mame wakwe, a txi khene: “Wamsikati, mwanana wako ndiyo!”

²⁷Ngu msana a to gela mgondiswa wakwe, a txi khene: “Mame wako ndiyo!” Se kukhukhela ka yona yile mbimo, mgondiswa wule a to mteka e tsula nayo m'tini kwakwe.

²⁸ Msana ka tiya, ngako Jesu a di woni ti to totshelele ti gumile, ni kufela kambe ku na tatiseka dipswi da Mibhalo, a to khene: “Nina ni ditora.”

²⁹Txi ti ti ho txiya txa kutala ngu vhinagre. Se va to txhomeka txiponja ahawa ka litshava, na va di txi nakanisile ngu vhinagre, ve txi yisa ha txisofuni kwakwe.

³⁰Ngako Jesu a di amukete vhinagre yile, a to khene: “Totshe ti hetisekile.” Se e namisa msungo e ningela moya.

³¹Vajudha, ngako i nga ti ditshiku da kulongisela, kasiku sirumbi si si zumbi ha txihambanoni dotshe ditshiku da Sabbata, kha ditshuri ditshiku da Sabbata i ti da hombe ngutu, va to tsula veya kombela ka Pilato ti to ve funyetela minenge ya sirumbi, ve gwita ve si thavisa hale.

³²Masotxhwa ma tile mata funyetela minenge ya wo khata ni ya mmwani ka vale va nga ti bethetwe ha txihambanoni kumweko nayo.

³³Kambe mbimo yi va nga hokela Jesu, ve wona ti to se a fite, kha va funyetela minenge yakwe.

³⁴Aniko mmweyo wa masotxhwa a to mthola ha ka didhawa ngu ditxhari, se konaho ku to humela mnoha ni mati.

³⁵Se awu a nga yi wona mhaka yiya, ngene a fakazako, kambe wufakazi wakwe mbwa ditshuri. Ene wa tiziva ti to a womba ditshuri, kasiku nanu mi sikota kukholwa.

³⁶Nguko totshe tiya ti mahekile kasi kutatiseka ati ti nga bhalwa, va txi kha vona: “Dirambu dakwe ni da dimwedo kha di na mbi funywa.”

³⁷Ka wumwani wukhalo ti bhatwe kambe, va txi kha vona: “Va na wonetela awule va nga mu bhaya.”

³⁸Msana ka tiya, Josefa wa Arimateya, i nga ti mgondiswa wa Jesu, hambiko i nga ti kumahisa kusisala ngu kuthava Vajudha, a to ya kombela ka Pilato ti to e mu tumelela kuteka mmidi wa Jesu. Se Pilato a m'tumelete. Josefa a to tsula eya teka txirumbi.

³⁹ Nikodhemo nene, awule kukhatani a nganga ya ni wusiku a txi ya womba-womba ni Jesu, a tile nene ni mira yi nga ti patanisilwe kumweko ni aloesi, asi si nga ti ni mpimo wa mtxhanu wa magumi a makilu.

⁴⁰Se va to teka mmidi wa Jesu ve wu phutela mu ka tinguwo to basa, ni ku wu totela mafura o bhumula, nga ti Vajudha va lulamisisako tona kutsula diyivani.

⁴¹Hafuhi ni wukhalo wule Jesu a nga bethelwa kona ha txihambanoni, ku ti ni thembwana ya siluva, amuwa va nga ti mahile diyiva da diphya, ku nga sanzi kukelelwa m'thu ni wammweyo.

⁴²Ngako i nga ti ditshiku da kulongisela da Vajudha, niko kambe diyiva dile di nga ti hafuhi, va to veka kona mule mmidi wa Jesu.