Read chopi Johani 20 Bible Online

Johani 20 - chopi bible

Johani 20

¹Ka ditshiku do khata ka divhiki, ku di ngadi phum, Mariya, wa Magdhala, a to vindukela a txi ya diyivani, se a txi ya mana dirigwi di di thavisilwe ha diyivani.

²Se e tutuma a txi ya gela Pedro ni mmwani mgondiswa wu Jesu a nga ti m'dhunda, a txi khene kwawe: “Va thavisile Mkoma diyivani, se kha ni kuzivi amu va nga mu veka kona.”

³Sekoko Pedro a to khukha kumweko ni mmwani mgondiswa, ve tsula diyivani.

⁴Va ti tutuma votshe ngu wumbidi wawe, kambe mgondiswa wule mmwani, i nga ti wa livilo kupinda Pedro, a to mu siya msana, a txi thanga ene a txi hoka diyivani.

⁵Se ngako ene a di namile e solela, a to wona tinguwo to basa ti di vekilwe hahatshi, kambe kha wulela.

⁶Se Simoni Pedro, a nga txi londeta ngu msana, a to bwaka nene, se e wulela diyivani a txi wona tinguwo ti di vekilwe hahatshi,

⁷Kambe nguwo yi va nga ti mphutete ngu yona msungo yi ti sa vekwa wukhalo wumwewo ni timwani, aniko yi ti petetwe yi vekwa ngu phuho, yona yokha.

⁸Sekoko mgondiswa wule mmwani a nga thanga ene e hoka diyivani, nene a wulete, a txi ti wona, se a txi kholwa.

⁹Nguko kha ditshuri va ti sanzi ku ti manisisa ti to Ene a ti fanela kuwuka ngu ka vakufa, madingano ni kuwomba ka Mibhalo.

¹⁰Se vagondiswa va to tshumela ve tsula mwani.

¹¹Mariya a ti emile hahanze, hafuhi ni diyiva, a txi dila. Se a di ngadi a txi dila, a to nama e solela diyivani,

¹²e wona tingelozi timbidi, ti di ambate so basa, na ti di khalahatshile ka wukhalo wuwa txirumbi txa Jesu txi nga ti otelisilwe kona, yimweyo yi di ngu misungoni, yimwani yi di ngu minengeni.

¹³Ti wombile kwakwe ti txi kha tona: “Wamsikati, u dilela txani kani?” Ene a to khene ka tona: “Nguko va thavisile Mkoma wangu, se kha ni kuzivi amu va nga mu veka kona.”

¹⁴Ku ti ngako a di wombile eto, a to tshembereka a txi wona Jesu a di emile, kambe asi mu zivi ti to i Jesu.

¹⁵Jesu a txi khene kwakwe: “Wamsikati, u dilela txani kani? U lava mani kani?” Ene, ngu kupimisa ti to i mxayisi wa thembwe ya siluva, a to khene kwakwe: “Mkoma, ngako i di awe u nga mu thavisa, ni gele ahawa u nga mu veka kona, ni na ya mu teka.”

¹⁶Jesu a to mu gela ku khene: “Mariya!” Ene a to tshembereka, a txi womba ngu Txihebheru, a txi khene: “Rabbuni!” Ati ti wombako ku “M'gondisi.”

¹⁷Jesu a to khene kwakwe: “U nga ni gwese, nguko kha ni nzi kuya ka Tata. Aniko tsula ka vanathu, u txi ya va gela, u txi khawe: Na kwela, ni ya ka Tate wangu, i ku Tate wanu; ka Txizimu txangu, i ku Txizimu txanu.”

¹⁸Mariya wa Magdhala a to ya gela vagondiswa, a txi khene: “Ni woni Mkoma, ngene a nga ni gela tiya.”

¹⁹Minovani ka ditshiku dile, i ku ditshiku do khata ka divhiki, vagondiswa va ti maneka va di tshanganile ka wukhalo wokari, va txi ti sekela matimba, ngu kuthava Vajudha. Se Jesu e wulela, a txi ema hagari kwawe, a txi va losa ngu mapswi awa: “Kudikha ku nave ni nanu!”

²⁰A di wombile toneto, a to va komba manza ni didhawa dakwe. Vagondiswa va to tsaka ngu kuwona Mkoma.

²¹Ene a to engeta a txi khene: “Kudikha ku nave nanu! Nga ti Tate a nga ni ruma, nanani na mi ruma.”

²²A di wombile tiya, a to va futetela, na a txi khene: “Amukelani Moya wo Sawuleka.

²³ Ka vale mi no va divalela sionho, va na divalelwa; ani vale mi no mbi va divalela sionho, kha va na mbi divalelwa.”

²⁴Tomasi, mmweyo wa vale va Digumi ni Vambidi, awule a dhanwako ku i Dhidhimo, a ti si nga ho navo, mbimo yi a nga ta Jesu.

²⁵Vamwani vagondiswa va mgete, va txi kha vona: “Hi woni Mkoma!” Aniko ene a to khene kwawe: “Ani ngako ni si woni mu ka manza akwe timbowo ta sipikiri, ngako kambe ni si wuleti litiho langu mu ka timbowo ta sipikiri, ni kuveka dianza dangu ha didhawani kwakwe, kha ni na mbi kholwa.”

²⁶Ku di pindile mtxhanu wa masiku ni mararu, va to tshangana kambe vagondiswa nyumbani, se Tomasi a ti ti ho nene. Ku di sekilwe matimba, a to ta Jesu, a ta ema hagari kwawe, na a txi va losa kambe ngu mapswi awa: “Kudikha ku nave ni nanu!”

²⁷Ngu msana a to gela Tomasi, a txi khene: “Tisa litiho lako ahawa, u txi wona manza angu; tshuketisa dianza dako, u txi di beta ha didhawani kwangu, u nga swe kambe u txi ti maha mkaneti, aniko kholwa.”

²⁸Se Tomasi a to khene: “Mkoma wangu ni Txizimu txangu!”

²⁹Jesu e tshumela a txi khene kwakwe: “Akuwa u nga ni wona, wa kholwa. Va katekile avale va kholwako, hambi va sa wona!”

³⁰Simwani sidiwukiso sasingi asi mahile Jesu masoni ka vagondiswa, asiya si nga mbi bhalwa ka dibhuku diya.

³¹Kambe timhaka tiya ti nga bhalwa, ti bhaletwe ku mi txi kholwa ti to Jesu ngene Kristu Mwanana wa Txizimu, ni tito, ngu kukholwa kuwa, mi na mana kuhanyiswa ngu ditina dakwe.