Read chopi Johani 21 Bible Online

Johani 21 - chopi bible

Johani 21

¹Msana keto, Jesu a ti wonekisile kambe ka vagondiswa, hafuhi ka digova da Tibheriyadhe. A ti wonekisisile tiya:

²Va ti ka wukhalo wumwewo Simoni Pedro, Tomasi, awu a dhanwako ku i Dhidhimo, ni Nathaniyele, awule i nga ti wa Kana ka Galileya, kumweko ni vanana va Zebhedhewu ni vamwani vagondiswa vakwe va vambidi.

³ Simoni Pedro a to va gela a txi khene: “Na nga ya kukokani.” Vona va to xamula va txi kha vona: “Nanathu hi na tsula kumweko ni nawe.” Se va to huma veya wulela mu ngalavani, aniko ka wule wusiku kha va mana txilo.

⁴Mbimo yi di nga txa, Jesu a to ti wonekisa kwawe, likasani ka linene, aniko vagondiswa kha va tiziva ti to ngene.

⁵Jesu a to va gela koko, a txi khene: “Vanangu, mi na ni sihaka kani?” Vona va to xamula, va txi kha vona: “Ahim-him.”

⁶ Ene a to va gela ku khene: “Betani likoka ka didhawa da txinene ka ngalava, mi na si mana.” Vona va to beta likoka, se ve tandeka ni ku li ndinda, ngu kutala ngutu ngu sihaka.

⁷Sekoko m'gondiswa wule wo randeka a to womba, a txi khene: “Ngene Mkoma!” Se mbimo yi Simoni Pedro a nga engisa ti to i Mkoma, a to ambala dibhaji, nguko a ti sa ambala txilo, se a txi pumula lineneni.

⁸Vamwani vagondiswa va nga ti kule nyana, ka mpimo wa mazana mambidi a mikono, va to wuya ni ngalava, na va txi ndinda likoka, li li nga ti tate ngu sihaka.

⁹Va di humile hahanze, va to wona konaho makala a mndilo ni sihaka txitimwi ka ona ni dipawu.

¹⁰Jesu a to va gela, a txi khene: “Wuyisani sihaka si mi nga koka konkuwa.”

¹¹Simoni Pedro a to wulela mu ngalavani, a txi ndinda likoka, a txi li humisa hahanze, ali li nga tala ni sihaka sa hombe sa 153. Hambiko i nga ti sasingi, likoka kha la vharuka.

¹²Jesu a va gete, a txi khene: “Ngonani, mi ta susula.” Ni mmweyo wa vagondiswa kha tsana ku mu wotisa, a txi khene: “Ngawe mani kani?” Nguko va ti zivile ti taku ngene Mkoma.

¹³Sekoko Jesu a to tshuketa hafuhi, a txi teka dipawu a txi va ninga; a txi mahisa toneto kambe ngu sihaka.

¹⁴Atxiya txikhati nja wuraru, Jesu a nga ti wonekisa ngu txona ka vagondiswa vakwe, msana ka kuva a di wukile ngu ka vafi.

¹⁵Ngako va di gwitile kudya, Jesu a to wotisa ka Simoni Pedro, a txi khene: “Simoni, mwana Johani, awe wa ni randa kupinda vava kani?” Ene a xamute, a txi khene: “Mkoma, wa tiziva ti to ani na kuranda.” Jesu a to mu gela, a txi khene: “Dyisa tinvuta tangu.”

¹⁶A to engeta da wumbidi, a txi khene: “Simoni, mwana Johani, awe wa ni randa kani?” Ene a xamute, a txi khene: “Ina, Mkoma, awe wa tiziva ti to ani na kuranda.” Jesu a mgete, a txi khene: “Dyisa tinvuta tangu.”

¹⁷A to mu wotisa da wuraru, a txi khene: “Simoni, mwana Johani, awe wa ni randa kani?” Pedro a to thelwa dikhodho nguko Jesu a nga mu wotisa ka wuraru, a txi khene: “Awe wa ni randa kani?” Se a mu xamute, a txi khene: “Mkoma, awe wa tiziva totshe. Awe wa tiziva ta tinene ti to ani na kuranda.” Jesu a mgete, a txi khene: “Dyisa tinvuta tangu.

¹⁸Ngu ditshuri, ngu ditshuri na kugela ku khani: Mbimo yi u nga ti mfana, ngawe upune u nga txi ti sunga libhande txiwununi, u txi ya muwa u nga txi kulava, aniko mbimo yi u no kumba, u na nawuluta manza ako, se mmwani ngene a no kusunga libhande, a txi kuyisa ni mu awe u si ku laviko.”

¹⁹Ene a wombile tiya, kasi kukombisa mxowo wa lifo li Pedro a no dhumisa ngu lona Txizimu. Msana ka mapswi awa, a to mu gela ku khene: “Ni londise!”

²⁰ Pedro ngako a txi tshembereka, a to wona mgondiswa wu a randwako ngu Jesu, na a txi va londisa. I ti wule a nga txi tshikila hakhana kwakwe Jesu txilaleloni, a txi mu wotisa ku khene: “Mkoma, i mani wu a no kuningela kani?”

²¹Se Pedro a di mu woni, a to womba ka Jesu, a txi khene: “Mkoma awuwa-ko, nji txani txi no maheka kwakwe kani?”

²²Jesu a to khene kwakwe: “Ngako ni txi lava ku a na zumbe kala ni wuya, ku nga va i di txani kwako kani? Awe ni londise!”

²³Ngu konaho mhaka yiya yi to hangalaka hagari ka vanawe, ti to mgondiswa wule kha na mbi fa. Kambe Jesu kha womba tona taku khene kha na mbi fa; aniko a ti khene: “Ngako ni txi lava ku a na zumbe kala ni wuya, ku nga va i di txani kwako kani?”

²⁴Mgondiswa wuwa ngene a fakazako timhaka tiya, ngene kambe a nga ti bhala. Kambe ha tiziva ti to wufakazi wakwe mbwa ditshuri.

²⁵Ti ngadi ho timwani timhaka to tala a nga maha Jesu; se idiku ti ti bhatwe yimweyo ni yimweyo, kha ni thembi ti to hambi ditiko dotshe di nga dingana mabhuku awa ma ndi no bhalwa. Amen!