Read chopi Johani 4 Bible Online

Johani 4 - chopi bible

Johani 4

¹Jesu a ti zivile ti to Vafarisi va engisile vathu va txi womba ku ene wa pala Johani kumana vagondiswa ni kubhabhatisa vathu.

²(Hambiko a nga ti si Jesu apune bhabhatisiko, aniko i ti vagondiswa vakwe).

³Konaho Jesu a to khukha Judheya a tshumelela Galileya.

⁴Kambe a ti fanela kutshawunyeta ngu Samariya.

⁵Se a to hoka ka m'ti wumwani wa Samariya, awu wu dhanwako ku i Sikari, hafuhi ni thembwe yi Jakobe a nga ninga Josefa, mwanana wakwe. Konaho ku ti ni txisima txa Jakobe.

⁶A di karate ngu kutsimbila, Jesu a to khalahatsha hafuhi ni txisima txa Jakobe. I ti txikhati txa wutxhanu ni tximwetxo.

⁷A to bwaka wamsikati wa Samariya, ku ta reka mati. Se Jesu a to womba kwakwe a txi khene: “Hi nga niha mati o sela.”

⁸Kasi vagondiswa vakwe va ti tsute didhoropani kuya xava sakudya.

⁹Wamsikati wule wa Msamariya a to mu xamula a txi khene: “Ti nga mahisa kutxani awe u ku Mujudha kukombela mati kwangu ni ku Msamariya kani?” (Nguko Vajudha kha va tolovelani ni Vasamariya).

¹⁰Se Jesu a to xamula a txi khene: “Idiku wo txi ziva txihiwa txa Txizimu, ni ti to i mani wule a ku khene: ‘Hi nga niha mati o sela’ nga i di awe u mu kombelako ti to ene e kuninga mati a kuhanya.”

¹¹Wamsikati a to khene: “Mkoma, khu nga ni txo reka ngu txona mati txisimani, kambe ni txona txisima txi hokomile, se u na ma mana hani mati a kuhanya kani?

¹²U nga va u di wa hombe awe kupinda tate wathu Jakobe, a nga hi ninga txisima txiya, atxiya nene a nga sela ka txona, kumweko ni vanana vakwe, ni sifuyo sakwe kani?”

¹³Jesu a to engeta e xamula a txi khene: “Awule a selako awa mati, a na tshumela kambe a txi pfa ditora;

¹⁴aniko awule a selako mati yawa ni no mninga ani, kha na mbiswa a txi pfa ditora; kambe mati yawa ni no mninga, ma na hinduka mndani kwakwe ma txi maha txisima txa mati yawa ma mu ningako wutomi wo mbi guma.”

¹⁵Se wamsikati a to khene kwakwe: “Mkoma, ni he matiyo, kasiku ni si swi ni txi pfa ditora, ni ti to ni si swi kambe ni ta hawa ni ta reka.”

¹⁶Jesu a txi khene kwakwe: “Tsula u txi ya dhana mwamna wako, u tshumela u wuya.”

¹⁷Wamsikati a txi mu angula, a txi khene: “Kha ni nga ni mwamna.” Jesu a to khene kwakwe: “U wombile ditshuri, u txi khawe: ‘Kha ni nga ni mwamna.’

¹⁸Nguko u zumbile ni mtxhanu wa vavamna, se awu u ku nayo konkuwa, hi nga wako. Ngu toneto, u wombile ditshuri.”

¹⁹Wamsikati a to khene: “Mkoma, na ti wona ti to kasi u Mprofeti:

²⁰Vatate vathu va ti ti khozela ka mmango wuwa, se awe u khawe Jerusalema ngu kona va fanelako kuya khozela kona.”

²¹Jesu a to khene: “Wamsikati, tumela ti ni kugelako: Yata mbimo yi mi no mbiswa mi txi khozela ka mmango wuwa, hambi ni Jerusalema.

²²Anu mi khozela txa ku ambi txi ziva, athu hi khozela txi hi txi zivako, nguko kuhanyiswa kuta ngu ka Vajudha.

²³Aniko txi na hoka txikhati, kambe txi hokile, atxi vakhozeli va ditshuri va no khozela Tate ngu moya ni ditshuri, nguko ngu vonevo vakhozeli vava Tate a va dhundako.

²⁴Txizimu i Moya, se vakhozeli va txona va fanela ku txi khozela ngu Moya ni ditshuri.”

²⁵Wamsikati a to engeta a txi khene: “Na tiziva ti to wata Mesiya, awu a dhanwako ku i Kristu, se a di tile, Ene a nata hi gondisa totshe.”

²⁶Jesu a nje khene kwakwe: “Ngani ni wombawombako ni nawe.”

²⁷Kunukunuko va to bwaka vagondiswa vakwe, se ni vona va to xamala ngu kuwa Ene a nga txi womba-womba ni wamsikati. Hambi keto, kuwalo ni wammweyo wa vagondiswa, a nga mu wotisa tito: “U lava txani kani?” Mwendo ku: “Njitxani u bhulako nayo kani?”

