Read chopi Johani 2 Bible Online

Johani 2 - chopi bible

Johani 2

¹Ngu ditshiku da wuraru, kumahilwe mtxhadho Kana ka Galileya. Se a ti ti ho koneyo Mame wa Jesu.

²Jesu nene a ti rambilwe kona mtxhadhoniyo kumweko ni vagondiswa vakwe.

³Ku ti ngako vhinya yi di gumile, Mame wa Jesu a to mu gela ku khene: “Kha va nga ni vhinya.”

⁴Aniko Jesu a ti khene kwakwe: “Wamsikati, mhaka yako ni nani ngu yihi kani? Txikhati txangu kha txi nzi kuhoka.”

⁵Se Mame wakwe a to gela sithumi, a txi khene: “Mahani totshe ti a no mi gela.”

⁶Ti ti tsikaretilwe konaho mtxhanu wa tifuko ni yimweyo, ta mraka, ngu mhaka ya kusamba, madingano ni kuruma ka mlayo wa Vajudha. Yimwani ni yimwani ka tona yi ti tatwa ngu mipimo yimbidi mwendo yiraru ya so thelwa.

⁷Jesu a to va gela ku khene: “Ti tateni ngu mati.” Se vona va ti tatile ti txi fi.

⁸Msana keto, a ti khene kwawe: “Konkuwa, rekani mi txi ya ninga mthangeli wa m'buso.” Se vona ve ma yisa kwakwe.

⁹Mbimo yi mthangeli wa m'buso, a nga tshurumba mati ale ma nga hindulwa me mahwa vhinya, ene asi ti zivi ti to vhinya yiya yi ta ngu hani; aniko ti txi ziwa dwe ngu sithumi, si si nga reka mati. Konaho mthangeli a to dhana mteki,

¹⁰a txi mu gela ku khene: “Votshe vathu va thanga ngu vhinya ya yinene ve yi humisa, se ngako va di sete ta tinene ava va nga rambwa, ngu kona va humisako yo va i si nga ya yinene ngutu. Kambe awe u veketile vhinya ya yinene kala ayi mbimo!”

¹¹Makhato awa a sidiwukiso, Jesu a ma mahete Kana ka Galileya, e komba wudhumo wakwe, se vagondiswa vakwe va to kholwa kwakwe.

¹² Msana ka tiya, Jesu a to relela eya Kapernawume, ene ni mame wakwe ni vanawe ni vagondiswa vakwe. Va ti ya zumba kona masiku madotho.

¹³Pasika ya Vajudha yi ti hafuhi, se Jesu a to kwela Jerusalema.

¹⁴Dithepeleni, a to ya mana vathu va va xavisako tihomu ni tinvuta ni situvani, ni va va txitxako timale va di zumbile konamo.

¹⁵Ku ti ngako a di mahile txisepu ngu tingoti, a to va tovela votshe Dithepeleni, ni tinvuta ni tihomu; a txi hangalasa ni male ya vale va bhindulako, e retha ni timeza tawe ti wela.

¹⁶A txi gela va va xavisako situvani a txi khene: “Thavisani sotshe siya hawa; mi nga tekeni nyumba ya Tate wangu mi yi maha nyumba ya mabhindu.”

¹⁷ Se vagondiswa vakwe va to alakanya ati ti nga ti bhatwe, taku: “Kupandisekela nyumba yako ku na ni dya.”

¹⁸Se Vajudha va to womba-womba, va txi kha vona kwakwe: “Njikombiso muni u hi kombisako ngu txona ti to u na ni mtamo wa kumaha toneto kani?”

¹⁹ Jesu a to xamula a txi khene: “Khundumusani Dithepele diya, ani ni na di wusa ngu masiku mararu.”

²⁰Se Vajudha va txi kha vona: “Dithepele diya di akilwe ngu mune wa magumi a malembe ni mtxhanu ni dimwedo, se awe u khawe u na di wusa ngu masiku mararu kani?”

²¹Aniko ene a ti ti womba ngu dithepele da mmidi wakwe.

²²Ngu toneto, mbimo yi a nga wuka ngu ka vakufa, vagondiswa vakwe va to khumbula ti to a va gete mhaka yiya; se ve kholwa ka Mibhalo ni ka dipswi di di nga wombwa ngu Jesu.

²³Ene a di ngadi Jerusalema, ngu mbimo ya m'buso wa Pasika, vathu vavangi va to kholwa ditinani kwakwe, ngako va nga txi wona sixamaliso si a nga txi si maha.

²⁴Kambe Jesu kha va themba, nguko a ti va ziva votshe,

²⁵i ti si nga wolava kumaha ngu kugelwa ta m'thu, nguko ene a txi tiziva ti ti ku timbiluni ka vathu.