²⁸Konaho wamsikati a to leka lidhuwa, e tsula didhoropani eya gela vathu, a txi khene:

²⁹“Ngonani mi ta wona m'thu wu a nga ni gela totshe ti ni nga ti maha. Ina hi nga ene Mesiya kani?”

³⁰Vona va to huma ngu didhoropani, ve tsula kuya wonana ni Jesu.

³¹Ngu kumaha keto, vagondiswa vakwe va to mkhongotela, va txi kha vona: “Dyana, M'gondisi!”

³²Aniko Ene a to va xamula a txi khene: “Ani ni na ni sakudya, si anu mi si si ziviko.”

³³Sekoko vagondiswa va to wotisana, va txi kha vona: “A nga va a diho a nga mu tisela sakudya kani?”

³⁴Se Jesu a nje khene kwawe: “Sakudya sangu ngu kumaha kuranda ka wule a nga ni ruma ni kuhetisa mthumo wakwe.

³⁵Kasi kha mi wombi anu, tito: ‘Ku sate mune wa mitxima, se yi na hoka mbimo ya kuelula’, kani? Kha ditshuri na mi gela ni khani: Gulani maso mi wona: Tithembwe ti nga xwee, ti lavako kuelulwa.

³⁶Awule a elulako wa amukela hakhelo, e sengeleta mihando ya wutomi wo mbi guma. Se ti di mahile eto, awu a phayako wa tsaka kumweko ni wu a elulako.

³⁷Ngu toneto, di na ni ditshuri dipswi di diku: ‘Mmwani wa phaya, mmwani wa elula.’

³⁸Ni mi rumete kuya elula asi anu mi nga mbi si thumela; vamwani va thumile se anu ma londola mithumo yawe.”

³⁹Vasamariya vavangi va didhoropa dile va to kholwa kwakwe, ngu mhaka ya wule wamsikati, a nga fakaza a txi khene: “Ene a ni gete totshe ti ni nga ti maha.”

⁴⁰Ngu toneto, mbimo yi va nga mu yela Jesu, va mu kombete ti to e zumba navo, se ene a zumbile navo masiku mambidi.

⁴¹Vamwani kambe vavangi va to kholwa ngu kuengisa kuwombawomba kwakwe.

⁴²Se va to womba ka wule wamsikati va txi kha vona: “Se athu hi nga ngadi i di mapswi ako, ma hi ningako kukholwa, aniko ngathu hipune hi ti engisako ni ku tiziva ti to Ene ngene Muhanyisi wa Ditiko.”

⁴³Ngako ma di pindile masiku mambidi, a to khukha hale, e tsula Galileya.

⁴⁴ Ene Jesu apune a ti wombile a txi khene: “Mprofeti kha dhundwi ditikoni kwawe.”

⁴⁵ Ku ti ngako a di hokile Galileya, Vagalileya va to mu amukela kwati, nguko va ti woni totshe ti a nga ti maha Jerusalema ngu ditshiku da m'buso, ngako ni vona va nga ti yite m'busoni.

⁴⁶ Se Jesu a to tshumela eya Kana ka Galileya, ahawa a nga phindula mati me maha vhinya. Yi ti ti ho nduna ya mfumeli, yi nga ti lwalelwa ngu mwanana, a nga ti Kapernawume.

⁴⁷Nduna yiya, ngako yi di engisile ti to Jesu wata Galileya ngu Judheya, yi to mu yela yi ya mkombela ku e tsula nayo m'tini ka yona, a txi ya hanyisa mwanana wa yona, a nga ti hafuhi ni kufa.

⁴⁸Sekoko Jesu a to womba a txi khene kwakwe: “Anu, ngako mi si woni sixamaliso ni sidiwukiso, kha mi kholwi.”

⁴⁹Awule wa nduna a to khene: “Mkoma, kuluveta u txi ta, a sinzi kufa mwanana wangu.”

⁵⁰Jesu a to mu angula a txi khene: “Tsula, mwanana wako a hanyile.” M'thu wuwa a to kholwa ka mapswi a Jesu, e tsula.

⁵¹Se mbimo yi a nga txi tsula, si to mu hingeta sithumi sakwe, si txi ya mu gela taku: Mwanana wako wa hanya.

⁵²Ene a va wotisile mbimo yi a nga kalamuka ngu yona. Va txi kha vona kwakwe: “Nyamnova, ngu txikhati txa wutxhanu ni simbidi, txindeyandeya txi mu lekile.”

⁵³Se ngu konaho tate wa mwanana a nga tiziva ti to ngu yona yile mbimo Jesu a nga khene: “Mwanana wako a hanyile,” Se ene ni yotshe ngamu yakwe va to kholwa ka Jesu.

⁵⁴Ngu txona txidiwukiso txa wumbidi, atxi Jesu a nga txi maha, ngako a di hokile Galileya, a txi ta ngu Judheya.